پرەزيدەنتتەردىڭ سىڭىرگەن ەڭبەگىن مويىنداۋ – وركەنيەتتى قوعام مادەنيەتىنىڭ ءبىر بولىگى جانە ءوز تاريحىنا دەگەن قۇرمەتتىڭ بەلگىسى. بيىل قازاقستاندا تۇڭعىش پرەزيدەنت كۇنى ونىنشى رەت اتالىپ ءوتتى. كەيىنگى 30 جىل ىشىندە پرەزيدەنتتىك ينستيتۋت ن.نازارباەۆتى كوشباسشى رەتىندە قالىپتاستىرىپ قانا قويعان جوق, سونداي-اق كوشباسشىنىڭ ءوزى دە ينستيتۋتتىڭ تىنىسىن اشىپ, وعان ساياسي, تاريحي سيپات بەردى.
وسى ۋاقىت ىشىندە پرەزيدەنتتىك ينستيتۋت ايتارلىقتاي وزگەرىستەرگە ۇشىرادى. ءبىر قاراعاندا, رەسپۋبليكالاردا پرەزيدەنتتىك بيلىكتى ەنگىزۋ وداقتىق ورتالىققا ەلىكتەۋ سەكىلدى كورىنگەنمەن, ءمان-جايلاردى مۇقيات تالداۋ ءاربىر ناقتى جاعدايدا ونىڭ ەرەكشەلىگىن, ەرەكشە كونستيتۋتسيالىق فورمۋلاسىن جانە ەڭ باستىسى, پرەزيدەنتتىك ينستيتۋتتى دامىتۋ جانە وزگەرتۋ جولدارى ءارتۇرلى ەكەنىن كورسەتەدى. تيىسىنشە, ءاربىر جاعدايدا پرەزيدەنتتىك بيلىكتىڭ قالىپتاسۋى مەن دامۋى ناقتى فاكتورلار ارقىلى انىقتالدى.
تاۋەلسىزدىكتى ساقتاۋ مەن قازاقستاندىق مەملەكەتتىلىكتىڭ قالىپتاسۋىنىڭ بۇكىل اۋىرتپالىعى قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ يىعىنا ءتۇستى. الدىڭعى قاتارعا كوشباسشى مەن تۇلعا فاكتورى شىقتى. تاۋەلسىزدىك جاريالانعان كۇننەن باستاپ جاڭا كونستيتۋتسيانى ازىرلەۋ ن.نازارباەۆتىڭ باسشىلىعىمەن جانە تىكەلەي قاتىسۋىمەن جۇزەگە اسىرىلدى. كونستيتۋتسيالىق كوميسسيانىڭ 1992 جىلعى 6 قاڭتاردا وتكەن وتىرىسىندا پرەزيدەنت جاڭا كونستيتۋتسيانىڭ نەگىزگى تۇستارى ورىن العان نارىق جاعدايىن, بارلىق تۇجىرىمدى, سونىڭ ىشىندە مەملەكەتتىك باسقارۋعا قاتىستى قۇقىقتىق قامتاماسىز ەتۋدى ەسەپكە الا وتىرىپ, مۇنىڭ رەسپۋبليكا ازاماتتارىنىڭ قۇقىقتارى مەن مىندەتتەرىن ناقتىلاۋ ەكەنىنە توقتالدى.
تاۋەلسىزدىككە قول جەتكىزگەن كەزىمىزدە مەملەكەت پەن قوعامدى جان-جاقتى جاڭعىرتۋ قاجەت ەدى. بۇل اۋقىمدى مىندەت بىرقاتار وبەكتيۆتى جانە سۋبەكتيۆتى جاعدايعا بايلانىستى قيىنداي ءتۇستى. ن.نازارباەۆ وسىنداي اسا كۇردەلى تاريحي جاعدايلاردا مودەرنيزاتسيا تەورياسى مەن تاجىريبەسىن جەتىك مەڭگەرگەن, ۇيلەستىرە بىلەتىن ساياسي كوشباسشى رەتىندەگى قاسيەتتەرىن جان-جاقتى تانىتقانىن اتاپ وتكەن ءجون.
