ۇستىمىزدەگى جىلى قازاقتىڭ حالىق كومپوزيتورى, دالا تسيركىنىڭ نەگىزىن قالاۋشى, ۇلتتىق ات سپورتىنىڭ ءتۇرلى ءتاسىلىن جاڭعىرتۋشى ونەرپاز, جاۋىرىنى جەرگە تيمەگەن الىپ كۇش اتاسى بالۋان شولاق (شىن اتى نۇرماعامبەت) بايمىرزا ۇلىنىڭ ءدۇنيەگە كەلگەنىنە 150 جىل تولادى.
بالۋان شولاق – زامانىندا قازاق ءان ونەرىنىڭ تاماشا ورىنداۋشىسى, ناسيحاتشىسى بولا ءجۇرىپ, ءوزى دە ءان شىعارىپ, قازاقتىڭ ءتول ونەرىن وركەندەتۋگە ءۇلكەن ۇلەس قوسقان سازگەر. ۇلت ماقتانىشىنىڭ جيىرماعا جۋىق ءانى بولعانىمەن, بۇگىنگى كۇندە ونىڭ حالىق اراسىنداعى ناسيحاتى كوڭىل كونشىتە بەرمەيدى. اقىندىق قىرى مۇلدە زەرتتەلمەگەن.
ءتىپتى, بالۋان شولاقتىڭ ءومىربايانى جونىندەگى زەرتتەۋلەر ءالى كۇنگە ناقتىلانباعان. اركىم ءوز دەگەنىمەن ءجۇر. قازاق رۋحانياتى عانا ەمەس, مادەنيەتىنىڭ دە قالىپتاسۋىندا زور ورنى بار تۇلعانىڭ دۇنيەگە كەلگەن جەرى مەن قايتىس بولعان جىلىنا قاتىستى دەرەكتەردى دە ءارتۇرلى ايتىپ ءجۇرمىز.
سونداي-اق, ارداقتى ازاماتتىڭ ءوز ۇلتى ءۇشىن جاساعان كۇرەسكەرلىك قاجىر-قايراتىن قازىرگى ۇرپاقتىڭ بىلە بەرمەيتىنى قىنجىلتادى. ءتىپتى, بولمىسى بولەك, تۇلعاسى ەرەن ۇلت ايبىنىنىڭ ۇلت-ازاتتىق كوتەرىلىسىندەگى ورنى دا انىقتالماعان. كورنەكتى قالامگەر ءسابيت مۇقانوۆتىڭ «بالۋان شولاق» پوۆەسىندە جانە بەلگىلى جازۋشى, دراماتۋرگ دۋلات يسابەكوۆتىڭ «جاۋجۇرەك» تۋىندىسىندا ايتىلعان بايلامدار جەتكىلىكسىز دەپ ەسەپتەيمىز. سوندىقتان, ءالى دە اشىلماعان قىرلارى كوپ داڭقتى بالۋان, ءانشى, اقىن, حالىق كومپوزيتورى بالۋان شولاقتىڭ 150 جىلدىعىندا وسىنداي ولقىلىقتاردىڭ ورنى شامالاپ بولسا دا تولىقتىرىلار دەگەن ءۇمىتىمىز بار. ۇلت تاريحىندا قايتالانباس قادىرلىمىزدىڭ ءومىربايانىن, شىعارماشىلىعىن تولىق زەرتتەپ, لايىقتى باعاسىن بەرسەك, ەلباسىنىڭ حالىققا ارناعان جولداۋىندا كورسەتىلگەن جاڭا قازاقستاندىق ءپاتريوتيزمدى قالىپتاستىرۋ مەن دامىتۋ ىسىنە قوسقان ۇلكەن ۇلەسىمىز بولار ەدى.
سوندىقتان ۇكىمەتتىڭ 1999 جىلعى 28 قىركۇيەكتەگى «مەرەيتويلار مەن اتاۋلى كۇندەردى مەرەكەلەۋ تۋرالى» قاۋلىسىنا سايكەس بالۋان شولاق (نۇرماعامبەت) بايمىرزا ۇلىنىڭ 150 جىلدىعىنا وراي بيلىك ورىندارىنان تومەندەگى ءىس-شارالاردىڭ ورىندالۋىنا ىقپال ەتۋدى سۇرايمىز.
ءبىرىنشى – الماتى قالاسىنداعى بالۋان شولاق سپورت جانە مادەنيەت سارايىنىڭ الدىنا الاش ارىسىنىڭ ەسكەرتكىشىن ورناتۋ. ەكىنشى – اقمولا مەن جامبىل وبلىستارىندا بالۋان شولاقتىڭ مەرەيتويىنا وراي ءىس-شارالار وتكىزۋ. ءۇشىنشى – استانا نەمەسە الماتى قالالارىندا تۇعىرى بيىك تۇلعانىڭ ءومىرى مەن شىعارماشىلىعىنا ارنالعان عىلىمي-تاجىريبەلىك كونفەرەنتسيا ۇيىمداستىرۋ. ءتورتىنشى – اتاقتى بابا تۋرالى كوركەم جانە دەرەكتى فيلم ءتۇسىرىپ, رەسپۋبليكالىق تەلەارنالاردان كورسەتۋ.
ەلى ەرىنە وسىنداي يگىلىكتى ىستەر اتقارسا, ابىرويى اسادى, مارتەبەسى كوتەرىلەدى.
قوجاحان جاباعيەۆ,
پارلامەنت ءماجىلىسىنىڭ دەپۋتاتى.
