«تاۋەلسىزدىك الىپ, تۋىمىزدى تىگىپ, ەل بولعانىمىزعا 30 جىل. بۇل – ۇلى توي, ۇلتتىڭ, ەلدىڭ باقىتى. وسى ۇلى كۇندى اتا-بابامىز, كەشەگى الاش ارىستارى, ۇلتىن سۇيگەن ۇلدار قانشاما عاسىر كۇتتى. وسى جولدا قانشاما قان, كوز جاسى توگىلدى. بۇگىن مىنە نۇر-سۇلتان قالاسىنىڭ تورىنە, بۇكىل قازاق حالقىنا, قازاقستاندىقتارعا سالەم جولداپ, وسىناۋ ۇلى مەرەكەمەن قۇتتىقتاعىم كەلەدى. كەلەر جىلى ەلوردانىڭ ارقا تورىنە كوشكەنىنە 25 جىل تولماق. بۇل ەكى تويدى ءبولىپ-جارۋعا بولمايدى. ەكەۋى دە ۇلى توي.
بۇل ءبىزدىڭ ورتاق قۋانىشىمىز, ەلدىك مۇراتىمىزعا جەتكەندىگىمىزدىڭ بەلگىسى. 30 جىل بەكەر كەتكەن جوق. وسى ارالىقتا ۇلكەن جەتىستىكتەرگە جەتتىك. وسى قۋانىشپەن, جەڭىسپەن قالىڭ ەلدى قۇتتىقتاعىم كەلەدى», دەدى اقىن, مەملەكەتتىك سىيلىق يەگەرى نەسىپبەك ايت ۇلى.
ءوز كەزەگىندە ل.ن. گۋميلەۆ اتىنداعى ەۇۋ رەكتورى, نۇر-سۇلتان قالالىق ءماسليحاتىنىڭ دەپۋتاتى ەرلان سىدىقوۆ ەگەمەندىكتىڭ ەل دامۋىنداعى ماڭىزىنا توقتالىپ ءوتتى.
«اسا قىمباتتى قازاقستاندىقتار, سىزدەردى كەلە جاتقان ەڭ ۇلىق, قاسيەتتى مەرەكە – تاۋەلسىزدىگىمىزدىڭ 30 جىلدىق مەرەكەسىمەن شىن جۇرەكتەن قۇتتىقتايمىن! از ۋاقىتتىڭ ىشىندە سارىارقانىڭ تورىنەن قالا تۇرعىزىپ, تورتكۇل دۇنيەگە ەلىمىزدى بايان ەتتى, ايان ەتتى. بۇل تۇڭعىش پرەزيدەنتىمىزدىڭ ارقاسى ەكەنىن ايتۋىمىز كەرەك. شەكارا شەگەندەلدى, تاريح تۇگەندەلدى, رۋحىمىز كۇشەيىپ جاتقان جاعدايىمىز بار. ال ەندى سارىارقانىڭ تورىندە استانامىز – نۇر-سۇلتان قالاسى بوي كوتەرگەن بولسا, سول استانامىزدىڭ ءدال ورتاسىنان ەۇۋ ورىن الدى. از ۋاقىتتىڭ ىشىندە وقۋ ورنىمىز الەمدىك دارەجەدە ۇلكەن ورنىن الىپ, ءوسىپ كەلەدى. وسىنىڭ ءبارى از ۋاقىتتا قولجەتكەن تابىسىمىز. تابىسىمىزدى كۇشەيتە بەرەيىك! قازاقستان ماڭگى جاساي بەرسىن», دەدى ل.ن. گۋميلەۆ اتىنداعى ەۇۋ رەكتورى, نۇر-سۇلتان قالالىق ءماسليحاتىنىڭ دەپۋتاتى ەرلان سىدىقوۆ.
ال ايتىسكەر اقىن اسەم ەرەجەقىزى ەگەمەندىك جولىندا الاش ارىستارى ءوزىن قۇربان ەتكەنىن تىلگە تيەك ەتتى.
«اسا قادىرلى, قازاق ەلىنىڭ ازاماتتارى, بارشاڭىزدى ەل تاۋەلسىزدىگىنىڭ 30 جىلدىعىمەن شىن جۇرەكتەن قۇتتىقتايمىن! اتا-بابالارىمىز اڭساعان, الاش ارىستارى وسى جولدا ءوزىن قۇربان ەتكەن اياۋلى ازاتتىعىمىز ماڭگى بولسىن! تاتۋلىق پەن بىرلىك نەگىزىندە قۇرىلعان مەملەكەتىمىزدىڭ ساياسي-ەكونوميكالىق كۇش-قۋاتى ارتىپ, الەمنىڭ وزىق مەملەكەتتەرىنىڭ ساپىندا كورىنۋ ءناسىپ بولعاي! ەلىمىزدىڭ ىرگەسى امان بولىپ, ۇلى دالا توسىندە ماڭگىلىك بەيبىتشىلىك سالتانات قۇرسىن!» دەدى ايتىسكەر اقىن اسەم ەرەجەقىزى.
اكتەر داۋرەن سەرعازين تاۋەلسىزدىك جىلدارى مادەنيەت سالاسىنداعى جەتىستىكتەرگە توقتالىپ ءوتتى.
«قازاقستان رەسپۋبليكاسى تاۋەلسىزدىگىنىڭ 30 جىلدىعى قۇتتى بولسىن! ءبارىمىز ءسىز-ءبىز بولىپ اتا-بابامىزدىڭ ارماندارىنا ارقاۋ ەتىپ, سالىپ كەتكەن سارا جولىن ەسكە الىپ, كوپتەگەن جەتىستىككە جەتتىك. ءالى دە تالاي اسۋدى باعىندىرىپ, كوك تۋىمىزداعى التىن قىرانداي بيىكتە ءسوزسىز سامعارمىز. سوڭعى جىلدارى ەلىمىزدە كوپتەگەن مادەني وشاقتار, اسىرەسە تەاترلار اشىلدى. تەاتردىڭ اشىلۋى – مادەنيەتتىڭ وركەندەۋى, مەملەكەتتىڭ دامۋى. سول سەبەپتى وسىناۋ كەڭ بايتاق جەردە باقىتتى عۇمىر كەشىپ جاتىرمىن. بىرلىگىمىز مىعىم بولسىن! جاقسى كۇندەرىمىز كوپ بولسىن!», دەدى «جاستار» تەاترىنىڭ اكتەرى, قر ەڭبەك سىڭىرگەن قايراتكەرى داۋرەن سەرعازين.
