بۇل جونىندە Nur Otan پارتياسى وڭىرلىك فيليالى جانىنداعى ءبىلىم مەن عىلىمدى دامىتۋدىڭ ايماقتىق قوعامدىق كەڭەسى وتىرىسىندا تالقىلاندى. وبلىستىق جانە قالالىق ءماسليحات دەپۋتاتتارى, كوللەدج جانە جوو وقىتۋشىلارى, بىرقاتار كاسىپورىن باسشىلارى قاتىسقان قوعامدىق كەڭەستىڭ كوشپەلى وتىرىسى ەلىمىزدەگى ەڭ تاڭداۋلى 10 كوللەدج قاتارىنداعى اقتوبە جوعارى پوليتەحنيكالىق كوللەدجىندە ءوتتى. جارتى عاسىردان استام تاريحى بار وسى وقۋ ورنى ءبىلىم ساپاسى, تۇلەكتەرىنىڭ جۇمىسقا ورنالاسۋ كورسەتكىشى جاعىنان الدىڭعى قاتاردا, جاقسى جابدىقتالعان وقۋ-ماتەريالدىق بازاسى بار – ءارى جۇمىسشى ماماندىعىنا دۋالدى وقىتۋ جۇيەسىن ءتيىمدى ەنگىزگەن.
وبلىستىق ءبىلىم باسقارماسىنىڭ دەرەگى بويىنشا, وڭىردەگى 42 تەحنيكالىق جانە كاسىپتىك ءبىلىم بەرۋ ۇيىمدارىندا 23 128 ستۋدەنت ءبىلىم السا, ونىڭ 14 880-ءى مەملەكەتتىك تاپسىرىسپەن وقيدى. بۇگىندە وسى 42 كوللەدجدە 100 ماماندىققا وقىتىلادى. مۇنداعى ستۋدەنتتەر سانى دا ءارتۇرلى. ماسەلەن, 17 كوللەدجدىڭ ستۋدەنتتەر سانى 300-گە جەتپەسە, ال 14 كوللەدجدەگى ءبىلىم الۋشىلار سانى 600-دەن اسادى. وسىدان كورىنىپ تۇرعانداي, يگەرىلەتىن ماماندىق سانى كوپ, ال ساپاسىنا كەلگەندە سۇراق تۋىنداپ تۇر. ماسەلەن, وبلىستاعى بىرنەشە كوللەدجدىڭ وقۋ باعىتىنا ساي ەمەس ماماندىقتارمەن وقىتىپ جاتقانى انىقتالدى. وسى وقۋ ورىندارى مەملەكەتتىك تاپسىرىس الماسا دا, اقىلى نەگىزدە بەيىنىنە جاتپايتىن ماماندىقتار اشقان. بۇل ماسەلەگە قوعامدىق كەڭەس مۇشەلەرى ەرەكشە نازار اۋدارىپ, جەرگىلىكتى ەڭبەك نارىعى سۇرانىمىنا ساي ماماندىقتاردى ىرىكتەپ قالدىرۋدى ۇسىنىس ەتتى. ءبىر قۋانتارلىعى, سوڭعى ءۇش جىلدان بەرى اقتوبە وبلىسىندا تەحنيكالىق جانە كاسىپتىك ءبىلىم الۋعا ىقىلاستىلار سانى وسكەن. وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆانىڭ بايانداۋىنشا, تەحنيكالىق جانە كاسىپتىك ءبىلىم بەرۋ ۇيىمدارىنا مەملەكەتتىك تاپسىرىس ءبىلىم, مەديتسينا, فارماتسەۆتيكا, مادەنيەت جانە ونەر, سەرۆيس, ەكونوميكا جانە باسقارۋ, مەترولوگيا, مۇناي-گاز ءوندىرىسى جانە حيميا ءوندىرىسى ماماندىقتارىنا بەرىلدى.
