«قۇرمەتتى حازىرەت, ەڭ الدىمەن ءسىزدى نۇر-سۇلتان قالاسىندا سالىنىپ جاتقان ەلوردا باس مەشىتىنىڭ اشىلۋىنا ارنايى شاقىرامىن. تۇركى جۇرتىنا ورتاق دۇنيە كوپ. ونىڭ ىشىندە ءتىلى مەن ءدىلى, مادەنيەتىمىز ۇقساس. وسى ورايدا تۇركى تىلدەس ەلدەردىڭ مۇفتيلەر القاسىن قۇرىپ, العاشقى وتىرىسىن تۇركى الەمىنىڭ استاناسى اتانعان تۇركىستان قالاسىندا ۇيىمداستىرۋدى ۇسىنعالى وتىرمىن. سونداي-اق قمدب جانىنداعى عۇلامالار كەڭەسى مەن تۇركيا ءدىن ىستەرى باسقارماسى جانىنداعى عۇلامالار كەڭەسىنىڭ تاجىريبە الماسۋىن ۇيىمداستىرۋ ماقساتىندا تۇركيادا كەڭەس جيىنىن بىرىگىپ وتكىزسەك دەگەن جوسپارىمىز بار», دەدى باس ءمۇفتي سوزىندە.
تۇركيا ءدىن ىستەرى باسقارماسىنىڭ توراعاسى ءالي ەرباش ناۋرىزباي قاجى تاعان ۇلىنىڭ ۇسىنىسىن قولدايتىنىن ايتىپ, تۇركى تىلدەس ەلدەر ءدىن باسشىلارىنىڭ جيىنىن وتكىزۋ, عۇلامالار كەڭەسى اراسىندا بايلانىس ورناتۋ يدەياسى وزەكتى ماسەلەلەردىڭ ءبىرى ەكەنىن جەتكىزدى. سونداي-اق تۇركيا ءمۇفتيى ناۋرىزباي قاجى تاعان ۇلىنىڭ قازاقستانعا قۇرمەتتى قوناق رەتىندە شاقىرتۋىن قابىل الدى.
