قالا تۇرعىندارىن ەگەمەندىكتىڭ تورقالى تويىمەن قۇتتىقتاعان ول وتىز جىلدىڭ ىشىندە قازاقستان ءوز مەملەكەتتىلىگىن تولىق قالىپتاستىرعانىن جانە ىرگەسىن بەكىتىپ, شەكاراسىن شەگەندەگەنىن اتاپ ءوتتى.
سەنات سپيكەرى تۇڭعىش پرەزيدەنت – ەلباسى نۇرسۇلتان نازارباەۆتىڭ سىندارلى ساياساتىنىڭ ارقاسىندا ەلىمىز حالىقارالىق قاۋىمداستىقتىڭ بەلدى ءارى بەلسەندى مۇشەسىنە اينالعانىن, جاڭا ەلوردامىزدىڭ سالىنعانىن جانە وڭىرلەردىڭ دە قارقىندى تۇردە ءوسىپ-وركەندەگەنىن تىلگە تيەك ەتتى.
«تاۋەلسىزدىك الماتىنىڭ دامۋىنا تىڭ سەرپىن بەردى. سونىڭ ناتيجەسىندە شاھار ەلىمىزدە عانا ەمەس, بۇكىل پوستكەڭەستىك كەڭىستىكتە ەڭ قارقىندى دامىپ كەلە جاتقان قۋاتتى ەكونوميكالىق مەگاپوليسكە اينالدى. ەلىمىزدىڭ ءاربىر بەسىنشى كاسىپكەرى وسى قالادا ەڭبەك ەتۋدە», دەدى ماۋلەن اشىمباەۆ.
سونىمەن قاتار سەنات توراعاسى قازىرگى تاڭدا مەملەكەتىمىزدىڭ الدىندا پرەزيدەنت قاسىم-جومارت توقاەۆ بەلگىلەپ بەرگەن جاڭا مىندەتتەر تۇرعانىنا نازار اۋدارىپ, بارلىق سالادا ازاماتتاردىڭ الەۋمەتتىك جاعدايىن جاقسارتۋعا ارنالعان جۇيەلى رەفورمالار ىسكە اسىرىلىپ كەلە جاتقانىن ايتتى.
«بۇگىندە شاعىن جانە ورتا بيزنەستى قولداۋعا باعىتتالعان باستامالار جۇزەگە اسىرىلىپ جاتىر. ەل پرەزيدەنتىنىڭ تاپسىرماسىمەن پاندەميا كەزەڭىندە ازاماتتار مەن كاسىپكەرلەرگە قولداۋ كورسەتۋ ءۇشىن داعدارىسقا قارسى شارالاردىڭ توپتاماسى قابىلداندى. بۇل رەفورمالاردىڭ ءبارى جۇيەلى سيپاتقا يە. ولار تاۋەلسىزدىگىمىزدى نىعايتۋعا جانە ازاماتتارىمىزدىڭ ءومىر ءسۇرۋ ساپاسىن ارتتىرۋعا باعىتتالعان», دەدى پالاتا توراعاسى.
سونداي-اق ماۋلەن اشىمباەۆ مەملەكەت باسشىسى قازاقستاننىڭ جاھاندىق باسەكەگە قابىلەتتىلىگىن ارتتىرۋدىڭ نەگىزگى تىرەگى سانالاتىن اگلومەراتسيانىڭ دامۋىنا باسا ءمان بەرىپ وتىرعانىن جەتكىزدى. سەنات سپيكەرى بۇل رەتتە الماتىنىڭ الەۋەتى زور ەكەنىن دە قاپەرگە سالدى.
«الماتىدا ساپالى ادام كاپيتالى شوعىرلانعان. مۇندا بولاشاقتىڭ ەكونوميكاسىن «جاڭعىرتۋ وزەگى» سانالاتىن كرەاتيۆتى ورتا مەن بەلسەندى ازاماتتىق قوعام قالىپتاستى. ەلىمىزدىڭ ءار وڭىرىندەگى دارىندى جاستار وسى قالاعا اعىلۋدا. الماتى – عىلىمي-زەرتتەۋ جانە تاجىريبەلىك-قۇراستىرۋ جۇمىستارىنا ينۆەستيتسيا سالۋ بويىنشا كوشباسشى شاھار. مەملەكەت باسشىسى اتاپ وتكەندەي, بۇل قالانىڭ كرەاتيۆتى ەكونوميكانى دامىتۋ جونىندەگى تاجىريبەسىن بۇكىل ەلگە تاراتۋ قاجەت», دەدى ماۋلەن اشىمباەۆ.
