التى ميلليون الاۋ راۋشان

  زامان ديدارىنداعى وزگەرىستەر ومىرگە جاڭا لەپ, ۇتقىر ۇمتىلىستار الا كەلەتىنى بار. اناۋ ءبىر جىلدار­داعى قيىندىقتاردان كەيىن ستەپنو­گور جەو-عا جاڭا ينۆەستور كەلگەن. ارادا ءۇش جىل وتكەندە بۇكىل ايماقتى بۋعا بولەپ تۇراتىن ۇيرەنشىكتى كورىنىس اقىرىنداپ سەيىلە باستادى. سويتسەك, ىلكىمدى ازاماتتار بەي-بەرەكەت بۋدالانىپ جاتاتىن بۋدىڭ ءوزىن ىسكە جاراتاتىن امال تاپقان ەكەن. قالانىڭ وندىرىستىك ايماعىندا وسىلايشا «قۇنارلى» گۇل ءوسىرۋ جىلىجاي ورتالىعى پايدا بولدى. بۇل – 2006 جىل ەدى. كەشەن باسشىسى تامارا ءىليا­سو­ۆا ءوندىرىس ءۇش كەزەڭدىك دامۋ باعى­تىن ۇستاناتىنىن ايتادى. قازىر 3 گەكتاردى الىپ جاتقان جىلىجاي گوللانديانىڭ «Agrotech-Didam» كومپانياسىنىڭ وزىق تەحنولوگياسىنا نەگىزدەلگەن جابدىقتاردى پايدالانادى. مۇندا جىل سايىن جوعارى سۇرىپتى 6 ميلليون دانا راۋشان (روزا) ءوسىرىلىپ, جۇرتشىلىقتىڭ كوڭىل قۋانىشىنا اينالۋدا. ەندى ەكىنشى كەزەڭدە جىلىجاي اۋماعى 6 گەكتارعا ۇلعايتىلىپ, بولاشاقتا 12 گەكتارعا جەتكىزىلمەك. جىل بويى ۇزدىكسىز جۇمىس ىستەي­تىن كاسىپورىن ونىمدەرىنە سۇرانىس جوعارى. قازىر ستەپنوگور گۇلدەرىن ەلىمىزدىڭ بارلىق ءىرى قالالارى مەن رەسەيدىڭ شەكتەس وبلىستارى پايدالانادى. انالار كۇنىنە ارنالعان شوق-شوق گۇلدەردى جىلىجاي قىزمەتكەرلەرى سۇرانىسقا قاراي جىبەرىپ جاتىر. بۇل ولاردىڭ مەرەكەگە تارتۋى دەپ بىلەمىز. باقبەرگەن امالبەك, «ەگەمەن قازاقستان». اقمولا وبلىسى. سۋرەتتە: «قۇنارلى» كەشە­نى­نىڭ كوڭىل جادىراتار راۋشاندارى.