كەزەكتى جەڭىس

وسىنىڭ الدىنداعى تۋردا كۋبادا جەرگىلىكتى قابىلانداردان 0:5 ەسەبىمەن ۇتىلىپ قايتقان Astana Arlans كومانداسى بۇكىلالەمدىك سەريانىڭ 10-تۋرىندا 1 ناۋ­رىز كۇنى الماتىدا Poland Hussars بوكسشىلارىن قابىلداپ, 4:1 ەتىپ ۇتتى. كەزدەسۋدى 52 كيلوعا دەيىنگى سالماقتاعى ءىلياس سۇلەيمەنوۆ پەن گجەگوج كوزلوۆسكي باستادى. ناتيجەسىندە ءبىرىنشى راۋندتا تورەشىلەر تۇگەلدەي 10:9 ەسەبىمەن باسىم­­­­دىقتى الاڭ يەسىنە بەردى. بۇدان كەيىنگى ەكى راۋندتا وسى ەسەپ قايتالاندى. سوڭعى ەكى راۋندتا دا ونىڭ باسىمدىعى ەشكىمنىڭ كۇمانىن تۋعىزبادى. قازاقستاندىقتار وسىلاي العا شىقتى – 1:0! بۇدان كەيىن رينگكە بىزدەن سەريانىڭ دەبيۋتانتى – عاني جايلاۋوۆ شىقتى. 60 كيلوعا دەيىنگى سالماقتاعى ول داۆيد پاۆەل ميحەلۋس ەسىمدى قارسىلاسقا تاپ كەلدى. ءبىرىنشى راۋندتا ازداعان ارتىقشىلىق تانىتقان ءبىزدىڭ جىگىت, ءۇشىنشى راۋندتان باستاپ تىزگىندى بەرمەدى. ءۇشىنشى بولىپ رينگكە كوتەرىلگەن الەم چەمپيونى 69 كيلوعا دەيىنگى سالماقتاعى دانيار ەلەۋسىنوۆ ءوزىنىڭ بۇكىلالەمدىك سەرياداعى دەبيۋتىن جەڭىس­پەن اياقتاپ قانا قويعان جوق, سونىمەن بىرگە, ءوز بوكسشىلارىنىڭ كەزدەسۋدە ۇتىسقا قول جەتكىزۋىن قامتاماسىز ەتتى. ول قو­ناقتار ساپىنداعى لەگيونەر جورا سي­مونياندى ەمىن-ەركىن ۇتتى. شامامەن ءۇشىنشى راۋندتا-اق ونىڭ جەڭىسكە جەتىپ تۇرعانى ايدان انىق بولدى. ەسەپ – 3:0! ەندى بۇدان كەيىنگى جىگىتتەرىمىزدىڭ جۇكتەرى جەڭىلدەدى. بۇل جەڭىستى 81 كيلوداعى ادىلبەك نيازىمبەتوۆ ودان ءارى كوتەرىپ اكەتتى. ول 19 جاسار كاسيۋش زىچينسكيدى ەكى رەت نوكداۋنعا ءتۇسىرىپ, ايقىن باسىمدىقپەن تىزە بۇكتىردى. ال الاڭ يەلەرى ساپىنداعى جەڭىلىستى ارميان لەگيونەرى ارمەن سيمونيان ءوز ەسەبىنە جازدى. 91 كيلودان اۋىر سالماقتاعى بوكسشى قازاقستاندىق كوماندا قۇرامىنداعى تۇساۋكەسەر كەزدەسۋىن جەڭىلىسپەن باستادى. ول پولياكتار ساپىنداعى بەلورۋس لەگيونەرى سەرگەي ۆەرۆەيكودان ۇتىلدى. ءسويتىپ, ەسەپ 4:1 بولدى. ەندى Astana Arlans وسى جەڭىستەن كەيىن ءوز توبىندا كۋبالىقتاردان كەيىنگى ەكىنشى ورىنعا ورنىقتى. وسىمەن ول پلەي-وفف تۋرنيرىنە دە جولداما الىپ وتىر. سەريانىڭ قازىرگى جەڭىمپازى بولىپ تابىلاتىن ونىڭ سول جەڭىس ءۇشىن ءالى دە كۇرەسۋىنە بولادى. دامير قوجامقۇل. الماتى.