ءىس-شاراعا قالا اكىمى مۇرات ايتەنوۆ, ءماسليحات حاتشىسى باحادىر نارىمبەتوۆ, حالىقارالىق «الاش» ادەبي سىيلىعىنىڭ لاۋرەاتى, جازۋشى مارحابات بايعۇت, «پاراسات» وردەنىنىڭ يەگەرى ءحانبيبى ەسەنقاراقىزى, قوعام قايراتكەرىنىڭ ۇرپاقتارى مەن عالىمدار, تاعى باسقا زيالى قاۋىم وكىلدەرى قاتىستى.
كومپوزيتسيالىق ءمۇسىننىڭ قالا ورتالىعىندا بوي كوتەرۋىنە ىقپال ەتكەن قالا اكىمى مۇرات ايتەنوۆ قۇتتىقتاۋ ءسوز سويلەپ, ءىس-شارانىڭ ماڭىزدىلىعىنا توقتالدى. «مەملەكەت جانە قوعام قايراتكەرى وزبەكالى جانىبەكوۆتىڭ ۇلت رۋحانياتىن كوتەرۋدەگى ورنى ايرىقشا. عالىم-ەتنوگراف مادەنيەت مينيسترلىگىندە جاۋاپتى قىزمەت اتقارعان جىلدارى ەلىمىزدە 400-گە جۋىق ارحەولوگيالىق نىسان قالپىنا كەلتىرىلگەنىن جاقسى بىلەمىز. تاريحىمىزدى تانىپ, رۋحانياتىمىزدى بىلۋگە ۇلكەن وزگەرىستەر جاسالدى. بۇل وزبەكالى جانىبەكوۆتىڭ ۇلت قايراتكەرى, وتانشىل ازامات رەتىندەگى تۇلعاسىن كورسەتەدى. مەملەكەتىمىزدىڭ ماڭىزدى تاريحي بەلەسى – تاۋەلسىزدىگىمىزدىڭ 30 جىلدىعى قارساڭىندا اشىلعان بۇل ەسكەرتكىش بۇگىنگى ۇرپاقتىڭ ۇلت ازاماتىنا كورسەتكەن زور قۇرمەتى دەپ بىلەمىن», دەدى قالا اكىمى. شىمكەنت قالاسىنىڭ ورتالىق ساياباعىنا ورناتىلعان شاعىن ساۋلەت ءمۇسىنى ءو.جانىبەكوۆتىڭ 90 جىلدىق مەرەيتويىنا ارنالىپ وتىر. سونداي-اق قالانىڭ «ادەت-عۇرىپ جانە سالت-ءداستۇر ورتالىعىندا» قوعام قايراتكەرىنىڭ ءومىر جولىن باياندايتىن «دارا» اتتى دەرەكتى ءفيلمنىڭ تۇساۋى كەسىلدى. فيلمدە قايراتكەردىڭ ومىرلىك پوزيتسياسى, ۇلتتىق يدەولوگيانىڭ نەگىزىن قالاۋداعى وي-پىكىر ۇستانىمى, قازاقتىڭ ءومىر-سالتى مەن بولمىس-ءبىتىمى, دۇنيەتانىمىن تۇبەگەيلى زەرتتەپ, قايتا جاڭعىرتۋ جولىنداعى ىزدەنىستەرى, كوپتەگەن ەڭبەكتەرى سارالانادى.
سونداي-اق بۇل كۇنى قازاق تەاترىنىڭ تۇڭعىش رەجيسسەرى جۇمات شانينگە ارنالعان ەسكەرتكىش اشىلدى. شىمكەنت تەاترى جۇمات شانين ەسىمىن 1972 جىلى يەلەندى. اراعا 50 جىل سالىپ, تەاتر الدىنا قايراتكەردىڭ ەڭسەلى ەسكەرتكىشى تۇعىرعا قوندى. «قازاق تەاتر ونەرىنىڭ ۇستازى بولعان تۇلعانىڭ عيبراتتى عۇمىرى مەن مول مۇراسى – حالقىمىزدىڭ اسىل قازىناسى. جۇمات شانينگە قۇرمەت كورسەتۋ ارقىلى ءبىز مادەنيەت قايراتكەرلەرىنە قۇرمەت كورسەتەمىز. ۇلت تاريحىنداعى العاشقى كاسىبي تەاتر مامانىنىڭ ومىرلىك تانىمى – وسكەلەڭ ۇرپاقتىڭ بوي تۇزەر باعىتى بولاتىنىنا سەنىمدىمىن», دەدى قالا اكىمى ەسكەرتكىشتىڭ اشىلۋ سالتاناتىندا. جۇمات شانين اتىنداعى اكادەميالىق قازاق دراما تەاترى الدىنا ورناتىلعان ەسكەرتكىشتىڭ بيىكتىگى تۇعىرىمەن قوسقاندا 5 مەترگە جۋىقتايدى. اۆتورى – مادەنيەت قايراتكەرى, سۋرەتشىلەر وداعىنىڭ مۇشەسى ءابدۋاحات مۇراتباەۆ.
شىمكەنت