جوعارعى كەڭەس 1993 جىلى 28 قاڭتاردا تاۋەلسىز قازاقستان رەسپۋبليكاسىنىڭ تۇڭعىش كونستيتۋتسياسىن قابىلدادى. كونستيتۋتسيادا مەملەكەتتىك بيلىك زاڭ شىعارۋشى, سوت, اتقارۋشى رەتىندە ءبولىندى. سونداي-اق اتا زاڭنىڭ تىكەلەي ارەكەت ەتۋ ءپرينتسيپىن جانە بارلىق باسقا زاڭنان ۇستەمدىگى بەكىتىلدى. الايدا قازاقستان رەسپۋبليكاسىنىڭ جاڭا اتا زاڭى بيلىك جۇيەسىنىڭ, مەملەكەتتىك قۇرىلىمنىڭ نەگىزگى ماسەلەلەرىن شەشە المادى. بىرقاتار جاعدايدا اتقارۋشى بيلىكتىڭ شەشىمدەرى مەن جارلىقتارىن جوعارعى كەڭەس نازارىنا المادى.
جەرگىلىكتى جەرلەردە دە, ورتالىقتا دا بيلىك تارماقتارى اراسىنداعى كۇرەس اعىمداعى جانە بولاشاقتاعى ماسەلەلەردى جەدەل شەشۋگە كەدەرگى كەلتىرىپ, مەملەكەتتىلىكتىڭ قالىپتاسۋ ۇدەرىسىن تەجەپ, تاۋەلسىزدىكتىڭ ءمانى مەن لوگيكاسىن دەفورماتسيالادى. ەلىمىز پرەزيدەنتتىك باسقارۋ فورماسىن تاڭدادى. بۇل بىردەن-ءبىر دۇرىس شەشىم ەدى. ويتكەنى تاريحتاعى سىندارلى, بەتبۇرىس كەزەڭدەرىندە ءاردايىم جانە بارلىق جەردە بيلىكتىڭ ورتالىقتاندىرىلۋى ەشبىر شارتتىلىقتارمەن, فورمالدىلىقتارمەن شەكتەلمەيتىن, جەكە ادامداردىڭ دا, قوعامنىڭ دا جاڭاشىل, جاسامپازدىق قاسيەتتەرىن اشاتىن سونى جولمەن جۇرەتىن كوشباسشىلىقتى تالاپ ەتتى.
ناتيجەسىندە, قازاقستاندا تاڭداپ الىنعان پرەزيدەنتتىك ينستيتۋتتىڭ ۇلگىسى العاشقى كەزەڭدە ايتارلىقتاي تۇراقتى بولىپ شىقتى. وسىلايشا, ۇكىمەتتى قۇرۋعا جوعارعى كەڭەس قاتىسىپ, سونىمەن بىرگە پرەزيدەنتتىڭ وكىلەتتىگى ايتارلىقتاي نىعايدى.
قازاقستاننىڭ تاۋەلسىز مەملەكەت رەتىندە ساقتالۋىنا جانە دامۋىنا ءوز دامۋىنىڭ العاشقى كەزەڭىندە قابىلدانعان ەۋروپالىق (پرەزيدەنتتىك مودەل شەڭبەرىندەگى) مەملەكەتتىلىك تۇجىرىمداماسى (قۇقىقتىق, ساياسي, مادەني جانە وركەنيەتتىك تۇرعىدان) كومەكتەستى. بۇل تاڭداۋ ەتنوۇلتشىلدىق امبيتسيالار مەن ۇلتارالىق قاقتىعىستار كەزەڭىنەن سالىستىرمالى تۇردە اۋىرتپالىقسىز وتۋگە مۇمكىندىك بەردى. قازاقستان مۇددەلى ساياسي كۇشتەر اراسىنداعى قىزىعۋشىلىقتاردىڭ تەپە-تەڭدىگى تۇرىندەگى ورتا جولدى تابا ءبىلدى.
