ارقالاعانى العىس

ءبىز 8 ناۋرىز قىزدار مەرەكەسى قارساڭىندا الماتى قالاسى, الاتاۋ اۋدانىنداعى №14 ەمحاناعا بارعانىمىزدا مەرەكەلىك كوڭىل-كۇيدە قىزمەت ەتىپ جاتقان ۇجىم مۇشەلەرىنىڭ جايدارى جۇزدەرىنە كۋا بولدىق. بۇل ەمحانا 45 مىڭعا تاياۋ تۇرعىندارعا قىزمەت ەتسە, ونىڭ 14 مىڭى بالالار ەكەن. اۋدان العاش شاڭىراق كوتەرىپ, جاڭا ەمحانا جۇمىس ىستەي باستاعاننان بەرگى كەزەڭ ىشىندە 7 مىڭنان اسا نارەستە ومىرگە كەلىپتى. ەمحانانىڭ باس دارىگەرى توعجان ەسبەرگەنوۆا بۇكىل ەڭبەك جولىن دەنساۋلىق ساقتاۋ سالاسىنا ارناپ كەلە جاتقان اق حالاتتى ابزال جان بولىپ شىقتى. ول الماتى مەملەكەتتىك مەديتسينا ۋنيۆەرسيتەتىن 1985 جىلى بىتىرگەن سوڭ, اۋىلعا بارىپ ونداعان جىل ەڭبەك ەتىپ, ودان كەيىن قالاعا اۋىسىپتى. قاراپايىم دارىگەردەن باس دارىگەرگە دەيىن جولدان وتكەن تاجىريبەلى جان ەكەن. جاڭا ەمحانا ىسكە قوسىلعان كۇننەن باستاپ باسشىلىق جاساپ كەلە جاتقان توعجان ساعىنىشقىزىن اڭگىمەگە تارقانىمىزدا ول: «ەلباسى نۇرسۇلتان نازارباەۆتىڭ «قازاقستان-2050» ستراتەگياسىندا «ۇلت دەنساۋلىعى – ءبىزدىڭ تابىس­تى بولاشاعىمىزدىڭ كەپىلى» دەگەن ەدى. شىنىندا, تاۋەلسىز مەملەكەتىمىزدىڭ ءار ازاماتىنىڭ دەنساۋلىعى دارىگەرلەردىڭ قالتقىسىز جۇمىسىنا بايلانىستى دەپ بىلەمىن. ءبىزدىڭ ەمحانا دارىگەرلەرى تۇرعىندار عيمارات تابالدىرىعىنان اتتاعاننان باستاپ ولاردىڭ بۇكىل تالاپ-تىلەكتەرى مۇلتىكسىز ورىندالادى. ءار كەلۋشىمەن سىپايى سويلەسىپ, ءتىل تابىسۋ دارىگەردىڭ ازاماتتىق بورىشى دەپ بىلەمىن», دەدى. توعجان ەسبەرگەنوۆانىڭ ايتقان ءۋاجىن ءبىز «العىس كىتاپشالارىنا» كوز جۇگىرتكەندە اقيقات ەكەنىن اڭعاردىق. ءتىپتى ونىڭ ءوزى جەتەكشى بولىپ, قارتتار مەن كوپ بالالى وتباسىلارى تۇراتىن ۇيلەردى ارالاۋدى ۇردىسكە اينالدىرعانى كوڭىلگە جىلىلىق ۇيالاتتى. مۇنداي كىشىلىك پەن كىسىلىك ءاربىر اق حالاتتى ابزال جاننان تابىلىپ جاتسا, نۇر ۇستىنە نۇر بولماق. ەمحانانى ارالاعاندا جۇرتشىلىققا قىزمەت كورسەتەتىن زاماناۋي قۇرال-جابدىقتاردىڭ ءمىنسىز جۇمىس ىستەپ جاتقانىنا, وعان كەلۋشىلەردىڭ ءدان ريزالىعىنا ءتانتى بولدىق. سانسىزباي مولداجان. الماتى.