ارداگەر. زاڭگەر. ۇستاز

الىمساقتان ايتىلاتىن اكسيوما: ومىرگە ادامنىڭ ءبارى بىردەي بولىپ كەلەدى. الايدا, «ۇيادا نە كورسەڭ ۇشقاندا سونى ىلەرسىڭ» دەمەكشى, وتباسىندا اتا-انادان العان ءتالىم-تاربيەسىنە, وسكەن ورتاسىنا, العان بىلىمىنە, تاڭداعان كاسىپ-ماماندىعىنا قاراي ارقانداي ازامات بولىپ قالىپتاسادى. ال, ەلگە سىڭىرگەن ەڭبەگىنە, جاساعان قىزمەتىنە قاراي ابىرويعا يەلەنىپ, سىي-قۇرمەتكە بولەنەدى. ايگىلى قاز داۋىستى قازىبەك ءبيدىڭ: «ەردەن ەردىڭ نەسى ارتىق – ەپتەستىرگەن ءىسى ارتىق» دەگەن قاناتتى ءسوزى وسىندايدان قالسا كەرەك. ادامزات تاريحىنداعى كىشىسىنەن ۇلكەنىنە دەيىن ۇلى تۇلعالاردىڭ ءبارى سونداي ۇلگىلى-ونەگەلى ىستەرىمەن كوزگە ءتۇسىپ, ايرىقشا باعالانىپ, حالىقتىڭ جادىندا قالعان. ءتىپتى, دانىشپان ابايدىڭ: «تەگىندە ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزادى. ودان باسقا نارسەلەرمەن وزدىم عوي دەۋدىڭ ءبارى دە – اقىماقشىلىق» دەۋى دە تەرەڭ ويدى مەڭزەيدى. بۇل از دەسەڭىز, كەزىندە ءوزى­مىز قۇلاي وقىعان فيلوسوف كارل ماركستىڭ «ادامنىڭ ءمانى قوعامدىق قاتىناس ارقىلى ايقىندالادى» دەگەنى بار. مىنە, وسىنداي كوڭىلگە ءنار بە­رىپ, كوكەيگە جىلىلىق ۇيالاتاتىن, قيالعا قانات بىتىرەتىن سوزدەردى بۇگىندە جەتپىس دەيتىن بەلەستى جاس­قا كەلىپ, قوعامىمىزعا, مەملە­كەتىمىزگە سىڭىرگەن ەڭبەگىڭمەن ەلە­نىپ, قۇرمەتكە بولەنىپ وتىرعان رەسپۋبليكاعا تانىمال زاڭگەر, پرو­كۋراتۋرا سالاسىنىڭ ارداگەرى, اتپال ازامات بولات اجاقاي ۇلى سەمبينگە ارناۋعا بولادى. مەن بوكەڭدى بۇرىن سىرتتاي ەستىگەنىم بولماسا اسا كوپ تەرەڭىرەك بىلمەۋشى ەدىم. جاقىنىراق تانىس-ءبىلىس بولۋىمىز رەسپۋبليكانىڭ باس پروكۋراتۋراسىندا بىرگە قىزمەتتەس بولۋىمىزدان باستالدى. ول كىسى باس پروكۋروردىڭ كادرلار جۇمىسى جونىندەگى ورىنباسارى بولدى دا, مەن سونداعى قۇقىقتىق اقپارات دەيتىن باسقارمانى باسقاردىم. بۇل تاۋەلسىزدىك العانىمىزعا بەس جىلداي ۋاقىت بولىپ, ەتەك-جەڭىمىزدى جيىپ, ەگەمەندى ەل بول­عاندىقتان وزگە سالالار سياقتى سوت پەن پروكۋراتۋرا, بارلىق قۇقىقتىق سالادا