ءمينيستردىڭ مىندەتىن اتقارۋشى احمەتجان پىرىمقۇلوۆتىڭ بۇيرىعىمەن بارلىق قالدىقتار ەكى توپقا بولىنگەن:
«دىمقىل» - تاعام قالدىقتارىنان, ورگانيكالىق زاتتاردان, ارالاس قالدىقتاردان جانە تابيعاتى مەن قۇرامى بويىنشا تۇرمىستىق قالدىقتارعا ۇقساس قالدىقتاردان تۇرادى;
«قۇرعاق» - قاعاز, كارتون, مەتالل, پلاستيك جانە شىنىدان تۇرادى.
وكىمگە سايكەس, وبلىستاردىڭ, رەسپۋبليكالىق ماڭىزى بار قالالاردىڭ جانە استانانىڭ اكىمدىكتەرى قالدىقتاردى جينايتىن جانە تاسىمالدايتىن, بولەك جيناۋ ءۇشىن كونتەينەرلەردى ۇيىمداستىراتىن, حالىققا ءتۇسىندىرۋ جانە اقپاراتتىق-ءتۇسىندىرۋ جۇمىستارىن جۇرگىزەتىن تقق نارىعىنا قاتىسۋشىلاردى انىقتاۋ بويىنشا كونكۋرس وتكىزەدى.
قۇجاتتا ەلەكتروندى جانە ەلەكتر جابدىقتارى, قۇرامىندا سىنابى بار قالدىقتار, باتارەيالار, اككۋمۋلياتورلار جانە باسقا دا قاۋىپتى كومپونەنتتەرى بار قالدىقتار بولەك جينالىپ, مامانداندىرىلعان ۇيىمدارعا قالپىنا كەلتىرۋگە بەرىلەتىنى ايتىلعان.
قوقىس كونتەينەرلەرىنە جانىپ تۇرعان, ىستىق قالدىقتاردى, ءىرى كولەمدى قالدىقتاردى, قار مەن مۇزدى, سونداي-اق ادامداردىڭ ءومىرى مەن دەنساۋلىعىنا زيان كەلتىرەتىن, كونتەينەرلەردى تاستاۋعا تىيىم سالىنادى.
قۇرىلىس قالدىقتارى دا, بۇيرىققا سايكەس, تىكەلەي قۇرىلىس الاڭىندا نەمەسە جەرگىلىكتى اتقارۋشى ورگاندار ۇيىمداستىرعان ارنايى جەردە باسقا قالدىقتاردان مىندەتتى تۇردە ءبولىنۋى كەرەك.
«مەنشىك نىسانىنا جانە قىزمەت تۇرىنە قاراماستان تۇلعالار ورتالىقتاندىرىلعان جۇيەنى پايدالانۋ كەزىندە ناقتى ەلدى مەكەندە نەمەسە ونىڭ قۇرامداس بولىگىندە قالدىقتاردى بولەك جيناۋ ءۇشىن ورتالىقتاندىرىلعان جۇيە شەڭبەرىندە جاسالعان شارتتارعا سايكەس تۇزىلگەن قالدىقتاردى تۇرلەرى نەمەسە توپتارى بويىنشا ءبولۋدى قامتاماسىز ەتەدى», دەلىنگەن بۇيرىقتا.
بۇيرىق 2021 جىلعى 19 جەلتوقساننان باستاپ قولدانىسقا ەنگىزىلەدى.
