ءىس-شارا بارىسىندا يتاليالىق زاماناۋي سۋرەتشى لۋيزا ۆالەنتينيدىڭ «راۋشان» ينستالياتسياسى تانىستىرىلدى. سالتاناتتى راسىمدە ءسوز سويلەگەن يتاليانىڭ قازاقستانداعى توتەنشە جانە وكىلەتتى ەلشىسى ماركو البەرتي بۇل تۋىندىنىڭ تاڭدالۋ سەبەبىن ءتۇسىندىردى. «قازاقستاندى تاۋەلسىزدىكتىڭ 30 جىلدىق مەرەيتويىمەن شىن جۇرەكتەن قۇتتىقتايمىن. «راۋشان» ينستالياتسياسىن تاڭداۋىمىزدىڭ بىرنەشە سەبەبى بار. بىرىنشىدەن, راۋشان گ ۇلى ماحابباتتان بولەك سەنىمدى, قۇرمەتتى بىلدىرەدى. وسى تۋىندى ارقىلى ەكى ەل اراسىنداعى بايلانىستىڭ ماڭىزىن كورسەتكىمىز كەلدى. سونداي-اق گۇلدىڭ جايقالىپ ءوسۋى ءۇشىن وعان ەرەكشە كۇتىم كەرەك. ەندەشە, وسى ارقىلى يتاليا مەن قازاقستان اراسىنداعى قارىم-قاتىناسىمىزدى ىلگەرىلەتۋ ءۇشىن ءوزارا بايلانىسقا ەرەكشە كوڭىل بولگەن ءجون. ينستالياتسيا ارقىلى وسىنى كورسەتكىمىز كەلدى», دەيدى ماركو البەرتي.
لۋيزا ۆالەنتيني – يتاليالىق جاس سۋرەتشىنىڭ ءبىرى. ءىس-شارانى ۇيىمداستىرۋشىلاردىڭ ايتۋىنشا, اتالعان سۋرەتشىنى تاڭداۋدىڭ دا سىرى بار. ويتكەنى 30 جىلدىق مەرەيتوي تاريحتا از عانا ۋاقىت. جاس ونەرپازدىڭ تۋىندىسى ارقىلى قازاقستاننىڭ كەلەشەگى جارقىن ەكەنىن كورسەتۋدى ماقسات تۇتقان.
قازاقستان 1991 جىلى ەگەمەندىك العاننان كەيىن تاۋەلسىزدىگىمىزدى مويىنداعان العاشقى ەلدەردىڭ ءبىرى – يتاليا. وسى ماڭىزدى تاريحي وقيعادان كەيىن ەكى ەل اراسىندا ديپلوماتيالىق قارىم-قاتىناس ورناپ, ەلشىلىكتەر اشىلعاندىعى بەلگىلى. بۇگىندە بۇل ەلشىلىكتەر ساياسي-ەكونوميكالىق, مادەني جانە تاعى باسقا قارىم-قاتىناستاردى دامىتۋ جولىندا تابىستى قىزمەت اتقارىپ كەلەدى.
سالتاناتتى راسىمگە ەلشىلەر, بەلگىلى مەملەكەت جانە قوعام قايراتكەرلەرى, سونداي-اق شىعارماشىلىق زيالى قاۋىم وكىلدەرى, مۋزەي قىزمەتكەرلەرى قاتىستى.
