قادىرلى اقساقال 105-ءشى كوكتەمدى قارسى الدى

اقمولا وبلىسىندا تۇراتىن قادىرلى اقساقال قۇدايبەرگەن قۇسايىنوۆ بيىل 105-ءشى كوكتەمدى قارسى الدى. بۇل تۋرالى Egemen.kz ءتىلشىسى حابارلادى. ەتىگىمەن سۋ كەشىپ, جاستىق شاعىن وت جالىندا وتكىزگەن قۇدايبەرگەن اقساقال ەكى عاسىردىڭ كۋاگەرى. 1945 جىلى تۋعان جەرىنە ورالعان ول كوپ جىلدار بويى اۋىل شارۋاشىلىعى سالاسىندا قىزمەت اتقاردى. قازىر جەرگىلىكتى اكىمدىك بولگەن كوپقاباتتى پاتەرلەردىڭ بىرىندە تۋىستارىمەن بىرگە تۇرىپ جاتىر. وسى ايماقتاعى الەۋمەتتىك قىزمەتكەرلەر دە قاريانىڭ ۇيىنە كەلىپ, قولعابىس جاساۋدا. سول ساتتە قۇدايبەرگەن اتامىز قولىنا دومبىرا الىپ, جاستاردىڭ كوڭىلىن كوتەرەتىن كورىنەدى. «مەن ۇرپاعىمنىڭ باقىتتى ءومىر ءسۇرىپ جاتقانىنا قۋانامىن. ءبىز كورگەن سۇراپىل سوعىستى ادامزات بالاسى باستان كەشىرمەسىن. تاۋەلسىزدىگىمىز تۇعىرلى, حالقىمىز امان بولسىن!», - دەپ قۇدايبەرگەن اتا ءسوز ورايىندا تىلەگىن ءبىلدىردى. اقيقاتتى ايقىنداپ جاريالار, بارا جاتىر ازايىپ قاريالار. داۋىل تۇرسا, بۇلك ەتىپ تولقىمايتىن, بارا جاتىر سارقىلىپ داريالار... يا, بەلگىلى اقىننىڭ ولەڭ جولىندا ايتىلعانداي, وت جالىندا ەسەيگەن قاريالار قاتارى ازايىپ بارا جاتىر. الايدا, باقىتتى ۇرپاعىمىزعا قاراپ, شۇكىرشىلىك ەتەمىز. ءار كۇنىمىز شۋاقتى بولعاي! ءامىرحان الماعانبەتوۆ. دەرەككوز: Egemen.kz. فوتو: تولەگەن كوشەعۇلوۆ.