وزگەرىستەر مەن رەفورمالار جۇرگىزىلە باستاعان وتپەلى كەزەڭ بولاتىن. سوندىقتان دا, باس پروكۋراتۋرانىڭ دا الدىندا سالانى قالىپتاستىرىپ, نىعايتۋ, دامىتۋ باعىتىندا قىرۋار شارۋالاردى اتقارىپ, جۇزەگە اسىرۋ مىندەتى تۇردى. وسىندايدا ەسكە تۇسەدى. ەلى­مىز ءوزىنىڭ ەگەمەندىگىن جاريا­لاعاننان كەيىن ىلە-شالا 1992 جىلى العاش پروكۋراتۋرا تۋرالى زاڭ قابىلداندى. قازاق­ستان رەسپۋبليكاسىنىڭ 1993 جىلى قابىلدانعان تۇڭ­عىش كونستيتۋتسياسىندا پروكۋ­را­­­تۋرانىڭ قىزمەتى مەن مىندەتى اي­قىندالدى. رەسپۋبليكا پرەزي­دەنتىنىڭ 1994 جىلعى 14 اقپانداعى № 1469 قاۋلىسىمەن قازاقستان رەسپۋبليكاسىنداعى قۇقىقتىق رەفورمانىڭ مەملەكەتتىك باعدار­لاماسى بەكىتىلىپ, وندا زاڭنامانىڭ دامۋىنىڭ, سوت جۇيەسىنىڭ سون­داي-اق, بۇكىل قۇقىق قورعاۋ ورگان­دارىنىڭ, ونىڭ ىشىندە پروكۋ­راتۋرانىڭ دا رەفورماسىنىڭ نەگىز­گى باعىتتارى بەلگىلەندى. 1995 جىلى زامان تالابى­نا قاراي, ەلىمىزدىڭ ساياسي-ەكونومي­كالىق جانە الەۋمەتتىك دامۋىنا ساي كەلەتىن جاڭا كونستيتۋتسيا قابىلداندى. وسى اتا زاڭنىڭ 83-بابىنىڭ 1-تارماعىندا ورنى مەن ءمان-ماڭىزى ەرەكشە اتالىپ ءوتىلدى. وسىعان بايلانىستى سول 1995 جىلدىڭ 21 جەلتوقسانىندا «قا­زاقستان رەسپۋبليكاسىنىڭ پروكۋراتۋراسى تۋرالى» زاڭ قابىلدانىپ, كۇشىنە ەندى. دەمەك, العاشقى كەزەڭنىڭ وزىندە ەلىمىزدىڭ پروكۋراتۋرا ورگانى دا بىرنەشە رەفورما مەن جەتىلدىرۋدى باستان كەشىرىپ, ايتارلىقتاي دامۋ ساتىلارىنان ءوتتى. وسىناۋ قيىن كەزەڭدە رەسپۋب­ليكا باس پروكۋراتۋراسىنىڭ اپپاراتىندا جاۋاپتى قىزمەت اتقار­عاندىقتان بولات اجاقاي ۇلى سول رەفورمالىق وزگەرىستەردىڭ باسى-قاسىندا ءجۇردى. وعان ءوزىنىڭ لايىقتى ۇلەسىن قوستى. بوكەڭ باس پروكۋروردىڭ ورىنباسارى رەتىندە ءبىزدىڭ باسقارماعا تىكەلەي باسشىلىق جاسادى. ونى­مەن جاقسى سىيلاستىق جانە ءتۇسى­نىستىكپەن قويان-قولتىق جۇمىس ىستەدىك. سوندا بايقاعانىم, ول جوعارى باسشىلاردىڭ الدىندا وزا شاۋىپ, كوزگە ءتۇسىپ قالۋعا تىرىس­پايدى. بايسالدى دا بىرتوعا. ءاربىر ىسكە بايىپپەن, تياناقتىلىقپەن قارايدى. قاراماعىنداعىلارعا دا