بۇل بايقاۋدى اقپارات جانە قوعامدىق دامۋ مينيسترلىگى مەن ء«Shuǵylakىtap» باسپاسىنىڭ قولداۋىمەن «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ وڭىرلىك جوبالىق كەڭسەسى ۇيىمداستىردى.
مەملەكەت باسشىسى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا كىتاپ وقيتىن ۇلتتى قالىپتاستىرۋ ءۇشىن جاس قازاقستاندىقتار اراسىندا وقۋ مادەنيەتىن دامىتۋعا جانە ىلگەرىلەتۋگە ەرەكشە نازار اۋدارعانى بەلگىلى. وسىعان بايلانىستى «رۋحاني جاڭعىرۋ» باعدارلاماسىن ۇلتتىق جاڭعىرۋ كەزەڭىنە كوشىرۋ جونىندەگى جول كارتاسىنا سايكەس, بالالار وقۋىنىڭ رەسپۋبليكالىق كونكۋرسى وتكىزىلدى.
بايقاۋدىڭ باستى ماقساتى – كىتاپ وقۋعا دەگەن قىزىعۋشىلىقتى قالىپتاستىرۋ, وسكەلەڭ ۇرپاققا ءوز ەلى ءۇشىن ماقتانىش سەزىمىن وياتۋ جانە «رۋحاني جاڭعىرۋ» باعدارلاماسىنىڭ يدەيالارىن ءتۇسىندىرۋ.
بايقاۋعا قازاقستاننىڭ بارلىق وڭىرىنەن 3 600-دەن استام جالپى ءبىلىم بەرەتىن مەكتەپتەن 37 مىڭنان استام ورتا بۋىن وقۋشىسى قاتىستى. بايقاۋ پروتسەسى وڭىرلىك اكىمدىكتەردىڭ, وبلىستىق, قالالىق, اۋداندىق ءبىلىم بولىمدەرىنىڭ كومەگىمەن ۇيىمداستىرىلدى.
قورىتىندى رەسپۋبليكالىق كەزەڭگە قازاقستاننىڭ بەس وڭىرىنەن 25 بالا قاتىستى. بايقاۋ بارىسىندا قاتىسۋشىلار تۋعان ولكەنىڭ تاريحى, مادەنيەتى, سونداي-اق «رۋحاني جاڭعىرۋ» باعدارلاماسىنىڭ پرينتسيپتەرى بويىنشا سۇراقتارعا جاۋاپ بەرىپ, كۆەستكە قاتىستى.
بۇگىن, 10 جەلتوقساندا, نۇر-سۇلتاندا «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ كەڭسەسىندە رەسپۋبليكالىق كونكۋرستىڭ جەڭىمپازدارىن ماراپاتتاۋ ءراسىمى ءوتتى. ءىس-شاراعا قر اقپارات جانە قوعامدىق دامۋ ۆيتسە-ءمينيسترى بولات تلەپوۆ, «رۋحاني جاڭعىرۋ» كيور باسقارما توراعاسى اسىلبەك ەسەنباەۆ, وبلىس اكىمدەرىنىڭ ورىنباسارلارى, جەڭىمپاز وڭىرلەردىڭ بىلىم باسقارمالارىنىڭ باسشىلارى جانە تىكەلەي بايقاۋعا قاتىسۋشىلار قاتىستى.
«بۇل بايقاۋدىڭ تاربيەلىك نەگىزى بولعان كىتاپتاردا قازاقستاننىڭ مەملەكەتتىك رامىزدەرى, مادەنيەتى, سالت-داستۇرلەرى مەن ادەت-عۇرىپتارى, تاريحي ەسكەرتكىشتەرى, كيەلى جەرلەرى تۋرالى ايتىلادى. حالىق ماقال-ماتەلدەرى, جۇمباقتارى, سونداي-اق تاۋ مەن دالا تۋرالى اڭىز-اڭگىمەلەر تۇرىندەگى عاسىرلار دانالىعى مەكتەپ وقۋشىلارىنىڭ وي-ءورىسىن كەڭەيتىپ, ۇلتتىق كودتىڭ ساقتالۋىنا ىقپال ەتەدى», دەدى ب.تلەپوۆ قاتىسۋشىلاردى قۇتتىقتاۋ سوزىندە.
بايقاۋ كوميسسياسىنىڭ شەشىمىنە سايكەس, بەسىنشى ورىندى جەزقازعان قالاسىنداعى «وركەن» مامانداندىرىلعان مەكتەپ-ينتەرناتىنىڭ وقۋشىسى نازىم جولتاي يەلەندى. ءتورتىنشى ورىندى اقتوبە وبلىسى شالقار اۋدانى وبلىستىق مامانداندىرىلعان فيزيكا-ماتەماتيكا مەكتەپ-ينتەرناتىنىڭ وقۋشىسى فاتيما مۋاپىكوۆا الدى. ءۇشىنشى ورىنعا ەلوردالىق №86 مەكتەپ-گيمنازياسىنىڭ وقۋشىسى ەرالى قوزى يە بولدى. ەكىنشى ورىندى بايقوڭىر قالاسىنداعى №273 ورتا مەكتەپتىڭ وقۋشىسى ۇلداي قاراتاەۆا جەڭىپ الدى. شقو اياگوز اۋدانى №5 ورتا مەكتەبىنىڭ وقۋشىسى جانەل توقانوۆا «سەن تۋعان قازاقستانىڭدى بىلەسىڭ بە؟» رەسپۋبليكالىق بايقاۋىنىڭ جەڭىمپازى اتاندى.
جەڭىمپازدار ارنايى گراموتالارمەن جانە باعالى سىيلىقتارمەن ماراپاتتالدى.
شارا سوڭىندا اقپارات جانە قوعامدىق دامۋ ۆيتسە-ءمينيسترى بولات تلەپوۆ كىتاپ وقۋعا دەگەن قىزىعۋشىلىقتى ودان ءارى ارتتىرۋ ماقساتىندا اۋدان, قالالاردىڭ جۇلدەگەرلەرى مەن مەكتەپ كىتاپحانالارىنا دا سىيلىقتار جىبەرىلگەنىن اتاپ ءوتتى.