شىن مانىندە, قازاقستان پرەزيدەنتى ستراتەگيالىق جوسپارلاۋ باعىتىن ۇستانعان العاشقى ساياسي كوشباسشىعا اينالدى. ەگەمەن قازاقستاننىڭ ۇزاق مەرزىمدى ستراتەگياسىن ازىرلەۋ ۇدەرىسىندە پرەزيدەنت جولداۋلارىنىڭ ورنى ەرەكشە. وندا مەملەكەت باسشىسى مەن قازاقستان حالقى, ەل كوشباسشىسى مەن سىرتقى الەم اراسىنداعى ديالوگ قالىپتاستى. مەملەكەت پەن قوعامنىڭ الداعى ۇزاق جىلدارعا ارنالعان ستراتەگياسى پىسىقتالادى.
باستاپقىدا ن.نازارباەۆتىڭ ستراتەگيالىق جوسپارلاۋ سالاسىنداعى ءستيلى ەرەكشەلەندى. اتاپ ايتقاندا, تۇڭعىش پرەزيدەنت ماقسات قويۋدىڭ جاڭاشا كوزقاراسىن كورسەتتى. شەتەلدىك تاجىريبە كورسەتكەندەي, ساياساتكەرلەر مەن ساراپشىلار كوبىنەسە قازىرگى تەندەنتسيالاردى الىس بولاشاققا ەكستراپولياتسيالاۋعا, ياعني سىزىقتىق پەرسپەكتيۆانى قولدانۋعا بەيىم. بۇل ءادىس قولدا بار رەسۋرستار شەگىندە ناقتى جانە ورىندالاتىن تاپسىرمالاردى قويۋعا مۇمكىندىك بەرەدى. الايدا مۇنداي ويلاۋ ءستيلى اۋەلدە-اق ۇلتتى مازمۇنى مەن بولمىسى جاعىنان ءبىرشاما شەكتەلگەن قاراپايىم ءومىر ءسۇرۋ مىندەتتەرىن جۇزەگە اسىرۋعا باعىتتاپ, تىعىرىققا تىرەيدى.
سوندىقتان ن.نازارباەۆ ءوزىنىڭ جاڭعىرتۋ ستراتەگياسىن قالىپتاستىرا وتىرىپ, سىزىقتىق ەمەس, كەرى پەرسپەكتيۆانى قولداندى. سوعان سايكەس ەڭ الدىمەن الىس بولاشاقتىڭ قوعام مەن ەل ءۇشىن قولايلى جانە قالاۋلى ۇلگىسى جاسالادى. سودان كەيىن عانا وسى ۇلگىنى نەگىزگە الا وتىرىپ, ۇزاقمەرزىمدى, ورتامەرزىمدى جانە قىسقامەرزىمدى كەزەڭگە ارنالعان مىندەتتەر قالىپتاستىرىلادى. بۇل تۇرعىدان العاندا قازاقستان تمد-داعى ارىپتەستەرىمەن سالىستىرعاندا ءتيىمدى ارتىقشىلىققا يە. ن.نازارباەۆ شىنىمەن دە ەكونوميكالىق جانە ساياسي جاڭعىرتۋدىڭ, ىشكى جانە سىرتقى ساياساتتىڭ, ەلدىڭ جاقىن جانە ۇزاقمەرزىمدى مۇددەلەرىنىڭ اراسىنداعى اسا قاجەتتى تەپە-تەڭدىكتى تابا ءبىلدى.
ەكونوميكالىق رەفورمالار جولىندا ن.ءا.نازارباەۆقا ساياسي جاۋاپكەرشىلىكتىڭ اۋىر جۇگىن كوتەرۋگە تۋرا كەلدى. قايتا قۇرۋدىڭ ءار كەزەڭىندە تۇڭعىش پرەزيدەنت قازاقستاندى وسى جولدا قانداي ماسەلەلەر مەن قيىندىقتار كۇتىپ تۇرعانىن اشىق ايتتى. قازاقستاننىڭ ەكونوميكالىق ىرگەتاسى نىعايا تۇسكەن سايىن ەلباسى كۇشتى الەۋمەتتىك ساياسات جۇرگىزۋ مىندەتىن ودان ءارى اشىق, ءارى ايقىن ۇسىنىپ كەلە جاتقانىن ايتا كەتكەن ءجون. ن.نازارباەۆتىڭ پىكىرىنشە, قازاقستاندىقتاردىڭ, قازاقستاندىق قوعامنىڭ بارلىق توبىنىڭ الەۋمەتتىك ءال-اۋقاتىن ۇدايى جاقسارتۋ مەملەكەتتىك ساياساتتىڭ ءبىرىنشى ماقساتى جانە سولاي بولىپ قالا بەرمەك.
