گرۋزيانىڭ بىرنەشە مىڭ ازاماتى ادامنىڭ كوروناۆيرۋسقا قارسى مارتەبەسىن انىقتايتىن «جاسىل تولقۇجاتتار» جۇيەسىن ەنگىزۋگە نارازىلىق ءبىلدىرىپ, تبيليسي استاناسىنىڭ ورتالىق داڭعىلدارى بويىمەن شەرۋ وتكىزدى.
«جاسىل تولقۇجات» نەمەسە «كوۆيد-پاسپورت» - ازاماتتىڭ كوۆيد-مارتەبەسى تۋرالى مالىمەتتەر ەنگىزىلەتىن ەلەكتروندىق قۇجات سانالادى. وعان ۆاكتسيناتسيانىڭ تولىق كۋرسىنان ءوتۋ, اۋرۋدىڭ مەرزىمى, پتر-تەست ناتيجەلەرى توپتاستىرىلعان. گرۋزيادا «جاسىل تولقۇجاتتار» جۇيەسى 1 جەلتوقساننان باستاپ جۇمىس ىستەي باستادى. ەندى قوعامدىق ورىندارعا, مەيرامحانالارعا, ويىن-ساۋىق جانە ساۋدا ورتالىقتارىنا تەك QR-كودپەن بارۋعا بولادى.
اكتسياعا قاتىسۋشىلار جاڭا جۇيەنى ەنگىزۋدى «ديسكريميناتسيا جانە ۆاكتسيناتسياعا ماجبۇرلەۋ» دەپ سانايدى.
نارازىلىق بىلدىرۋشىلەر بيلىك تولقۇجات ءتۇرىن جويعانعا دەيىن نارازىلىقتى ودان ءارى جالعاستىرۋدى جوسپارلاپ وتىر.
