قازاقستاننىڭ اتىن شىعاراتىنىنا سەنەمىن
تاۋەلسىزدىكتى بوستاندىق, كۇش جانە رۋحاني بايلىق دەپ تۇسىنەمىن. جەلتوقساننىڭ ەكپىنىمەن كەلگەن ەگەمەندىكتىڭ قاشاندا ورنى بولەك.
بيىلعى تاۋەلسىزدىگىمىزدىڭ 30 جىلدىق ءتول مەرەكەسىنە وراي «تاۋەلسىزدىك ۇرپاقتارى» گرانتىنا ۇسىنىپ وتىرعان جوبام «(انتي) كوممۋتاتورلارعا قاتىستى ەرەكشە الگەبرالاردىڭ قۇرىلىمدىق ماسەلەلەرى» دەپ اتالادى. بىرىنشىدەن, بۇل جوبا ماتەماتيكانىڭ الگەبرا باعىتىنا ەڭ العاش قازاق تىلىندە تورتكەن جانە تورتقارا تەرميندەرىن ەنگىزگەن ايگىلى اكادەميك اسقار جۇمادىلداەۆتىڭ 2007 جىلى جارىق كورگەن عىلىمي ماقالاسىندا اتالىپ وتكەن تەوريالارعا نەگىزدەلىپ, تەرەڭىرەك زەرتتەۋگە باعىتتالدى. بۇل جوبانىڭ ناتيجەلەرى تەوريالىق سيپاتقا يە جانە ماتەماتيكا باعىتىندا عانا ەمەس, فيزيكانىڭ كوپتەگەن اشىلۋىندا قولدانىسقا جارايدى دەگەن بولجام كۇتىلۋدە. سونداي-اق زەرتتەۋ ناتيجەلەرى رەيتينگتىك جۋرنالداردا جاريالانادى. بۇل ناتيجەلەر قازاقستاننىڭ عالىمدارى ءۇشىن الگەبرا باعىتىن ىلگەرىلەتۋگە قىزمەت ەتىپ, قازاقستاننىڭ اتىن الەمدىك دەڭگەيگە شىعاراتىنىنا سەنەمىن.
بۇل گرانت ءبىز سياقتى جاس عالىمداردىڭ ارتىق دۇنيەلەرگە الاڭداماي, ۋاقىتىمىز بەن كۇشىمىزدى تەك عىلىمعا ارناۋعا زور مۇمكىندىك بەرىپ وتىر. سول سەبەپتى وسىنداي مۇمكىندىك بەرىپ, قولداپ جۇرگەن مەملەكەتىمىز بەن پرەزيدەنتىمىزگە ريزاشىلىعىمدى بىلدىرەمىن! سونىمەن قوسا, مەنى باكالاۆر دارەجەسىنەن بەرى بار بىلگەنىن اياماي ۇيرەتىپ, وسىنداي جەتىستىكتەرگە جەتۋگە سەبەپشى بولعان عىلىمي جەتەكشىلەرىم اسقار جۇمادىلداەۆ پەن نۇرلان يسمايلوۆقا دا العىس ايتقىم كەلەدى.
فارۋح ماشۋروۆ,
سۋلەيمەن دەميرەل ۋنيۆەرسيتەتىنىڭ اعا وقىتۋشىسى, قازاق-بريتان تەحنيكالىق ۋنيۆەرسيتەتىنىڭ
3-كۋرس دوكتورانتى
ارمانىمىزعا قانات ءبىتىردى
«بۇلاق كورسەڭ, كوزىن اش» دەمەكشى, پرەزيدەنتىمىزدىڭ باستاماسىمەن جۇزەگە اسىرىلعان «تاۋەلسىزدىك ۇرپاقتارى» جوباسى 30 جاستىڭ جىگەرىن جانىپ, ارماندارىنا قانات ءبىتىردى.
سول جاستاردىڭ قاتارىندا ءوزىم دە بارمىن. اتالعان بايقاۋعا «توتىققان كوبالت-نيكەلى بار كەننەن كوبالت پەن نيكەلدى كەشەندى ءبولىپ الۋ تەحنولوگياسىن ازىرلەۋ» تاقىرىبىنداعى جوبامدى تاپسىردىم. بۇل جوبامدا كوبالت ءۇشىن كەمىندە 90% جانە نيكەل ءۇشىن 95% ءبولىپ الۋ دارەجەلەرى بولاتىن وڭدەلۋى كۇردەلى توتىققان كەندەردەن كوبالت پەن نيكەلدى كەشەندى ءبولىپ الۋدىڭ جاڭا تەحنولوگياسىن ازىرلەۋدى كوزدەدىم. اتالعان تەحنولوگيادا زەرتتەۋلەر سالىستىرمالى تۇردە ۋلاعىش دارەجەسى تومەن, ارزان جانە قولجەتىمدى رەاگەنتتەرىن (نوۋ-حاۋ) پايدالانۋ ارقىلى بولمە تەمپەراتۋراسىندا جۇرگىزىلەدى. سونىڭ ناتيجەسىندە بارلىق تەحنولوگيالىق پروتسەستى ارزانداتۋعا, جەڭىلدەتۋگە جانە پايدالانۋدا كۇردەلى اپپاراتۋرالىق رەسىمدەۋدى بولدىرماۋعا مۇمكىندىك بەرەدى.