داۋىس كوتەرىپ ۇرىسپايدى. اركىمگە اتقارىپ وتىعان قىزمەتىنە, قابىلەت-قارىمىنا قاراي تاپسىرما بەرىپ, ونىڭ ورىندالۋىن قاداعالايدى. سول ءۇشىن دە ونى ارىپتەستەرى سىيلاپ, قۇرمەتتەيدى. ءالى ەسىمدە, ءبىز بوكەڭمەن اقىل­­داسا وتىرىپ, 1997 جىلى باس پروكۋراتۋرانىڭ بۇعان دەيىن بولماعان ءوزىنىڭ دەربەس, قۇقىقتىق جۋرنالىن شىعاراتىن بولدىق. كوتەرەتىن ماسەلەسىنە, تاقىرىبىنا ساي وعان «زاڭ جانە زامان» دەگەن ات قويدىق. بۇل ايتۋعا وڭاي دا, جەمە-جەمگە كەلگەندە وزىندىك قيىندىعى بار شارۋا بولاتىن. دەگەنمەن, جۋرنالدىڭ رەداكتسيا­سىن ۇيىمداستىرىپ, شتاتىن بەل­گىلەپ, قاراجاتتىق-ماتەريالدىق ماسەلەلەرىن شەشۋدە بولات اجا­قاي ۇلى بىزگە كوپ قولداۋ مەن كومەك كورسەتتى. ءسويتىپ, سول جىلدىڭ مامىر ايىنان «زاڭ جانە زامان» جۋرنالى جارىق كورە باستادى. مۇنى رەسپۋبليكاداعى پروكۋراتۋرا قىز­مەتكەرلەرى ۇلكەن قۋانىشپەن قارسى الدى. ويتكەنى, مۇنداي ارنايى باسىلىمنىڭ ومىرگە كەلۋى ولارعا ءوز سالالارى بويىنشا كو­كەيدە جۇرگەن وزەكتى ماسەلەلەردى كوتەرىپ, ورتاعا سالىپ, ءبىر-بىرىمەن پىكىرلەسىپ, تاجىريبە بولىسۋىنە جول اشىپ, اقپاراتتىق تۇرعىدان مول مۇمكىندىك بەردى. سودان بەرى دە ون جەتى جىلعا جۋىق ۋاقىت ءوتتى. بۇگىندە «زاڭ ءجا­نە زامان» جۋرنالى قالىپتاسقان, وزىندىك باعىت-باعدارى بار, پروكۋراتۋرا قىزمەتكەرلەرى عانا ەمەس, قۇقىقتىق-زاڭنامالىق تاقىرىپقا قىزىعاتىن باسقا دا وقىرماندار جازدىرىپ الىپ وقيتىن ايتۋلى باسىلىمعا اينالعان. بولات اجاقاي ۇلى پروكۋرورلىق قاداعالاۋدى جۇزەگە اسىرۋمەن قاتار, پروكۋرورلاردىڭ بىلىكتىلىگىن ارتتىرۋ جۇمىستارىنا دا قاتتى كوڭىل ءبولىپ وتىردى. ب.ا.سەمبيننىڭ باسشىلىعىمەن 1992 جىلى باس پروكۋراتۋرانىڭ وقۋ ورتالىعى بازاسىندا العاش رەت پروكۋراتۋرا ورگاندارى كادرلارىنىڭ بىلىكتىلىگىن ارتتىرۋ ينستيتۋتى قۇرىلدى. 