1995 جىلعى كونستيتۋتسيادا قازاقستان دەموكراتيالىق, قۇقىقتىق, الەۋمەتتىك, ۋنيتارلىق مەملەكەت دەپ جاريالاندى. ەل پرەزيدەنتى مەملەكەت باسشىسى رەتىندە ەڭ جوعارى لاۋازىمدى تۇلعا مارتەبەسىن الدى.
ن.نازارباەۆتىڭ قوعامدى رەفورمالاۋ مەن قازاقستاندىق مەملەكەتتىلىكتى قۇرۋداعى جانقيارلىق كۇش-جىگەرى ونىڭ حالىقارالىق باستامالارىندا زاڭدى جالعاسىن تاپتى. ىشكى جاعداي ويداعىداي جولعا قويىلماسا, ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ باستاماسىمەن ەۋرازيالىق ەكونوميكالىق وداق, اوسشك, الەمدىك جانە ءداستۇرلى دىندەر سەزدەرى يدەياسىنىڭ جۇزەگە اسۋى ەكىتالاي ەدى.
جاڭا مەملەكەتتىلىك وتكەننىڭ بارلىق جاقسىسىن, ەڭ وزىق تۇستارىن بويىنا ءسىڭىردى. مىسالى, ءداستۇرلى قازاق قوعامىندا ادامدار اراسىنداعى تاتۋلىق پەن كەلىسىم, مەملەكەتتىڭ ءومىر ءسۇرۋىن قامتاماسىز ەتۋ زاڭدارى مەن ادەت-عۇرىپتارىن ساقتاۋ, بيلەۋشىلەردىڭ دانالىعى مەن كورەگەندىگى جوعارى باعالاندى. ەلباسىنىڭ ساياساتىمەن, باسشىلىعىمەن قۇرىلعان مەملەكەتتىلىك دالا دەموكراتياسىنىڭ الەۋەتىن ءتيىمدى تانىتا ءبىلدى.
ەلباسى شىن مانىندە كۇشتى بيلىك پەن پرەزيدەنتتىك جۇيەنى, قوعامدىق تۇراقتىلىقتى, ۇلتارالىق جانە كونفەسسياارالىق كەلىسىمدى قامتاماسىز ەتەتىن, قازاقستاندىق بىرەگەيلىك پەن جالپىقازاقستاندىق وتانسۇيگىشتىكتى قالىپتاستىراتىن قازاقستاندىق ۇلگىنىڭ نەگىزىن قالادى. ۇلتارالىق كەلىسىم كوپەتنوستى قازاقستاندىق قوعام جاعدايىندا ەرەكشە ماڭىزعا يە. بۇل جالاڭ ساياسي پراگماتيزمنىڭ ماسەلەسى ەمەس. وسىعان بايلانىستى ۇلتتىق ماسەلەلەردى شەشۋدە بەيبىتشىلىك پەن ەۆوليۋتسيالىق كوزقاراستىڭ جاقتاۋشىسىمىن دەپ جاريالاعان ەلباسىنىڭ بەرىك جانە دايەكتى باعىتىنىڭ ماڭىزىن اتاپ وتكەن ءجون.
قازاقستان رەسپۋبليكاسى تۇڭعىش پرەزيدەنتىنىڭ ساياسي كوشباسشى, ستراتەگ جانە رەفورماتور رەتىندەگى ەرەكشە قاسيەتتەرى قازاقستاننىڭ استاناسىن كوشىرۋ ماسەلەسىن شەشۋدە ايقىن كورىندى.
