ءمينيستردىڭ ايتۋىنشا, 2021 جىلدىڭ قورىتىندىسى بويىنشا مۇناي ءوندىرۋ كولەمى 85,7 ملن توننا, ەكسپورت 67,6 ملن توننا دەڭگەيىندە بولادى دەپ كۇتىلۋدە.
«جوسپارعا سايكەس ەلىمىزدە مۇناي ءوندىرۋ كولەمى ارتىپ, 2030 جىلعا قاراي 104,2 ملن تونناعا جەتەدى», دەدى ەنەرگەتيكا ءمينيسترى.
ول مۇناي ءوندىرۋ بويىنشا جوسپارلى كورسەتكىشكە قول جەتكىزۋ بىرقاتار جوبالار ەسەبىنەن قامتاماسىز ەتىلەتىنىن ايتتى. بۇل - تشو-داعى بولاشاق كەڭەيتۋ جوباسى, سونىڭ ارقاسىندا مۇناي ءوندىرۋ جىلىنا 12 ملن تونناعا ۇلعايتىلادى (قولدانىستاعى ءوندىرۋ 28 ملن توننا); قاراشىعاناق كەن ورنىنىڭ ءوندىرۋ سورەسىن قولداۋ جوباسى, سونىڭ ارقاسىندا مۇناي ءوندىرۋ جىلىنا 11-12 ملن توننا دەڭگەيىندە ساقتالادى (قولدانىستاعى ءوندىرۋ 11,6 ملن توننا). سونداي-اق, قاشاعان كەن ورنىندا گاز وڭدەۋ زاۋىتتارىنىڭ قۇرىلىسى 3 ملرد م3 تاۋارلىق گاز وندىرۋگە جانە مۇناي ءوندىرۋدى جىلىنا 16-دان 20 ملن تونناعا دەيىن ارتتىرۋعا مۇمكىندىك بەرەدى. سونىمەن قاتار, كاسپيدەگى حازار جانە قالامقاس-تەڭىز كەن ورىندارىن يگەرۋ جوباسى بويىنشا جۇمىس باستالدى, ولار 2028 جىلدان باستاپ جىلىنا 4 ملن توننا مۇناي وندىرۋگە مۇمكىندىك بەرەدى.
بۇل رەتتە مينيستر بيىلعى مۇناي وڭدەۋ كولەمىنىڭ ناتيجەلەرىمەن ءبولىستى.
«2021 جىلدىڭ قورىتىندىسى بويىنشا مۇناي وڭدەۋ كولەمى 17,1 ملن توننا, مۇناي ونىمدەرىن ءوندىرۋ 13,1 ملن توننا دەڭگەيىندە بولادى دەپ كۇتىلۋدە. اعىمداعى جىلدىڭ قورىتىندىسى بويىنشا مۇناي ونىمدەرىنىڭ نەگىزگى تۇرلەرىنەن بەنزين ءوندىرىسى - 4,7 ملن توننا, ديزەل وتىنى - 4,8 ملن توننا, مازۋت - 2,4 ملن توننا, بيتۋم - 933 مىڭ توننا جانە اۆياكەروسين - 600 مىڭ توننا كولەمىندە بولجانىپ وتىر», دەدى ماعزۇم مىرزاعاليەۆ.
ۆەدومستۆو باسشىسى وسى جىلدىڭ تامىز ايىنان قازان ايىنا دەيىن جانار-جاعارماي ماتەريالدارى نارىعىندا ديزەل وتىنىنىڭ تاپشىلىعى تۋىنداعانىن ەسكە سالدى. وسىعان بايلانىستى ىشكى نارىقتى ديزەل وتىنىمەن قامتاماسىز ەتۋ ءۇشىن بىرقاتار شارالار قابىلداندى. ماسەلەن, مۇناي ونىمدەرىن اۆتوموبيل كولىگىمەن اكەتۋگە تىيىم سالىندى, ول 2022 جىلعى 21 مامىرعا دەيىن قولدانىستا بولادى; ءاموز-گە جوسپارلى جوندەۋ 2022 جىلعا اۋىستىرىلدى; جوندەۋدى پمحز-عا 20201 جىلعى قىركۇيەكتەن قاراشاعا اۋىستىرادى; رف ءموز-نەن 281 مىڭ توننا كولەمىندە ديزەل وتىنى يمپورتى جۇزەگە اسىرىلدى.
«جەدەل قابىلدانعان شارالاردىڭ ارقاسىندا ديزەل وتىنى نارىعىنداعى جاعدايدى تۇراقتاندىرۋعا قول جەتكىزىلدى», دەپ قوستى ماعزۇم مىرزاعاليەۆ.