ەكولوگيالىق جانە ەكونوميكالىق ارتىقشىلىقتارعا يە ءارى وتە قىزىقتى جوبا. اكادەميك, پروفەسسور ح.وسپانوۆتىڭ باسشىلىعىمەن مەتالداردى گيدرومەتاللۋرگيالىق جولمەن ءتيىمدى ءبولىپ الۋ ادىستەرىن زەرتتەدىم, سول باعىتتاعى جۇمىستاردى ودان ءارى دامىتقىم كەلدى. قازىرگى كەزدە پروفەسسور باعداۋلەت كەنجاليەۆتىڭ قاراماعىندا Satbayev University جانىنداعى مەتاللۋرگيا جانە كەن بايىتۋ ينستيتۋتىندا كىشى عىلىمي قىزمەتكەر بولىپ جۇمىس ىستەيمىن. ينستيتۋتتا جاس عالىمداردىڭ عىلىممەن اينالىسۋىنا بارلىق جاعداي قاراستىرىلعان, بۇل بولاشاقتا تىڭ زەرتتەۋلەر جۇرگىزۋگە مۇمكىندىك بەرەدى.
مىنەكي, جوعارىدا اتالعان جوبامىزدى ءارى قاراي دامىتۋعا قولداۋ بار. ەندىگى جەردە ءبىلىمدى ۇرپاق تاربيەلەپ, مەملەكەتىمىزدى دامىتۋ جولىندا ەڭبەك ەتۋگە دايىنبىز.
كەنجەعالي مامان ۇلى,
Satbayev University جانىنداعى
مەتاللۋرگيا جانە كەن بايىتۋ ينستيتۋتىنىڭ
كىشى عىلىمي قىزمەتكەرى
اسقاق مۇرات العا جەتەلەيدى
وسىدان جارتى جىل بۇرىن گرانتقا قۇجاتتارىمدى تاپسىرعان كەزدە جەڭىمپاز بولاتىنىمدى مۇلدەم ويلاماعان ەكەنمىن. بۇل مەن ءۇشىن زور مارتەبە جانە ۇمىتىلماس تاريحي ءسات دەسەم, ارتىق ايتقاندىق ەمەس. ەڭ العاشقى ەڭبەك جولىمدى قاراعاندىدا باستاسام, بۇگىندە ەلورداداعى «قازاق ۇلتتىق ونەر ۋنيۆەرسيتەتى» كوللەدجىنىڭ وقىتۋشىسىمىن, «اكتەرلىك ونەر» ماماندىعى بويىنشا ساباق بەرىپ, ساپالى جۇمىستار اتقارۋعا تالپىنىپ كەلەمىن.
جاستارىمىزدىڭ تانىمى تەرەڭ تۇلعا بولىپ قالىپتاسۋى ءۇشىن مادەنيەتتىڭ ورنى ەرەكشە. وسى ورايدا وسكەلەڭ ۇرپاقتى تەاتر ونەرىنە قىزىقتىرۋ ماقساتىندا «تەاتر. شىعارماشىلىق. تالانت» جوبامەن ازىرلەدىم.
ءبىز بۇل جوبانىڭ اياسىندا بالالار مەن جەتكىنشەكتەرگە ارنالعان حالىقارالىق تەاتر فەستيۆالىن ۇيىمداستىرامىز. مۇنداي سايىس ورەندەرىمىزدىڭ ونەر كوكجيەگىن كەڭەيتەدى, ۇلتتىق قۇندىلىقتارىمىزدى ۇلىقتاپ, وتانسۇيگىشتىكتى دارىپتەيدى. اكتەرلىكتىڭ قىر-سىرىن ۇعىنۋعا مۇمكىندىك بەرەدى. ەڭ باستىسى, الدىنا اسقاق ماقسات قويۋعا جەتەلەيدى.
كەلەشەكتە فەستيۆالعا قاتىسقان جەتكىنشەكتەرىمىزدىڭ اراسىنان قازاقستاننىڭ ونەر قايراتكەرلەرى شىعاتىنىنا سەنىمدىمىن. ارمانىم – بولاشاقتا بالالار وينايتىن تەاتر اشىپ, ەلىمىزدى مادەنيەت, تەاتر ارقىلى الەمگە ايگىلى ەتۋ.