كوپەتنوستى جانە كوپكونفەسسيالى قازاقستان جاعدايىندا جاڭعىرتۋدى جۇزەگە اسىرۋى, جاھاندىق ويىنشىلاردىڭ ستراتەگيالىق سەرىكتەسى رەتىندە ارەكەت ەتۋگە قابىلەتتى, كۇشتى جانە قارقىندى دامۋ جولىنا تۇسكەن مەملەكەت قۇرۋى ن.نازارباەۆتى پرەزيدەنتتىك بيلىك ۇلگىسىنىڭ وكىلى رەتىندە كورنەكتى رەفورماتورلارمەن تەڭەستىردى.
وسىلايشا, قازاقستاندا تاۋەلسىزدىك جىلدارىندا كۇشتى پرەزيدەنتتىك ۇلگى شەڭبەرىندە ليبەرالدى قوعامدىق قۇرىلىس پەن دەموكراتيالىق ساياسي جۇيەنىڭ باستى نەگىزدەرىن بەكىتكەن ماڭىزدى ينستيتۋتسيونالدىق جانە قۇرىلىمدىق قايتا قۇرۋلار جۇزەگە اسىرىلدى. سونىمەن بىرگە قوعامدا تۋىنداۋى ىقتيمال قاۋىپتى ماسەلەلەر ىشكى قايشىلىقتارسىز شەشىلدى. ساياسي رەفورمالاردى بىرتىندەپ جۇرگىزۋ ستراتەگياسى قازاقستاندىق قوعامعا كۇردەلى وتپەلى كەزەڭنىڭ قاۋىپتى «قايتا باستامالارىنا» توتەپ بەرۋگە مۇمكىندىك بەردى.
ن.نازارباەۆتىڭ اسا كۇردەلى جاعدايدا قازاقستاندىق قوعامدى تەرەڭ جاڭعىرتۋ ترانسفورماتسيالارىن باستاۋى تاريحي شەشىم ەدى. بۇل شارالاردى ەلباسىنىڭ رەفورمالارىنان بولەك قاراستىرماۋ كەرەك. تۇڭعىش پرەزيدەنت ساياسي كۇرەستە بىرجاقتى پوزيتسيا ۇستانىپ, قازاق ەلىن, ەكونوميكا مەن قوعام ءومىرىنىڭ بارلىق سالاسىن جاڭعىرتۋدى جالعاستىرۋدى تاباندى تۇردە جاقتادى.
وزىق قوعامدىق سانانى جاڭعىرتۋعا نەگىزدەلگەن اۋقىمدى قايتا قۇرۋلار جاعدايىندا جاڭعىرتۋ پروتسەستەرىنىڭ ايقىن ماقساتتارى مەن مىندەتتەرى, باسىمدىقتارى, تابىسقا جەتكىزەتىن ادىستەرى بولادى. ول ساياسي جانە ەكونوميكالىق مودەرنيزاتسيانى تولىقتىرىپ قانا قويماي, ولاردىڭ وزەگىنە اينالادى. قازاقستان ءۇشىن ارقاشاندا اشىقتىق, يننوۆاتسيا جانە پروگرەسكە دەگەن وركەنيەتتى جانە قۇندى تاڭداۋ ءتان.
ەلباسى ۇسىنعان جەتەكشى يدەولوگەما – اشىقتىق, وزگەرىستەرگە دايىندىق, سالاماتتى پراگماتيزم, بۇكىل قازاق قوعامىنىڭ رۋحاني جانە مادەني ءديناميزمى ارقىلى جۇرەتىن رەفورمالار. جاڭعىرۋ – الەۋمەتتىك-مادەني قۇبىلىس. ونىڭ استارىندا ادامنىڭ دۇنيەتانىمى, ونىڭ قورشاعان الەمدى جانە ونداعى ورنىن ءتۇسىنۋى, مىنەز-ق ۇلىق ءموتيۆى مەن ءستيلى, قۇندىلىق باعدارلارى مەن مادەني ارتىقشىلىقتاردىڭ يگەرىلگەن جۇيەسى, الەۋمەتتىك, ونىڭ ىشىندە ساياسي, ءومىر ءسۇرۋ فورمالارى, بەلگىلى ءبىر جۇيە قۇقىقتارى مەن مىندەتتەرى تۇر.
