ۇلتتىق كوميسسيا ءتورايىمى ءلاززات رامازانوۆا ءىس-شارا قاتىسۋشىلارىنا ارناعان العى ءسوزىن ەل تاۋەلسىزدىگىنىڭ 30 جىلدىعى مەرەيتويىمەن قۇتتىقتاۋدان باستادى.
«تاۋەلسىزىدىك جىلدارى ەلىمىزدە وتباسى ينستيتۋتىن نىعايتۋعا, ايەلدەردىڭ قۇقىقتارى مەن ەكونوميكالىق مۇمكىندىكتەرىن كەڭەيتۋگە, انا مەن بالانى قورعاۋعا قاتىستى باستامالار كوتەرىلىپ, ونى دامىتۋ قولعا الىنىپ كەلەدى. وتباسى قۇندىلىقتارىن ساقتاپ, ونى نىعايتۋ ەلىمىزدىڭ دامۋىنا اسەر ەتەرى ءسوزسىز. ويتكەنى تەك باقىتتى وتباسى ەلدىڭ بىرلىگى مەن بەرەكەسىنىڭ تىرەگى بولا الاتىنى اقيقات. تەك بىرلىگى جاراسىپ, بەرەكەسى كەلىسكەن ەل عانا جەتىستىككە جەتەرى ءسوزسىز», دەدى ءلاززات رامازانوۆا ءوز سوزىندە.
وتىرىس بارىسىندا قاۋىپسىزدىك, سوت جانە قۇقىق قورعاۋ سالالارىندا قىزمەت ەتىپ وتىرعان ايەلدەر جايلى, سونداي-اق ولاردىڭ باسشىلىق قىزمەتكە تاعايىندالۋى تۋرالى جوعارعى سوت, باس پروكۋراتۋرا جانە ىشكى ىستەر مينيسترلىگىنىڭ اقپاراتتارى تىندالدى.
بۇۇ قاۋىپسىزدىك كەڭەسىنىڭ 2000 جىلعى 31 قازاندا قابىلداعان 1352 قاراردا داعدارىس پەن شيەلەنىستەردىڭ الدىن الۋ جانە ولاردى شەشۋدە ايەلدەردىڭ الار ورنى, سونداي-اق قاۋىپسىزدىك پەن بەيبىتشىلىكتى نىعايتۋعا باعىتتالعان بارلىق ءىس-ارەكەتتەردە ايەلدەرگە تەڭ قۇقىق بەرىلۋىنىڭ ماڭىزدىلىعى جان-جاقتى قامتىلعان.
قازىرگى ۋاقىتتا ەلىمىزدىڭ سوت كورپۋسىندا جۇمىس ىستەيتىن 2 382 سۋديانىڭ جارتىسىنان كوبى - قىز-كەلىنشەكتەر (52,6%). اۋداندىق سوتتاردا سۋديالىق قىزمەتتەگى ايەلدەردىڭ ۇلەسى دە ارتۋدا (54,3%). سوت جۇيەسىندەگى اكىمشىلىك-مەملەكەتتىك قىزمەتشىلەر قاتارىندا ايەلدەر سانى 65,4%-دى قۇراپ وتىر. ولاردىڭ ىشىندە 370 (61%) ايەل باسشىلىق قىزمەتتە. 1071 ايەل پروكۋراتۋرا ورگاندارىندا قىزمەتتە, بۇل جالپى قىزمەتكەرلەردىڭ 22%-ى, ونىڭ ىشىندە 7%-ى (73) باسشىلىق قىزمەتتى اتقارۋدا. سوڭعى بەس جىلدا قۇقىق قورعاۋ قىزمەتىندە دە ايەلدەر سانى ارتقان. قازىرگى ۋاقىتتا بۇل سالادا 12 414 ايەل (14%) قىزمەتتە بولسا, ونىڭ ىشىندە 657 ايەل (5,3%) باسشىلىق لاۋازىمدا.
سونىمەن قاتار وتىرىستا ۇلتتىق كوميسسيانىڭ بيىلعى قىزمەتىنە قورىتىندى جاسالىپ, كەلەر 2022 جىلعا مىندەتتەر اتالىپ ءوتتى.
وتىرىس سوڭىندا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى ءلاززات رامازانوۆا ۇلتتىق كوميسسيانىڭ اتىنان ايەل مەن بالا مۇددەسىن قورعاۋعا, ەلىمىزدە وتباسى ساياساتىن نىعايتۋعا قوسقان ۇلەسى ءۇشىن ۇكىمەتتىك ەمەس ۇيىمدار مەن حالىقارالىق ۇيىمداردىڭ وكىلدەرىنە العىس حاتتار تابىستادى.
قازىرگى ۋاقىتتا ەلىمىزدە ايەلدەر مەن قىزداردىڭ قۇقىقتارىن كەڭەيتۋ, زورلىق-زومبىلىقتان قورعاۋ, رەپرودۋكتيۆتى دەنساۋلىقتى نىعايتۋ سالالارىندا حالىقارالىق ارىپتەستەرمەن بىرلەسكەن بىرقاتار جوبالار ىسكە اسىرىلۋدا.
ايتا كەتسەك, ءىس-شارا اياسىندا «تاۋەلسىز قازاقستاننىڭ وتباسىلىق جانە گەندەرلىك ساياساتى: تابىستار مەن جەتىستىكتەر» تاقىرىبىندا فوتوكورمە ۇيىمداستىرىلدى.
