ەل باسىنا اۋىرتپالىق تۇسكەن كەزەڭدەردە دە ۇلتتىڭ ءۇش بايتەرەگى حالىققا قورعان بولا ءبىلدى. ۇلى تۇلعالاردى ۇلىقتاۋ ماقساتىندا ەل تاۋەلسىزدىگىنىڭ 30 جىلدىعىنا وراي, تاراز قالاسىندا ءۇش ءبيدىڭ ەسكەرتكىشى اشىلدى. الىپ ەسكەرتكىش جامبىل وبلىستىق سوتى عيماراتىنىڭ الدىندا ورنالاسقان.
ەسكەرتكىشتىڭ اشىلۋ سالتاناتىنا وبلىس اكىمى بەردىبەك ساپارباەۆ, سوت سالاسىنىڭ ارداگەرلەرى مەن وبلىستىق سوت توراعاسى ەربول احمەتجانوۆ قاتىستى. جيىندا ەربول احمەتجانوۆ پەن ارداگەر مۇسابەك تۇرعانبەك ۇلى ەڭ كۇردەلى كەزەڭدە قازاقتاردى بىرىكتىرۋدە شەشۋشى ءرول اتقارىپ, ەلدىڭ ەركىندىگى مەن تاۋەلسىزدىگى ءۇشىن كۇرەسكەن ۇلى بيلەردىڭ ونەگەلى ءومىر جولىنا توقتالدى. «قازاق بيلەرىنىڭ ءəدىل سوت ءىسىن دامىتۋعا جəنە نىعايتۋعا قوسقان ۇلەسى ولشەۋسىز. تولە بي, قازىبەك بي, ايتەكە ءبيدىڭ قازاق حالقىنىڭ قالىپتاسۋىنا ولشەۋسىز ۇلەس قوسقانىن, ەڭبەكتەرىنىڭ سوت تورەلىگىمەن تىعىز بايلانىستى بولعانىن اتاپ وتكەنىمىز ابزال. ەسكەرتكىش دانالىق پەن ادىلدىكتىڭ نىشانى», دەدى مۇسابەك تۇرعانبەك ۇلى. ءوز سوزىندە بەردىبەك ساپارباەۆ ءار زاماننىڭ وزىنە ساي سوت جۇيەسى بولعانىن, كەزىندەگى بيلەر كەڭەسى سونىڭ ايعاعى ەكەندىگىن, تولە بي, ايتەكە بي, قازىبەك بي ەسىمدەرى قازاق مەملەكەتتىلىگى مەن قازاق سوت تورەلىگى نەگىزىمەن تىعىز بايلانىستى ەكەنىن اتاپ ءوتتى. بۇدان كەيىن كەلۋشىلەر ءۇش ءبيدىڭ ەڭسەلى ەسكەرتكىشىنە گۇل شوقتارىن قويىپ, بابالار رۋحىنا تاعزىم ەتتى.
كونە شاھاردا بوي كوتەرگەن جاڭا ەسكەرتكىش بەتوننان قۇيىلىپ, ءمارمار تۇعىرعا ورناتىلعان. مونۋمەنت اۆتورى – تانىمال ءمۇسىنشى تەمىرحان قولجىگىت. ەسكەرتكىشتىڭ بيىكتىگى 3,50 مەتردى قۇرايدى.
جامبىل وبلىسى