جاڭا زامان تاريحىنداعى ساياسي كوشباسشىلىق فاكتورى اۋقىمدى جانە ءوسىپ كەلە جاتقان ماڭىزدىلىققا يە. ەرەكشە تاريحي ميسسيا مەن جاۋاپكەرشىلىك قوعام مەن مەملەكەتتىڭ تۇبەگەيلى قايتا قۇرۋ پروتسەستەرىنە جەتەكشىلىك ەتەتىن جانە باعىتتايتىن ساياسي كوشباسشىلارعا جۇكتەلەدى. نۇرسۇلتان نازارباەۆ فەنومەنى پرەزيدەنتتىك ينستيتۋت شەڭبەرىنەن شىعىپ, ەلباسى – ۇلت كوشباسشىسى دارەجەسىنە كوتەرىلدى.
بۇعان ەلباسىنىڭ الەۋمەتتانۋلىق مونيتورينگتەردەگى رەيتينگى دالەل. ءتىپتى داعدارىستىق 2008-2009 جىلدارى دا ن.نازارباەۆتى قولدايتىندار سانى 85 پايىزدان تومەن بولعان جوق. بۇل قازاقستاندىقتاردىڭ باسىم كوپشىلىگى ءۇشىن پرەزيدەنت تۇراقتىلىقتىڭ, سونداي-اق ماقساتى مەن قول جەتكىزگەن ناتيجەسى دەموكراتيالى, گۇلدەنگەن, وزىنە سەنىمدى, قوعامدىق بىرلەسكەن, دۇنيەجۇزىلىك قوعامداستىق مويىنداعان قازاقستاندى قالىپتاستىرۋدىڭ ساياسي باعىتىن بۇلجىتپاي ۇستانۋدىڭ سەنىمدى كەپىلى بولعانىن بايقاتادى.
2010 جىلى قازاقستاندا ماڭىزدى قۇجات ن.نازارباەۆقا ەلباسى اتاعىن جانە پرەزيدەنتتىككە شەكسىز رەت سايلانۋ قۇقىعىن بەرگەن تۇڭعىش پرەزيدەنت تۋرالى زاڭ قابىلداندى. تۇڭعىش پرەزيدەنت – ەلباسى نۇرسۇلتان نازارباەۆتىڭ ەلىمىزدىڭ جاڭا زامان تاريحىنداعى ايرىقشا سىڭىرگەن ەڭبەگى, ونىڭ قازاقستاندىق مەملەكەتتىلىكتىڭ جاڭعىرۋىنىڭ كوشباسشىسى رەتىندەگى كورنەكتى ءرولى مويىندالدى.
تۇڭعىش پرەزيدەنت بيلىك جۇيەسىن ترانسفورماتسيالاۋ جانە قازاقستاندىق قوعامدى بارىنشا دەموكراتيالاندىرۋ مەن وزىندىك ىشكى تۇراقتىلىققا يە وسىنداي جۇيەنى قۇرۋ جونىندەگى ءوز باعىتىن تاباندى تۇردە جالعاستىرىپ كەلەدى. Nur Otan پارتياسىنىڭ سايلاۋالدى باعدارلاماسىندا ءاربىر قازاقستاندىق ءۇشىن ماڭىزدى باستامالار ايتىلدى. Nur Otan كادرلىق قۇرامىنىڭ جاڭارۋى وسى ۇدەرىستىڭ الدىڭعى قاتارىندا تۇر. پرايمەريزگە قاتىسقان پارتيانىڭ ءاربىر ءۇشىنشى جاڭا مۇشەسى جەڭىسكە جەتتى. پارتيالىق تىزىمگە ەنگەندەردىڭ ۇشتەن ءبىرى جانە ءاربىر بەسىنشىسى – جاستار.
