ەكسپو-نىڭ ءال-ۆاسل پلازا ورتالىق الاڭىندا قر پرەمەر-ءمينيسترى ا. مامين مەن تولەرانتتىلىق جانە قاتار ءومىر ءسۇرۋ ماسەلەلەرى جونىندەگى مينيستر, «EXPO 2020 Dubai» باس كوميسسارى شەيح ناحايان بين مۋباراك ءال ناحاياننىڭ قاتىسۋىمەن قازاقستان رەسپۋبليكاسىنىڭ ۇلتتىق تۋىن كوتەرۋ ءراسىمى ءوتتى.
ۇكىمەت باسشىسى قازاقستاندىق ساۋدا-ينۆەستيتسيالىق فورۋمعا قاتىستى, وندا 100-گە جۋىق ادام – قر مەن ءباا مەملەكەتتىك ورگاندارىنىڭ, ىسكەرلىك ورتالارىنىڭ, ۇلتتىق حولدينگتەرى مەن دامۋ ينستيتۋتتارىنىڭ وكىلدەرى باس قوستى.
«بۇگىنگى تاڭدا قازاقستان مەن بىرىككەن اراب امىرلىكتەرى اراسىنداعى قارىم-قاتىناس ساپالى جاڭا دەڭگەيگە كوتەرىلدى. 1991 جىلدان باستاپ ءباا قر ەكونوميكاسىنا $4 ملرد استام ينۆەستيتسيا سالدى. قازاقستاندا ءباا كاپيتالىنىڭ قاتىسۋىمەن 250-دەن استام كومپانيا جۇمىس ىستەيدى. جاھاندىق ەكونوميكادا ساقتالىپ وتىرعان سىن-تەگەۋرىندەرگە قاراماستان, ەلدەرىمىزدىڭ ىنتىماقتاستىعى نىعايا تۇسۋدە», دەدى ا. مامين فورۋمنىڭ پلەنارلىق سەسسياسىندا سويلەگەن سوزىندە.
ۇكىمەت باسشىسى ەكىجاقتى قارىم-قاتىناستاعى ماڭىزدى وقيعا بيىلعى قازان ايىندا ەكونوميكانىڭ باسىم سالالارىندا جوبالاردى دامىتۋ بويىنشا ۇزاقمەرزىمدى ستراتەگيالىق سەرىكتەستىك ورناتۋ تۋرالى ۇكىمەتارالىق كەلىسىمگە قول قويۋ بولعانىن اتاپ ءوتتى. قۇجات قر ۇلتتىق ەكونوميكاسىنىڭ ەنەرگەتيكالىق, اگروونەركاسىپتىك, كولىك-لوگيستيكالىق فارماتسەۆتيكالىق جانە قارجى سەكتورلارىنداعى جوبالاردى ىسكە اسىرۋعا باعىتتالعان, ينۆەستيتسيالاردىڭ جالپى كولەمى $6 ملرد-تان اسادى.
فورۋمنىڭ پلەنارلىق سەسسياسىندا ەنەرگەتيكا ءمينيسترى ماعزۇم مىرزاعاليەۆ, «سامۇرىق-قازىنا» اق باسقارما توراعاسى الماسادام ساتقاليەۆ, ءباا ەنەرگەتيكا جانە ينفراقۇرىلىم ءمينيسترى سۋحەيل ءال-مازرۋي, ءباا مەملەكەتتىك ءمينيسترى احمەد الي ءال-سايەح جانە ت. ب. ءسوز سويلەدى.
فورۋم قورىتىندىسى بويىنشا «سامۇرىق-قازىنا» اق مەن Abu Dhabi Developmental Holding Company (ADQ) تاۋەلسىز قورى اراسىندا ستراتەگيالىق ىنتىماقتاستىق تۋرالى كەلىسىمگە, سونداي-اق قر-دا جالپى قۋاتتىلىعى 4 گۆت بولاتىن كۇن جانە جەل ەلەكتر ستانتسيالارىن سالۋ بويىنشا ينۆەستيتسيالىق قۇجاتتارعا قول قويىلدى.
قازىرگى ۋاقىتتا امىرلىكتەر كومپانيالارى قازاقستاندا جالپى قۇنى $3,5 ملرد-تان اساتىن 11 ءىرى ينۆەستيتسيالىق جوبانى ىسكە اسىرۋعا قاتىسىپ جاتىر.
قر پرەمەر-ءمينيسترى ا. مامين دۋباي قالاسىنا ساپارى اياسىندا «QazTrade» ساۋدا ساياساتىن دامىتۋ ورتالىعى» اق تسيفرلىق كورمەسىمەن تانىسىپ, «EXPO 2020 Dubai» كورمەسىنىڭ تاقىرىپتىق پاۆيلوندارىن ارالادى, سونداي-اق ءباا جەتەكشى كومپانيالارىنىڭ باسشىلىعىمەن كەلىسسوزدەر جۇرگىزدى.
قازاقستاننىڭ ۇلتتىق كۇنىن مەرەكەلەۋ بارىسىندا EXPO اۋماعىندا دۇنيەجۇزىلىك كورمە قوناقتارى ءۇشىن ن. تىلەنديەۆ اتىنداعى «وتىرار سازى» اكادەميالىق فولكلورلىق-ەتنوگرافيالىق وركەسترىنىڭ, وپەرا ءانشىسى ماريا مۋدرياكتىڭ, «استانا بالەت» ۇجىمىنىڭ جانە قازاقستاننىڭ باسقا دا ارتىستەرىنىڭ قاتىسۋىمەن كونتسەرت ءوتتى.