1997 جىلى پروكۋراتۋرا ورگاندا­رى كادرلارىنىڭ بىلىكتىلىگىن ارتتىرۋ ينستيتۋتى قازاقستان رەس­پۋبليكاسى باس پروكۋراتۋراسى جانىنداعى زاڭدىلىق, قۇقىق ءتارتىبىن زەرتتەۋ جانە پروكۋراتۋرا كادرلارىنىڭ بىلىكتىلىگىن ارتتىرۋ ينستيتۋتى بولىپ قايتا قۇرىلدى. «ءبارىن كادر شەشەدى» دەمەكشى, قاي سالادا دا كادرلىق قۇرامنىڭ ساپاسى, ولاردىڭ بىلىكتىلىگى مەن كاسىپتىك دەڭگەيى ايتارلىقتاي ءرول اتقارادى. سول ءبىر جىلدارى بولات اجاقاي ۇلى باس پروكۋروردىڭ كادر­لار جۇمىسى جونىندەگى ورىنباسارى بولا ءجۇرىپ, پروكۋراتۋرا سالاسىنا ءبىلىمدى, دايىندىعى مول زاڭگەر مامانداردى تارتۋ, بۇرىننان قىزمەت ىستەپ جۇرگەندەرىن ەڭبەگىنە, تاجىريبەسىنە, كاسىپقويلىق دەڭگەيىنە قاراي ءوسىرىپ, جوعارىلاتىپ وتىرۋ باعىتىندا قىرۋار جۇمىستار ات­قاردى. تالاي تالاپتى جاستارعا, بىلىكتى ماماندارعا قولداۋ كورسەتىپ, شاراپاتىن تيگىزدى. ەلىمىزدىڭ تۇك­پىر-تۇكپىرىندە جاۋاپتى جانە باس­شىلىق قىزمەتتەر اتقاراتىن ولاردىڭ قاي-قايسىسى دا بوكەڭنىڭ ەسىمىن جىلى­لىقپەن ەسكە الىپ, العىستارىن ايتىپ وتىرادى. قىتايدىڭ ۇلى ويشىلى كون­فۋتسي: «ادام قانشا جەردەن وقىپ-توقىسا دا ءوزىنىڭ تەگىنەن, تابيعاتى مەن بولمىسىنان الىس كەتپەيدى» دەيدى. سول ايتقانداي, بوكەڭنىڭ بويىنداعى اقىل-پاراسات پەن ادامي اسىل قاسيەتتەردىڭ نەگىزى اتا-انادان دارىعان قان مەن سۇتتەن, ءتالىم-ءتار­بيەدەن باستاۋ ال­سا كەرەك. جاقىن تانىسا كەلگەندە ءبىل­گەنىم, بوكەڭنىڭ اكەسى دوندا اقساقال جامبىل وبلىسىنىڭ سارىسۋ اۋدانىندا ۇستازدىق ەتىپ, ۇزاق جىلدار وقۋ-اعارتۋ سالاسىندا ابىرويلى دا جەمىستى قىزمەت اتقارىپتى. سوندا دوندا سەمبين اتىندا ورتا مەكتەپ بار كورىنەدى. وسىنداي اعارتۋشى-ۇستازدىڭ وتباسىندا دۇنيەگە كەلىپ, ءتالىم-تاربيە العان بولات 1960 جى­لى مەكتەپتى بىتىرگەن سوڭ ءوزىنىڭ تۋعان جەرىندەگى كالينين اتىنداعى كەڭشاردا ءۇش جىلداي مەحانيزاتور بولىپ جۇمىس ىستەگەن. اسكەر قاتارىندا بولىپ, ازاماتتىق بورىشىن دا وتەپ, وڭى-سولىن تانىپ بارىپ, زاڭگەرلىك ماماندىقتى تاڭداعان. 1969 جىلى سول كەزدەگى س.م. كيروۆ اتىنداعى كازاق مەملەكەتتىك ۋنيۆەرسيتەتىنىڭ زاڭ فاكۋلتەتىن ويداعىداي بىتىرگەن سوڭ ارنايى جولدامامەن تالدىقورعان وبلىسى, گۆارديا اۋدانى پروكۋرورىنىڭ كومەكشىسى ەتىپ جىبەرىلگەن. ءوزىنىڭ ىسكەرلىگىمەن, كاسىپ-ماماندىعىنىڭ قىر-سىرىن مەڭ­گەرۋگە دەگەن ۇمتىلىس-تالابىمەن كوزگە تۇسكەن بولاتتى سول جىلى-اق وبلىس پروكۋرورى اۋدان پرو­كۋ­راتۋراسىنىڭ تەرگەۋشىسى قىز­مەتىنە وسىرەدى. سەنىم ارتۋ بار دا, ونى اقتاي ءبىلۋ بار. سونداي سەنىمدى ابىرويمەن اقتاي بىلگەن ب.سەمبين كوپ ۇزاماي, ياعني 1972 جىلى كيروۆ اۋدانىنىڭ پروكۋرورى قىزمەتىنە تاعايىندالادى. اۋدان پروكۋرورى بولىپ ب.سەمبين توعىز جىل بويى ابىرويلى قىزمەت اتقارادى. 1981 جىلعى قاراشادان باستاپ 1985 جىلعى مامىر ايىنا دەيىن ب.سەمبين تورعاي وبلىسى پروكۋرورىنىڭ ورىنباسارى. 1985 جىلعى مامىر ايىنان باستاپ 1988 جىلدىڭ قىركۇيەك ايىنا دەيىن قاراعاندى وبلىسى پروكۋرورىنىڭ ءبىرىنشى ورىنباسارى بولىپ قىزمەت اتقارادى. 1987 جىلعى مامىر ايىندا تورعاي وبلىسىنىڭ پروكۋرورى بولىپ تاعايىندالدى. 1988 جىلى تامىز ايىندا الماتى كولىك پروكۋرورى قىزمەتىنە اۋىسادى. 1990 جىلى تامىز ايىندا قازاق كسر پروكۋرورىنىڭ ورىنباسارى, 1992 جىلى قاڭتار ايىندا قازاقستان رەسپۋبليكاسى پروكۋرورىنىڭ ورىنباسارى – قازاق كولىك پروكۋرورى قىزمەتىنە تاعايىندالدى. 1993 جى­لى تامىز ايىندا قازاقستان رەس­پۋبليكاسى باس پروكۋراتۋراسى كادر باسقارماسىنىڭ باستىعى, 1995 جى­لى قازاقستان رەسپۋبليكاسى باس پروكۋرورىنىڭ ورىنباسارى, 1997 جىلى تالدىقورعان وبلىسىنىڭ پروكۋرورى بولىپ جەمىستى قىزمەتتەر اتقاردى. مۇنىڭ ءبارىن مەن نەگە تىزبەلەپ ايتىپ وتىرمىن. «تالاپتىعا نۇر جاۋار» نەمەسە «ءوزى جاقسى ادامعا ءبىر كىسىلىك ورىن بار», دەيدى. كەز كەلگەن ادامنىڭ ءوسىپ-وركەندەۋى, جاۋاپتى قىزمەتتەرگە جوعارىلاتىلۋى وزىنە – تالابىنا, ۇمتىلىسىنا بايلانىستى. بولات اجاقاي ۇلىنىڭ ءومىربايانى, ەڭبەك جولى وسىنى ءدا­لەلدەپ تۇرعانداي. وعان قوسا, ونىڭ ءومىر جولى, قىزمەتتىك بايانى بۇگىنگى ۇرپاققا ۇلگى-ونەگە بولارلىقتاي. قۇرمەتتى دەمالىسقا شىققان­نان كەيىن دە  ب.سەمبين قول قۋسى­رىپ قالعان جوق. بىلىكتى زاڭگەردىڭ كوپ جىلدىق باي تاجىريبەسى ەسكەرىلىپ, ادىلەت ورگاندارىنا جۇ­مىسقا شاقىرىلدى. 1998 جىلى الماتى قالاسى ادىلەت باسقار­ماسىنىڭ سوت ورىنداۋشىلارى دەپارتامەنتىنىڭ ديرەكتورى قىز­مەتىنە تاعايىندالىپ, وندا ەكى جىلداي جەمىستى قىزمەت اتقاردى. پروكۋرورلىق-تەرگەۋشىلىك ءتا­­­­جى­ريبەسى مول ب.سەمبين ەندىگى ءبىر مەزەت ءوزىنىڭ ءومىرىن عىلىمي-وقى­تۋشىلىق قىزمەتكە ارنادى. بۇل باعىتتا دا بولات اجاقاي ۇلى ەلەۋلى جەتىستىك-تابىستارعا جەتىپ, قۇقىقتانۋشى عالىمدار اراسىندا زور قۇرمەتكە يە بولدى. ب.سەمبين 2000 جىلى ل.ن. گۋ­ميلەۆ اتىنداعى ەۋرازيا ۇلت­تىق ۋنيۆەرسيتەتتە ينستيتۋت ديرەك­تورىنىڭ ورىنباسارى قىز­مەتىنە تاعايىندالدى. اتالعان ۋنيۆەرسيتەتتە ب.سەمبيننىڭ قاتىسۋىمەن بىرقاتار وڭدى جانە ماڭىزدى ءىس-شارالار جۇزەگە اسىرىلدى جانە ول عىلىمي-وقى­تۋشىلىق قىزمەتتە دە ءوزىن كاسىپقوي مامان رەتىندە كورسەتە ءبىلدى. سونىڭ ناتيجەسىندە, بولات اجاقاي ۇلى 2000 جىلى استانا قالاسىندا ەندى اشىلعان قازاق گۋمانيتارلىق زاڭ ۋنيۆەرسيتەتىنىڭ پرورەكتورى قىزمەتىنە شاقىرىلدى. 2001 جىلى اتالعان وقۋ ورنىنىڭ ۇلتتىق قۇقىق جانە ساياساتتانۋ ينستيتۋتىنىڭ ديرەكتورى بولدى. وسى كەزەڭدە قازاق گۋمانيتارلىق زاڭ ۋنيۆەرسيتەتىنە ەلىمىزگە تانىمال عالىم وقىتۋشىلار جۇمىسقا شاقىرىلىپ, وقۋ ورنىنىڭ پرو­­فەسسورلىق-وقىتۋشىلىق قۇ­رامىنىڭ ساپاسى ارتىپ, ستۋدەنتتەر ءبىلىمىنىڭ دەڭگەيى كوتەرىلدى. العاشقى جىلدارى جاڭا وقۋ ورنىنىڭ جۇمىسىن ۇيىمداستىرۋ كەزىندە ورىن العان قيىندىقتارعا قاراماستان, قازاق گۋمانيتارلىق زاڭ ۋنيۆەرسيتەتى از ۋاقىت ىشىندە ەلىمىزدىڭ جەتەكشى زاڭ وقۋ ورنىنا اينالدى. ب.سەمبين 2003-2008 جىلدارى قازاق گۋمانيتارلىق زاڭ ۋنيۆەرسيتەتىنىڭ قىلمىستىق سوت ءىسىن جۇرگىزۋ جانە كريميناليستيكا كافەدراسىنىڭ مەڭگەرۋشىسى قىزمەتىن اتقاردى. كافەدرا مەڭ­گەرۋشىسى رەتىندە كافەدرا ۋنيۆەرسيتەتتە عانا ەمەس, ەلىمىزدەگى ۇزدىك كافەدرا قاتارىندا بولدى جانە عىلىمي باعىتتا بىرقاتار جاڭا جەتىستىكتەرگە جەتتى. 2008 جىلدان قازىرگە دەيىن قازاق گۋمانيتارلىق زاڭ ۋنيۆەرسيتەتى ديرەكتورلار كەڭەسىنىڭ توراعاسى. ب.