اتا زاڭنىڭ 40-بابىنا سايكەس قازاقستان رەسپۋبليكاسىنىڭ پرەزيدەنتى – مەملەكەت باسشىسى, ونىڭ ەڭ جوعارى لاۋازىمدى تۇلعاسى, حالىق پەن مەملەكەتتىك بيلىك بىرلىگىنىڭ, كونستيتۋتسيانىڭ مىزعىماستىعىنىڭ, ادام جانە ازامات قۇقىقتارى مەن بوستاندىقتارىنىڭ نىشانى ءارى كەپىلى.
قازاقستان رەسپۋبليكاسى پرەزيدەنتىنىڭ جوعارى ساياسي-قۇقىقتىق مارتەبەسىنىڭ ناقتى تاريحي ىسكە اسۋى الەمدىك دەڭگەيدەگى تۇلعا – ەلباسى نۇرسۇلتان نازارباەۆتىڭ دەڭگەيىمەن ايقىندالدى. تۇڭعىش پرەزيدەنتىمىز – قازاقستاندىق مەملەكەتتىلىكتىڭ نەگىزىن قالاۋشى, تاۋەلسىز قازاقستاننىڭ تابىستارى مەن جەتىستىكتەرىنىڭ شابىتتاندىرۋشىسى جانە ۇيىمداستىرۋشىسى.
قازىرگى تاڭدا ەلباسىنىڭ ءىسىن قازاقستان پرەزيدەنتى قاسىم-جومارت توقاەۆ تابىستى جالعاستىرىپ كەلەدى. بۇگىنگى تاڭدا مەملەكەت باسشىسى كونستيتۋتسيالىق ارتىقشىلىقتارعا سايكەس ەلىمىزدىڭ بىرلىگى مەن ىلگەرىلەۋىن قامتاماسىز ەتىپ, كونستيتۋتسيانى, ادام جانە ازامات قۇقىقتارى مەن بوستاندىقتارىن قورعايدى, ازاماتتىق, ۇلتارالىق جانە كونفەسسياارالىق كەلىسىمنىڭ كەپىلى. پرەزيدەنت قۋاتتى مەملەكەت جانە باسەكەگە قابىلەتتى ۇلت قالىپتاستىراتىن جۇيەلى رەفورمالاردى جۇزەگە اسىرىپ وتىر. پرەزيدەنتتىڭ پىكىرىنشە, ءوزارا سەنىم جانە جاۋاپكەرشىلىك قاعيداتتارىنا نەگىزدەلگەن مەملەكەت پەن قوعامنىڭ ءوزارا ارەكەتتەستىگىنسىز تۇراقتى دامۋ مۇمكىن ەمەس.
مەملەكەت باسشىسىنىڭ ەلدىڭ ساياسي جانە الەۋمەتتىك-ەكونوميكالىق تۇراقتىلىعىن قامتاماسىز ەتۋى قازاقستان رەسپۋبليكاسىنىڭ پرەزيدەنتتىك باسقارۋ نىسانىن قازاقستاندىق قوعام الدىندا زاڭدى ەتكەن باستى شەشۋشى ارتىقشىلىعى.
Nur Otan پارتياسىنىڭ ساياسي كەڭەسىندە ەلباسى بۇگىندە مەملەكەتتىگىمىزدىڭ تۇعىرىن ساقتاۋ بۇرىنعىدان دا ماڭىزدى ەكەنىن, ونىڭ ىشىندە تاۋەلسىزدىك – ءاربىر ەل ازاماتىنىڭ باستى قۇندىلىعى ەكەنىن اتاپ ءوتتى. پرەزيدەنت ق.توقاەۆتىڭ توڭىرەگىنە حالىقتى بىرىكتىرىپ, مەملەكەتتىڭ ودان ءارى دامۋى ماڭىزدى. تۇراقتىلىق, بەيبىتشىلىك پەن تىنىشتىق باستى قۇندىلىققا اينالىپ وتىرعان كەزدە وسىلاي عانا جاھاندىق قيىندىقتاردى جەڭۋگە بولادى.
زارەما شاۋكەنوۆا,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى
