«ەلباسى مەدالىن» 199 قاتىسۋشى يەلەندى. ولاردىڭ قاتارىندا مەكتەپ وقۋشىلارى, ستۋدەنت, كاسىپكەر, ءوزىن-ءوزى جۇمىسپەن قامتۋشىلار دا بار. ماراپات يەلەرىنىڭ ءتىزىمىن مىنا جەردەن كورە الاسىزدار.
بيىل مامىر ايىندا باستاۋ العان جوباعا بارلىعى 2464 ءوتىنىم كەلىپ ءتۇستى. قازىرگى تاڭدا الماتى قالاسى بويىنشا باعدارلامادا 1064 قاتىسۋشى ءوز باقتارىن سىنادى.
اتالعان ءىس-شارا اياسىندا «ەلباسى مەدالى» جوباسىنىڭ بەلسەندى جاستارىن, مەدال يەگەرلەرىن قالا باسشىلىعى, دەپۋتتاتتار, ونەر ازاماتتارى ماراپاتتايتىن بولادى. بىلتىرعى جىلدىڭ ناتيجەسى بويىنشا 261 قولا مەدال يەگەرلەرى ناۋرىز ايىندا, 15 قاتىسۋشى قازان ايىندا ماراپاتتالعان بولاتىن. ايتا كەتەيىك, الماتى قالاسى بويىنشا باعدارلامانىڭ 51 مەدال يەگەرلەرى مەملەكەتتىك گرانت ۇتىپ الدى.
ەسكە سالايىق, قازىرگى تاڭدا قازاقستان رەسپۋبليكاسى ۇكىمەتىنىڭ 2020 جىلعى 24 ساۋىردەگى № 249 قاۋلىسى نەگىزىندە بەكىتىلگەن, «بالالار مەن جاستاردى پاتريوتتىق تانىتقانى جانە بەلسەندى ازاماتتىق ۇستانىمى ءۇشىن ەرەكشەلىك بەلگىسىمەن ناگرادتاۋ قاعيدالارىن» ورىنداۋ ماقساتىندا ەلىمىزدىڭ ەڭ اۋقىمدى چەللەندجى بولىپ سانالاتىن «ەلباسى مەدالى» باعدارلاماسى الماتى قالاسى بويىنشا باستاۋ العان بولاتىن.
«ەلباسى مەدالى» باعدارلاماسىن «El Umiti» باستاماسى اياسىندا نۇرسۇلتان نازارباەۆ قورى جانە «ەلباسى اكادەمياسى» كورپوراتيۆتىك قورى جۇزەگە اسىرۋدا. جوبانى ۇيىمداستىرۋداعى سەرىكتەستەردىڭ ءبىرى - «الماتى دارىنى» دارىندى بالالار مەن تالانتتى جاستاردى انىقتاۋ جانە قولداۋ جونىندەگى ورتالىعى جانە «قازاقستان جاستارىنىڭ كونگرەسى» زتب بولىپ تابىلادى.