سەمبين 2000 جىلدان بەرى تەك اكىمشىلىك-باسشىلىق قىز­مەتتەرمەن قوسا, عىلىمي-وقى­تۋشىلىق قىز­مەت­­پەن اينالىسىپ كەلەدى. ول ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ, قازاق گۋمانيتارلىق زاڭ ۋني­ۆەرسيتەتىنىڭ قىلمىستىق ءىس ءجۇر­گىزۋ جانە كريميناليستيكا كافە­دراسىنىڭ پروفەسسورى. پروكۋرورلىق-تەرگەۋ, اكىمشىلىك-باسشىلىق جانە عىلىمي-وقىتۋ­شىلىق قىزمەتتەردەن باسقا بولات اجاقاي ۇلى مەملەكەتتىك جانە قوعامدىق قىزمەتتەرمەن دە اينالىستى. ب.سەمبين 1973 جىلدان 1981 جىلعا دەيىن تالدىقورعان وبلىسى گۆارديا اۋداندىق حالىق دەپۋتاتتارى كەڭەسىنىڭ دەپۋتاتى, 1987-1988 جىلدارى تورعاي وبلىستىق حالىق دەپۋتاتتارى كەڭە­سىنىڭ دەپۋتاتى بولىپ سايلاندى. ب.سەمبيننىڭ قاجىرلى دا ەلەۋلى ەڭبەكتەرىن مەملەكەت ەسكە­رىپ, 1986 جىلى «قۇرمەت بەلگىسى» وردەنىمەن جانە «قازاقستان رەس­پۋبليكاسى تاۋەلسىزدىگىنىڭ 20 جىل­دىعى» مەدالىمەن ماراپاتتالدى جانە 2002 جىلى 16 جەلتوقساندا قازاقستان رەسپۋبليكاسى پرەزي­دەنتىنىڭ العىسىن الدى. ب.سەمبينگە 1990 جىلى «3 سىنىپتى مەملەكەتتىك ادىلەت كەڭەس­شىسى» دەگەن جوعارى سىنىپتىق شەن بەرىلدى. 1990 جىلى «قازاقستان رەسپۋب­ليكاسى پروكۋراتۋراسىنىڭ قۇرمەت­تى قىزمەتكەرى» بەلگىسىمەن ماراپاتتالدى. يماندىلىق ادامنىڭ اجارىن اشىپ, ابىرويىن وسىرەدى. جا­نىنا ىزگىلىك نۇرىن قۇيادى. اتا ءدىنىمىز يسلامعا دەگەن قۇرمەت پەن ادالدىقتى پارىز ساناعان بوكەڭ كۇللى مۇسىلمان قاۋىم ءۇشىن قاسيەتتى مەكەن سانالاتىن مەككە مەن مادينەگە ساپار شەگىپ, قاجى اتانىپ قايتتى. بۇكىل سانالى عۇمىرىن, تالانتى مەن قابىلەت-قارىمىن, كۇش-جىگەرىن زاڭدىلىق پەن قۇقىق قورعاۋ سالاسىنا ارناپ, جەمىستى قىزمەت ەتكەن پروكۋراتۋرا ارداگەرى, ۇلاعاتتى زاڭگەر, ۇستاز-عالىم بولات اجاقاي ۇلىنا الداعى ۋاقىتتا دا مىقتى دەن­ساۋلىق, ۇزاق ءومىر, وتباسىندا ىن­تىماق پەن بەرەكە-بىرلىك تىلەگىمىز كەلەدى. بوكەڭنىڭ بويىنداعى ىزگى قاسيەتتەر, ول اتقارعان يگىلىكتى ىستەر ۇرپاعىمەن جالعاسىن تاپسا ەكەن دەيمىز. سوندا عانا ءبىز ۇلتتىق رۋحى وشپەگەن, ساباق­تاستىقتان, سالت-داستۇردەن اينىماعان «ماڭگىلىك ەل» بولىپ قالامىز. بەكەت تۇرعاراەۆ, قازاقستان رەسپۋبليكاسىنىڭ ەڭبەك سىڭىرگەن زاڭگەرى, زاڭ عىلىمدارىنىڭ دوكتورى, پروفەسسور.