نۇرسۇلتان نازارباەۆ اتالعان ماقالادا ەگەمەندىكتىڭ ەل ءۇشىن قۇندىلىعىن باعامداپ, تاۋەلسىزدىككە ءتاي-ءتاي قادام باسقان كۇردەلى كەزەڭدەر مەن تاريحي, تاعدىرلى ساتتەردى ەسكە الدى.
ەلباسى ەلدەگى پرەزيدەنتتىك بيلىك اۋىسقان كەزەڭ جايىندا دا تىلگە تيەك ەتتى.
«وسىدان ەكى جارىم جىل بۇرىن ەلىمىزدە پرەزيدەنتتىك بيلىك اۋىستى. ماعان: «اتا زاڭىمىزدا سىزگە ەشقانداي شەكتەۋلىلىك جوق. سوڭعى سايلاۋدا حالىقتىڭ 98%-ىنا جۋىعىنىڭ قولداۋىنا يە بولدىڭىز. قىزمەتىڭىزدى اتقارا بەرىڭىز», دەۋشىلەر از بولعان جوق. بىراق ءار نارسە ءوز رەتىمەن بولۋى كەرەك», دەدى نۇرسۇلتان نازارباەۆ.
ول سونداي-اق, قازاقستان تىزگىنىن ۇستاعان ەكىنشى تۇلعانىڭ دا كەزدەيسوق ۇسىنىلماعانىن ايتتى.
«وتىز جىلعا جۋىق ەل باسقارعان كەزىمدە مەن جانىما قانشاما ازاماتتى سەرىك ەتىپ, كوپتەگەن شاكىرت تاربيەلەدىم. سولاردىڭ ىشىندە ۇكىمەت باسقارعان, بىرىككەن ۇلتتار ۇيىمى باس حاتشىسىنىڭ ورىنباسارى رەتىندە جاھاندىق ساياساتقا جەتىكتىگىن تانىتقان, تاۋەلسىزدىكتىڭ العاشقى جىلدارىنان باستاپ قاسىمنان تابىلعان ناعىز پاتريوت, جوعارى بىلىكتى كاسىپقوي تۇلعا قاسىم-جومارت كەمەل ۇلى توقاەۆتى پرەزيدەنتتىك قىزمەتكە ۇسىندىم. سايلاۋدا حالىقتىڭ باسىم كوپشىلىگى ونى قولدادى. وسىلايشا, ءبىز حالقىمىزدىڭ اۋىزبىرلىگىن, ساياساتتاعى ساباقتاستىعىمىزدى كۇللى الەم قوعامداستىعىنا تاعى ءبىر قىرىنان تانىتا بىلدىك», دەدى ەلباسى.
