«نومينالى 100 تەڭگەلىك مەلحيوردان جاسالعان مونەتالار «اسا كورنەكتى وقيعالار مەن ادامدار» سەرياسىن جالعاستىرۋدا. بيىل قازاقستاندا قازاق بالۋانى قاجىمۇقان مۇڭايتپاسوۆتىڭ 150 جىلدىعى تويلانادى», دەپ جازادى قر ۇلتتىق بانكىنىڭ ءباسپاسوز قىزمەتى.
مونەتالاردىڭ اۆەرسىندەگى ورتالىق بولىگىندە قازاقستان رەسپۋبليكاسىنىڭ مەملەكەتتىك ەلتاڭباسى بەينەلەنگەن. ەلتاڭبانىڭ سول جانە وڭ جاعىندا ۇلتتىق ويۋ-ورنەك ەلەمەنتتەرى ورنالاسقان. اينالدىرا QAZAQSTAN ULTTYQ BANKI • NATIONAL BANK OF KAZAKHSTAN دەگەن جازۋ بار. تومەنگى بولىگىندە مونەتانىڭ نومينالىن بىلدىرەتىن 100 TEŃGE جازۋى بار.
مونەتانىڭ سىرت جاعىندا قاجىمۇقان مۇڭايتپاسوۆتىڭ پورترەتتىك بەينەسى, پورترەتتىڭ سول جاعىندا - مەرەيتويلىق كۇندى بىلدىرەتىن 150 JYL جازۋى, وڭ جاعىندا - سپورتتىق كۇرەستىڭ سيۋجەتتىك فراگمەنتى جانە دايىندالعان جىلىن بىلدىرەتىن «2021» جازۋى, مونەتانىڭ اينالدىرا سول جاعىندا - QAJYMUQAN MUŃAITPASULY جازۋى ورنالاستىرىلعان.
كوللەكتسيالىق مونەتالاردىڭ ماسساسى - 15 گرامم, ديامەترى - 33 مم. نومينالى 100 تەڭگە, تارالىمى 15 000 دانا مەلحيور من 25 قورىتپاسىنان دايىندالعان مونەتالار brilliant uncirculated ساپاسىمەن ازىرلەنگەن.
«مونەتالار كوللەكتسيالىق قۇنى بويىنشا ساتۋعا ارنالعان. ولار قازاقستان رەسپۋبليكاسىنىڭ بۇكىل اۋماعىندا تولەمدەردىڭ بارلىق تۇرلەرى بويىنشا, سونداي-اق بانك شوتتارىنا ەسەپتەۋ ءۇشىن, قازاقستان رەسپۋبليكاسىنىڭ بارلىق بانكتەرىندە اۋدارۋ, ءبولۋ جانە ايىرباستاۋ ءۇشىن وزدەرىنىڭ بەلگىلەنگەن قۇنى بويىنشا قابىلداۋعا مىندەتتى», دەپ تولىقتىردى قر ۇلتتىق بانكىنىڭ ءباسپاسوز قىزمەتى.
