قوعام • 07 جەلتوقسان، 2021

ەلوردادا ەرەكشە قاجەتتىلىگى بار جاندار ءۇشىن جۇمىس ورىندارى ۇلعايدى

مۇگەدەكتىگى بار ازاماتتاردى جۇمىسقا ورنالاستىرۋ – وڭالتۋدىڭ ەڭ جاقسى ءتاسىلى. نۇر-سۇلتان قالاسىندا مۇمكىندىگى شەكتەۋلى جانداردىڭ جۇمىسقا ورنالاسۋىنا باعىتتالعان جەڭىلدىكتەر جۇيەسى قاراستىرىلعان. نۇر-سۇلتاندا جىل باسىنان بەرى وسى ساناتتاعى 600-دەن استام جۇمىسپەن قامتاماسىز ەتىلدى. بۇل تۋرالى قالا اكىمدىگىنىڭ رەسمي سايتى حابارلادى، دەپ جازادى Egemen.kz.

بوتاكوز باقبەرگەن

قازاقستان زاڭناماسىنا سايكەس ءار ازاماتتىڭ ەڭبەك ەتۋگە قۇقىلى. ونىڭ ىشىندە مۇمكىندىگى شەكتەۋلى جاندار دا بار. ءى-ءىى توپ ساناتىنداعىلار مەديتسينالىق كوميسسيادان رۇقسات الۋى كەرەك. سەبەبى جۇمىسقا ورنالاسقاندا مۇگەدەكتىگى بار ادام دەنى ساۋ اداممەن تەڭ سانالادى. جۇمىس ىستەيتىن مۇگەدەكتەردىڭ ەڭبەك قۇقىعىن جۇزەگە اسىرۋعا، قاۋىپسىز جۇمىس ىستەۋگە قولايلى جاعداي جاساۋ، جۇمىسقا ورنالاسۋعا باعىتتالعان جەڭىلدىكتەر جۇيەسى قاراستىرىلعان.

مۇگەدەكتىگى بار ازاماتتاردى جۇمىسقا ورنالاستىرۋ – وڭالتۋدىڭ ەڭ جاقسى ءتاسىلى. ول ماتەريالدىق تاۋەلسىزدىكتى، جانە ەڭ ماڭىزدىسى – قوعامدا ءوز ورنىن تابۋدى كوزدەيدى»، دەلىنگەن حالىقتى جۇمىسپەن قامتۋ ورتالىعىنىڭ حابارلاماسىندا.

جىل باسىنان بەرى 649 مۇگەدەكتىگى بار ازامات حالىقتى جۇمىسپەن قامتۋ ورتالىعىنىڭ كومەگىنە جۇگىندى. 644-ءى جۇمىسقا ورنالاستى. ونىڭ ىشىندە 302-ءسى تۇراقتى جۇمىسقا تۇردى. اتاپ ايتقاندا، «جۇمىسپەن قامتۋدىڭ جول كارتاسى» بويىنشا – 2، «جاستار پراكتيكاسى» ارقىلى –14، «الەۋمەتتىك جۇمىس ورىندارى» ارقىلى – 19، «قوعامدىق جۇمىستار» – 284، «العاشقى جۇمىس ورنى» جوباسى اياسىندا 4 ادام جۇمىس ىستەيدى.

ەڭبەك نارىعىندا سۇرانىسقا يە كاسىپ مەڭگەرگىسى كەلەتىن جۇمىسسىز ازاماتتار ءۇشىن ۇيىمداستىرىلاتىن قىسقا مەرزىمدى كاسىپتىك وقۋ كۋرستارىنا بيىل مۇگەدەكتىگى بار 8 ادام جىبەرىلدى.

«ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋعا ارنالعان باعدارلاما اياسىندا جاڭا بيزنەس يدەيالاردى ىسكە اسىرۋ ءۇشىن حالىقتىڭ الەۋمەتتىك وسال توپ وكىلدەرىنە مەملەكەتتىك گرانت بەرىلەدى. نۇر-سۇلتان قالاسى بويىنشا مۇمكىندىگى شەكتەۋلى 11 ازامات گرانت الىپ جەكە كاسىپ اشتى.

قازىر، قىزمەت سالالارىن اۆتوماتتاندىرۋعا بايلانىستى مۇگەدەكتەرگە ارنالعان جۇمىس تۇرلەرىنىڭ ءتىزىمى كەڭەيدى. مۇگەدەكتىگى بار ادامدارعا ۇسىنىلاتىن كاسىپتەر مەن ماماندىقتاردىڭ اتلاسى» ازىرلەندى. وندا 16 مىڭنان استام جۇمىس بار.

حالىقتى جۇمىسپەن قامتۋ ورتالىعى جۇمىس بەرۋشىلەرمەن بىرلەسە مۇمكىندىگى شەكتەۋلى جانداردى جۇمىسقا ورنالاستىرۋ ءۇشىن ارنايى جۇمىس ورىندارىن قۇرۋدى ۇيىمداستىرادى. مۇگەدەكتەردى جۇمىسپەن قامتۋعا ارنالعان ارنايى جۇمىس ورىندارى – مۇگەدەكتىگى بار ازاماتتىڭ جەكە مۇمكىندىكتەرىن ەسكەرە وتىرىپ جابدىقتالعان جۇمىس ورىندارى.

ارنايى جۇمىس ورىندارىن قۇرۋ كەزىندە جابدىقتى الۋ جانە مونتاجداۋ جۇمىستارىنا كەتكەن شىعىندار جۇمىس بەرۋشىلەرگە مەملەكەتتىك بيۋدجەتتەن سۋبسيديالاۋ ارقىلى بەرىلەدى.

الەۋمەتتىك وسال توپ ساناتىنداعى ازاماتتاردى جۇمىسقا ورنالاستىرۋ بويىنشا قوسىمشا اقپاراتتى بايلانىس تەل.-75-93-41، 95-44-23; ۇيالى تەل.:+7 775 902 73 53; +7 705 318 9792 نومەرلەرى بويىنشا بىلۋگە بولادى. مەكەنجايى: «نۇر-سۇلتان قالاسى اكىمدىگىنىڭ حالىقتى جۇمىسپەن قامتۋ ورتالىعى» كمم، بەيبىتشىلىك كوشەسى-25، «وركەن» بيزنەس ورتالىعى.