تۇڭعىش پرەزيدەنت بۇعان ء«بىز, قازاقستاندىقتار, ۇلت ورلەۋىنىڭ قازاق ءداۋىرىنىڭ نەگىزىن قالاۋشىلار مەن باستاۋشىلار بولدىق. بۇل ءبىزدىڭ اسىل ۋاقىتىمىزدىڭ جانە ءبىزدىڭ بارلىق ۇلى جەتىستىكتەرىمىزدىڭ ەڭ ءدال اتاۋى», دەپ باعا بەرگەن بولاتىن. ەلباسى «Egemen Qazaqstan» گازەتىندە جاريالانعان «تاۋەلسىزدىك تاعىلىمى» اتتى ماقالاسىندا دا تاۋەلسىزدىكتىڭ قالاي كەلگەنىنە ەگجەي-تەگجەيلى توقتالادى.
تاۋەلسىزدىك – ءاربىر ادامنىڭ, ۇلتتىڭ, حالىقتىڭ, ەلدىڭ ەركىندىگى. ءوز الدىنا دەربەستىگى, ەركىن ءارى باقىتتى كۇن كەشىپ جاتقان وتانى. الەمدە ءوز ءتىلى, ءدىنى, ءدىلى, سالتى مەن ءداستۇرى, عۇرپى, مادەنيەتى دامىعان, وعان قوسا ىشكى جانە سىرتقى ەكونوميكاسى قالىپتاسقان ەكى جۇزگە تارتا تاۋەلسىز مەملەكەت بار. سونداي-اق دەربەس تاۋەلسىزدىگى جوق قانشاما ۇلت جويىلۋ الدىندا تۇر. ءبىر سوزىندە تۇڭعىش پرەزيدەنتىمىز «بۇگىنگى كۇندى ءتۇسىنىپ-ءتۇيسىنۋ ءۇشىن دە, بولاشاقتىڭ ديدارىن كوزگە ەلەستەتۋ ءۇشىن دە كەشەگى كەزەڭگە كوز جىبەرۋىمىز كەرەك», دەگەن ەدى.
بۇگىنگى بەيبىت كۇننىڭ كەپىلى بولعان ەل ەگەمەندىگىنە جەتۋ ءۇشىن بابالارىمىز سان عاسىرلار بويى كۇرەسىپ, قاسيەتتى جەرىمىزدى بىزگە مۇرا ەتىپ قالدىردى. تاۋەلسىزدىك ازاپ پەن ءتوزىمنىڭ, ەركىندىكتى اڭساعان شىدامنىڭ وتەۋى بولدى. قازاقستاننىڭ تاۋەلسىز, ەگەمەندى ەل رەتىندە تانىلعانىنا مىنە شيرەك عاسىردان استى. تاۋەلسىزدىك ۇلتتىق مەرەكەسىن بۇگىنگى تاڭدا قازاق حالقى جۇرەگىمەن سەزىنەتىن جاعدايعا جەتتى. بەيبىت ەلدىڭ ەڭ باستى جەتىستىگى ۇلتارالىق تاتۋلىق پەن بەرەكە-بىرلىك ەكەنى ءسوزسىز. بۇل ۇلى كۇندى كەلەر ۇرپاقتىڭ ساناسىنا ءسىڭىرىپ, باقىتتى ەلدە ءومىر ءسۇرىپ جاتقاندارىن باعالاۋعا ۇيرەتۋ كەرەك.
ەل تاۋەلسىزدىگىنىڭ 30 جىلدىعىندا ءبىزدىڭ جەتكەن جەتىستىگىمىز ۇشان-تەڭىز. ءوزىمىزدىڭ بەلگىلەنگەن شەكارامىز, ءدىنىمىز بەن ءتىلىمىز, مەملەكەتتىك رامىزدەر مەن ۇلتتىق قۇندىلىقتارىمىز, مادەنيەت پەن سالت-ءداستۇرىمىز بار تاۋەلسىز زايىرلى ەلگە اينالدىق. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ اتاپ وتكەندەي: «تاۋەلسىزدىك – بۇل ءبىزدىڭ باستى قۇندىلىعىمىز, ول بارىنەن قىمبات! ءبىزدىڭ مىندەتىمىز – وركەندەگەن جانە قۋاتتى قازاقستاندى بولاشاق ۇرپاققا مۇرا ەتىپ قالدىرۋ». بۇگىنگى زامان ءبىلىمنىڭ, جاڭا وركەنيەتتىڭ زامانى. ءبىلىمدى ۇرپاقتىڭ تىڭ ويلارى مەن جوبالارى ەلىمىزدىڭ جاڭا بەلەسكە شىعۋىنا جول سالادى. ەگەمەندى ەلىمىزدىڭ كوك تۋىن جەلبىرەتىپ, ەلىمىزدىڭ بولاشاعى ءۇشىن ايانباي ەڭبەك ەتۋ باستى پارىزىمىز دەپ بىلەمىن.
ەرلان داكەنوۆ,
نۇر-سۇلتان قالالىق ءماسليحاتىنىڭ دەپۋتاتى,
ە.راحماديەۆ اتىنداعى مەملەكەتتىك اكادەميالىق
فيلارمونيانىڭ باس ديرەكتورى
