«جەلتوقساننىڭ 9-ى كۇنى بىرقاتار بۇقارالىق اقپارات قۇرالدارىندا شىمكەنت قالاسىنىڭ جانە تۇركىستان وبلىسىنىڭ جانارماي قۇيۋ بەكەتتەرىندە بەنزين تاپشىلىعى تۋىنداعانى تۋرالى اقپارات تارادى. وسىعان وراي «قازمۇنايگاز» ۇك اق قازىرگى ۋاقىتتا بارلىق ءۇش قازاقستاندىق مۇناي وڭدەۋ زاۋىتى قالىپتى جاعدايدا جۇمىس ىستەپ تۇرعانىن مالىمدەدى. مۇناي وڭدەۋ جانە مۇناي ونىمدەرىن شىعارۋ قر ەنەرگەتيكا مينيسترلىگى بەكىتكەن جوسپاردان تىس ورىندالىپ جاتىر», دەدى كومپانيا وكىلى.
شىمكەنت مۇناي وڭدەۋ زاۋىتى تاۋلىگىنە شامامەن 6 مىڭ توننا بەنزين ءوندىرىپ شىعارادى. زاۋىتتان بەنزين مۇناي بەرۋشىلەردىڭ وتىنىمدەرىنە سايكەس ۋاقتىلى جىبەرىلۋدە جانە تاۋلىگىنە 6 مىڭعا جۋىق توننانى قۇرايدى. بۇل كولەمنىڭ شامامەن 2 مىڭ تونناسى تۇركىستان وبلىسىنا جونەلتىلەدى.
«وسىلايشا, شىمكەنت وڭدەۋ زاۋىتى تاراپىنان وڭىردە بەنزين تاپشىلىعىن تۋدىراتىنداي ەش نەگىز جوق. قمگ ديسپەتچەرلىك-ساراپتاۋ ورتالىعىنىڭ دەرەكتەرىنە سايكەس وسى جىلدىڭ 10 جەلتوقسانىنداعى جاعداي بويىنشا تۇركىستان وبلىسىنىڭ مۇناي بازالارىندا اي-92 ماركالى بەنزين قورى 15,4 مىڭ توننا, بۇل وبلىستىڭ 12 كۇندىك تۇتىنۋىنا تەڭ», دەلىنگەن حابارلامادا.
بۇدان بولەك, كومپانيا وكىلى, بەنزين تاپشىلىعى پاۆلودار مۇناي-حيميا زاۋىتىنداعى جوندەۋ جۇمىسىمەن بايلانىستى اقپارات شىندىققا جاناسپايتىنىن, سەبەبى پمحز-دا جوندەۋ جۇمىستارى وسى جىلدىڭ قازانىندا اياقتالعانىن ايتتى.
ەسكە سالايىق, وسىعان دەيىن تۇركىستاندا جانارمايعا قاتىستى شۋ شىقتى. ول تەك ءىرى جانارماي قۇيۋ ستانتسيالارىندا عانا قولجەتىمدى بولدى. جاعدايعا قاتىستى وبلىس اكىمدىگى وڭىردەگى جانارماي تاپشىلىعى پاۆلودار زاۋىتىنىڭ ۋاقىتشا جوندەۋ جۇمىستارىنا تىكەلەي بايلانىستى ەكەنىن ايتتى.