ول وسى الەۋەتتى تولىق پايدالانۋ ءۇشىن ەل پرەزيدەنتىنىڭ تاپسىرماسىمەن جاڭا «اگلومەراتسيالار تۋرالى» زاڭ جوباسى ازىرلەنىپ جاتقانىن اتاپ ءوتتى. پالاتا سپيكەرىنىڭ ايتۋىنشا, پارلامەنت دەپۋتاتتارى الماتى سياقتى ءىرى جانە كەلەشەگى زور اگلومەراتسيالاردى ودان ءارى دامىتۋ ءۇشىن پارمەندى زاڭنامالىق بازا قۇرۋ بويىنشا بارلىق قاجەتتى شارالاردى قابىلدايدى.
الماتى اكىمى باقىتجان ساعىنتاەۆ سالتاناتتى جيىنعا قاتىسۋشىلارعا ارناعان سوزىندە تاريحي تۇرعىدان تاۋەلسىزدىكتىڭ بەسىگىنە اينالعان مەگاپوليستىڭ ەرەكشە ءرولىن اتاپ ءوتتى. 1991 جىلدىڭ 16 جەلتوقسانىندا الماتىدا قازاقستان رەسپۋبليكاسىنىڭ ەگەمەندىگى رەسمي تۇردە جاريالاندى, مۇندا تاۋەلسىز مەملەكەتتىڭ نەگىزگى قۇجاتتارى قابىلداندى.
«الماتىدا ەل ءۇشىن ماڭىزدى شەشىمدەر قابىلداندى, كونستيتۋتسيا, مەملەكەتتىك رامىزدەر قابىلداندى, قارۋلى كۇشتەر قۇرىلدى, ۇلتتىق ۆاليۋتا ەنگىزىلدى. تۇڭعىش پرەزيدەنت سايلاۋىنىڭ جالپىحالىقتىق ناتيجەلەرى دە الماتىدا جاريالاندى. 1998 جىلى تۇڭعىش پرەزيدەنت «الماتىنىڭ ەرەكشە مارتەبەسى تۋرالى» زاڭعا قول قويدى», ەلباسى الماتىنى «تاۋەلسىزدىكتىڭ التىن بەسىگى» دەگەنىن اتاپ ءوتتى باقىتجان ساعىنتاەۆ.
سالتاناتتى جيىن بارىسىندا ماۋلەن اشىمباەۆ پەن باقىتجان ساعىنتاەۆ ەل پرەزيدەنتىنىڭ اتىنان وتانىمىز بەن قالانىڭ ءوسىپ-وركەندەۋىنە ايرىقشا ۇلەس قوسقان الماتىلىقتاردى مەملەكەتتىك ناگرادالارمەن ماراپاتتادى.
«قازاقستان بۇل مەرەيلى بەلەسكە تولايىم تابىسپەن جەتىپ وتىر. ەندى الدىمىزدا جاڭا اۋقىمدى مىندەتتەر تۇر. بۇل رەتتە قولىمىزداعى باردى باعالاپ, جەتىستىكتەرىمىزدى ەسەلەي ءتۇسۋدىڭ ماڭىزى زور. وسى جولدا ءبارىمىز تاۋەلسىزدىگىمىزدى ساقتاۋ, قورعاۋ جانە نىعايتۋ ءۇشىن بار كۇش-جىگەرىمىزدى جۇمساۋىمىز قاجەت», دەدى ماۋلەن اشىمباەۆ.
ءىس-شارا سوڭىندا سەنات توراعاسى الماتىلىقتاردى مەملەكەت تاريحىنىڭ ماڭىزدى كەزەڭى سانالاتىن تاۋەلسىزدىكتىڭ 30 جىلدىعىمەن تاعى ءبىر مارتە قۇتتىقتاپ, بارشا قالا تۇرعىندارىنا ەلىمىزدى دامىتۋ جولىندا جاڭا جەڭىستەر مەن جەتىستىكتەر تىلەدى.
