قازاق قىزىنىڭ پاريجدەگى جەڭىسى

الماتىلىق مەكتەپ وقۋشىسى ماليكە بەكتۇروۆا فرانتسيا استاناسىنداعى سكريپكاشىلار سايىسىندا تالعامپاز قاۋىمدى تاڭعالدىردى سكريپكاشىلاردىڭ الەك­ساندر گلازۋنوۆ اتىنداعى سەگىزىنشى حالىقارالىق كونكۋرسىنا انگليا, بەلگيا, گرۋزيا, قازاقستان, قىتاي, لاتۆيا, وزبەكستان, فرانتسيا جانە وڭتۇستىك كورەيا سياقتى ەلدەردەن ەلۋگە جۋىق تالاپكەر كەلىپ, پاريج كونسەرۆاتورياسىنىڭ ۇلكەن كونتسەرتتىك زالىن كۇي-دۋمانعا بولەدى. قازاقستاندىق سكريپكا ونەرىنىڭ وكىلدەرى وسىناۋ كىرپياز بايقاۋعا العاش قاتىسىپ تۇرسا دا, ولاردىڭ سيقىرلى اسپاپتاعى قۇيقىلجىعان ويىنى ەۋروپالىق كلاسسيكالىق مۋزىكا بىلگىرلەرىن بىردەن باۋراپ الدى. بەدەلدى جيۋري ءبىرىنشى ورىن­­­دى كۇلاش بايسەيىتوۆا اتىنداعى رەسپۋبليكالىق مامان­­­داندىرىلعان مۋزىكا مەكتەبىنىڭ 6-سىنىپ وقۋشىسى ماليكە بەكتۇروۆاعا بەرۋدى ءبىراۋىزدان ۇيعاردى. وسى مەكتەپتىڭ 10-سىنىپ وقۋشىسى نارگيز ما­مەدوۆا جۇلدەلى ءۇشىنشى ورىننىڭ ديپلومىمەن ماراپاتتالدى. ايتا كەتسەك, ماليكە بەك­تۇ­روۆا بۇدان بۇرىن دا استانا مەن الماتىدا وتكەن بىرقاتار حالىقارالىق كونكۋرستاردىڭ لاۋرەاتى اتانعان ەدى. بالعىن جاس سكريپكاشى ۇلكەن ساحناعا العاش رەت 7 جاسىندا شىعىپ, سول كەزدىڭ وزىندە كۇردەلى بىرنەشە كومپوزيتسيالاردى ءمىنسىز ورىنداپ, ءوز شەبەرلىگىمەن وتاندىق مەترلەردى عانا ەمەس, سونىمەن بىرگە, پ.ي.چايكوۆسكي اتىنداعى ماسكەۋ كونسەرۆاتورياسىنىڭ پروفەسسورى ۆلاديسلاۆ يگو­لينسكيدى دە سۇيسىندىرگەن بولاتىن. سكريپكا بويىنشا ۇستاز قۇرالاي احمەتوۆانىڭ ايتۋىنشا, وسى جولى فرانتسۋزدىق ماەس­ترولار – ءپاريجدىڭ جوعارى مۋزىكا مەكتەبى وقىتۋشىلارىنىڭ تاڭدانۋىنا تۋرا كەلگەن. ءما­­ليكەنىڭ پەسالاردان, ەتيۋدتەر مەن كونتسەرتتىك سولولاردان تۇراتىن ۇلكەن باعدارلامانى تاماشا ورىنداعانى سونشالىق, زال وعان: «براۆو!» دەپ قولپاش ءبىلدىرىپ, ورىندارىنان تىك تۇرىپ قۇرمەت كورسەتكەن. جاس قىزدىڭ شەتەلگە شىققان بەتىندە-اق مۇنشالىق مارتەبەلى مۋزىكالىق كونكۋرستا قازاقستاننىڭ نامىسىن قولدان بەرمەي, لايىقتى قورعاعانى قۋانتادى. سونداي-اق, شەتەلدىك ساراپشىلار ءبىزدىڭ جاس تالاپتاردىڭ كاسىبي دەڭگەيى ەۋروپاداعى تانىمال سكريپكا مەكتەبىنىڭ ورەسىنەن ءبىر دە كەم ەمەستىگىن اتاپ كورسەتتى. سكريپكا ويناۋداعى جوعارى شەبەرلىك ماشىعىنا العىس-مارا­پات رەتىندە كونكۋرستى ۇيىم­­­­­داس­تىرۋشىلار ماليكەنى مونب­لان­داعى جازعى حالىقارالىق سەمينارعا شاقىردى. وندا سكريپكا ونەرىنىڭ پروفەسسورلارى, الەمدىك تۇلعالار شەبەرلىك سىنىپتارىن وتكىزەدى. ساباقتاردان بولەك, جاس تالانتتاردىڭ كون­تسەرتتەرى مەن جەكە ونەر كەشتەرى جوسپارلانعان. قازاقتىڭ دارىندى سكريپكاشى قىزى ءۇشىن بۇل دا ءوز ونەرىن شىڭداۋدىڭ تاماشا مۇمكىندىگى بولماق. قورعانبەك امانجول, «ەگەمەن قازاقستان». الماتى. سۋرەتتە: ءپاريجدى تاڭدان­دىرعان ماليكە بەكتۇروۆا.