ەگەمەندىكتىڭ مەرەيلى جىلىندا دارىندى جاستارعا ارنايى گرانت تاعايىنداپ, تالابىمىزدى قۋاتتاپ وتىرعان پرەزيدەنتىمىز قاسىم-جومارت كەمەل ۇلىنا زور ريزاشىلىعىمدى بىلدىرەمىز.
دۋمان اكىم,
«تاۋەلسىزدىك ۇرپاقتارى» گرانتىنىڭ «مادەنيەت» باعىتى بويىنشا جەڭىمپازى
جاستارعا تىڭ سەرپىن بەردى
پرەزيدەنتىمىز قاسىم-جومارت كەمەل ۇلى توقاەۆتىڭ ءبىلىمدى, شىعارماشىل, باستاماشىل جاستارعا ۇنەمى قولداۋ ءبىلدىرىپ كەلە جاتقانى ءبىزدى وتە قاتتى قۋانتادى. باعىم جانىپ, «تاۋەلسىزدىك ۇرپاقتارى» گرانتىنا ەلىمىزدەگى تالانتتى جاستارمەن بىرگە مەنى دە لايىق دەپ تانىعاندا, عالامات كۇيدى باستان كەشتىم. مەملەكەتىمىز تاراپىنان جاستارعا جاسالىپ جاتقان شاراپاتتى شىن سەزىنگەندەي بولدىم.
«ۇرپاق – ۇلت بولاشاعى» دەسەك, كەلەشەگىمىز ءۇشىن پرەزيدەنتتىڭ جاساپ جاتقان جارقىن باستامالارى قاشاندا بىزدەي جاستار ءۇشىن تىڭ سەرپىن بەرەرى ءسوزسىز. بۇل گرانتتى جەڭىپ الۋ قانشالىقتى ۇلكەن قۋانىش بولسا, ونىڭ جاۋاپكەرشىلىگى دە سونشالىقتى زور. ونى ءوز باسىم انىق سەزىنەمىن جانە الداعى ۋاقىتتا بۇدان دا جەمىستى جوبالار جاساۋعا بارىمدى سالامىن. ويتكەنى ءبىز تاۋەلسىزدىكتىڭ قۇرداسى عانا ەمەس, ەگەمەندى ەلدىڭ ەرتەڭىمىز دەپ باتىل ايتا الامىن. ءبىزدىڭ ءاربىر جەتىستىگىمىز – ۇلتىمىزدىڭ كەمەل كەلەشەگىنىڭ كەپىلى. سوندىقتان دا تالماي, تىنباي ەڭبەكتەنىپ, ەركىن ەلدىڭ ەرتەڭى, جارقىن بولاشاعى ءۇشىن ايانباي تەر توگەمىز. ويتكەنى ءبىزدىڭ جەتكەن ءاربىر جەتىستىگىمىز تاۋەلسىزدىككە جاساعان ۇلكەن تارتۋىمىز بولماق. وزگەلەر قازاق جاستارىن كەمەل ءبىلىم, جارقىن باستاما, ۇشقىر وي, جەمىستى جوبالار ارقىلى تانىپ جاتسا, بۇل دا ماڭگىلىك ەلدىڭ ىرگەسىن بەرىك, كەلەشەگىن نۇرلى ەتەر جەمىستى قادامداردىڭ ءبىرى دەپ سانايمىن.
وسىناۋ تاريحي كەزەڭدە ومىرگە كەلىپ, تاۋەلسىزدىكپەن قۇرداس بولىپ قانا قويماي, اتا-بابالارىمىز عاسىرلار بويى اڭساعان ازاتتىقتىڭ اق تاڭىن كوزىمىزبەن كورۋ باقىتى بۇيىرعان بۋىن – ءبىز شىن مانىندە باقىتتى ۇرپاقپىز. ال بابالار اماناتىنا ادال بولۋ – ءبىزدىڭ عۇمىرلىق پارىزىمىز. سول جولدا تىنباي ەڭبەكتەنەمىز. جاستاردىڭ جانىنا جالىن, باستاماسىنا تىڭ سەرپىن سىيلاعان پرەزيدەنتىمىزگە وسى ءۇشىن دە زور العىسىمدى بىلدىرەمىن. بىزگە ءۇمىت ارتقان ماعجانداي بابالارىمىزدىڭ سەنىمىنە داق تۇسىرمەي, ەلىمىزدىڭ ەرتەڭى ءۇشىن ادال ەڭبەك ەتە الساق, ءار جەتىستىگىمىزبەن ۇلتىمىزدىڭ دامۋىنا تامشىداي بولسىن ۇلەسىمىزدى قوسا الساق, بىزدەن اسقان باقىتتى جان بولماق ەمەس.
اليعازى ايدارحانوۆ,
Hi School ونلاين ءبىلىم بەرۋ
ورتالىعىنىڭ جەتەكشىسى
