ايماقتار • 02 جەلتوقسان، 2021

مۇعالجار اۋدانىندا زاماناۋي سپورت كەشەنى اشىلدى

67 رەت كورسەتىلدى

اقتوبە وبلىسىنىڭ مۇعالجار اۋدانىندا زاماناۋي كوپفۋنكتسيونالدى سپورت كەشەنى اشىلدى. سپورت كەشەنىنىڭ اشىلۋى قر تۇڭعىش پرەزيدەنتى كۇنىنە ورايلاستىرىلعان، دەپ حابارلايدى Egemen.kz.

1800 شارشى مەتردى قۇرايتىن زاماناۋي كەشەن شاعىن فۋتبول، ۆولەيبول، باسكەتبول جانە تەننيس الاڭدارىن، كۇرەس كىلەمى، بوكس رينگى جانە ەكى جولاقتى جۇگىرۋ جولدارىن قامتيدى. قالا تۇرعىندارىنىڭ ىڭعايىنا وراي شەشىنەتىن بولمەلەر مەن جانكۇيەرلەردىڭ جىلجىمالى تريبۋنالارى دا ورناتىلدى.

جاڭا سپورتتىق مەكەمە سالاۋاتتى ءومىر سالتىن ۇستانۋعا نيەت بىلدىرگەندەر ءۇشىن بارلىق قاجەتتى قۇرال-جابدىقتارمەن جابدىقتالعان. ولاردىڭ ىشىندە ۆولەيبول، شاعىن فۋتبول، باسكەتبول دوپتارى، تەننيس راكەتكالارى مەن شارلار بار.

كەشەن اۋا رايىنا قاراماستان جىل بويى جۇمىس ىستەيتىن بولادى. ورتالىق انكەرلىك جۇيەنىڭ كومەگىمەن نەگىزگە بەكىتىلگەن ەكى قاباتتى اۋا وتكىزبەيتىن مەمبرانامەن جابىلعان. بۇل ديزاين قىس مەزگىلىندە جىلۋدى، ال جازدىڭ اپتاپ ىستىعىندا سالقىندىقتى ساقتاۋعا مۇمكىندىك بەرەدى.

1

«قۇرمەتتى مۇعالجار اۋدانىنىڭ تۇرعىندارى! سىزدەردى تۇڭعىش پرەزيدەنت كۇنىمەن شىن جۇرەكتەن قۇتتىقتايمىن! تۇڭعىش پرەزيدەنتىمىزگە، سىزدەرگە جانە جاقىندارىڭىزعا اماندىق، زور دەنساۋلىق جانە باقىت تىلەيمىن! ءبىزدىڭ وتانىمىز - قازاقستان رەسپۋبليكاسى دامىپ، نىعايىپ، گۇلدەنە بەرسىن! ءبىزدىڭ بارلىق باستامالارىمىز ناتيجەلى، ال بولاشاعىمىز جارقىن بولسىن! بۇگىنگى ءىس-شارانىڭ قاتىسۋشىلارىنا شىن جۇرەكتەن ساتتىلىك جانە تابىس تىلەيمىن. سىزدەرگە جاڭا رەكوردتار مەن لايىقتى ماراپاتتار تىلەيمىن، سپورت دەنساۋلىعىڭىزدى نىعايتىپ، قۋانىش پەن قاناعات، وزىڭىزگە دەگەن سەنىم مەن باقىت سىيلاسىن»، دەدى اقتوبە وبلىسى اكىمىنىڭ ءبىرىنشى ورىنباسارى رۋسلان حامباروۆ ءوزىنىڭ قۇتتىقتاۋ سوزىندە.

ايتا كەتسەك، بۇل سپورت كەشەنى «Samruk-Kazyna Trust» الەۋمەتتىك جوبالاردى دامىتۋ قورىمەن اشىلدى.

«بۇل ءبىزدىڭ اۋقىمدى جوبامىزعا باستاۋ بولاتىن العاشقى ءىس-شارا. 2022 جىلعا دەيىن جوبا اياسىندا 11 وڭىردە وسىنداي سپورت كەشەندەرىنىڭ اشىلۋى جوسپارلانۋدا. بۇل باستاما كەم دەگەندە 35 مىڭ ادامدى قامتيتىن بولادى. ءبىزدىڭ قورىمىز ەلىمىزدە بۇقارالىق سپورتتى دامىتۋعا ۇلكەن كوڭىل بولەدى. مۇمكىن ءدال وسى جەردە بولاشاق وليمپيادا جۇلدەگەرلەرى مەن الەم چەمپيوندارى تاربيەلەنەتىن شىعار»، دەدى «Samruk-Kazyna Trust» قورىنىڭ باس ديرەكتورىنىڭ ورىنباسارى سەرعوجا قالياسقاروۆ.

1

سوڭعى جاڭالىقتار

شابىت پەن شاراپ

ادەبيەت • بۇگىن، 22:13

ديلەتانتتان داۋىرگە دەيىن

ادەبيەت • بۇگىن، 21:57

ەرتەڭ اۋا رايى قانداي بولادى؟

قازاقستان • بۇگىن، 16:20

اندرادەنى مۋنگيا الماستىرۋى مۇمكىن

كاسىپقوي بوكس • بۇگىن، 14:25

ۇقساس جاڭالىقتار