سوڭعى جىلدارى ستۋدەنتتەردىڭ ءبىلىم ساپاسىن ارتتىرۋ جانە كاسىپتىك داعدىلارىن قالىپتاستىرۋ ماقساتىندا بىرنەشە كوللەدجگە اكادەميالىق ەركىندىك بەرىلدى. مۇنىڭ ءمانىسى – ەندىگى جەردە وقۋ باعدارلاماسىن جۇمىس بەرۋشىلەرمەن كەلىسىپ ازىرلەۋگە بولادى جانە كەي ماماندىق دۋالدى تۇردە وقىتىلادى.
بۇل كۇندەرى جەرگىلىكتى ەڭبەك نارىعىندا اسپاز, قۇرىلىسشى, سىلاقشى, داياشى, كونديتەر ماماندىقتارىنا سۇرانىس وتە جوعارى. جۇمىس بەرۋشىلەر پاندەميا كەزىندە دە وسى ماماندىقتار بويىنشا ديپلوم العان تۇلەكتەردى تاجىريبەدەن ءوتۋ ارقىلى جۇمىسقا قابىلداۋدان باس تارتقان جوق.
ءبىلىم مەن عىلىمدى دامىتۋدىڭ وڭىرلىك كەڭەسى جيىنىنا قاتىسۋشىلار ءبىلىم ساپاسى جوعارى, تۇلەكتەرىنىڭ جۇمىسقا ورنالاسۋى بويىنشا ەلىمىزدەگى تەحنيكالىق جانە كاسىپتىك ءبىلىم بەرۋ ۇيىمدارىنىڭ ۇزدىك وندىعىنا كىرەتىن پوليتەحنيكالىق كوللەدج ۇجىمىنىڭ تاجىريبەسىن باسقا وقۋ ورىندارىنا ۇلگى رەتىندە تاراتۋدى ۇسىندى. سەبەبى وسى وقۋ ورنىنىڭ جۇمىس بەرۋشىلەرمەن بايلانىسى بەرىك, ستۋدەنتتەردىڭ تاجىريبەدەن ءوتۋى مەن جۇمىسقا ورنالاسۋ كورسەتكىشى جوعارى. كوللەدج مۇناي, ەلەكتر ءوندىرىسى ماماندارىمەن قوسا, IT ماماندارىن دا دايارلايدى.
«پارتيانىڭ اقتوبە وبلىسى بويىنشا جول كارتاسىندا بىلىمگە قاتىستى 12 ينديكاتور بار. ونىڭ ىشىندە وڭىرىمىزدە تەحنيكالىق, كاسىپتىك ءبىلىم بەرۋدى دامىتۋ مەن دۋالدى تۇردە وقيتىن ستۋدەنتتەر سانىن 74 %-عا ارتتىرۋ جوسپارلانعان. بۇگىندە وڭىردەگى 42 كوللەدجدىڭ تەڭ جارتىسىندا دۋالدى وقىتۋ جۇيەسى ەنگىزىلگەن. ءبىزدىڭ ماقساتىمىز – وسى وقۋ ورىندارىنىڭ جۇمىسىنا مونيتورينگ جۇرگىزۋ», دەدى Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى ەربول داناعۇلوۆ.
اقتوبە جوعارى پوليتەحنيكالىق كوللەدجى «جاس مامان» جوباسى بويىنشا جاريالانعان گرانتتىڭ جەڭىمپازى. جوبا قورىتىندىسى بويىنشا ءبىلىم ساپاسى, تۇلەكتەرىنىڭ جۇمىسقا ورنالاسۋى جاعىنان ۇزدىك ناتيجە كورسەتكەن 10 كوللەدجدىڭ وقۋ-ماتەريالدىق بازاسىن جاڭعىرتۋعا وبلىستىق بيۋدجەتتەن 2020 جىلى 1,6 ملرد, 2021 جىلى 1,2 ملرد تەڭگە قارجى بولىنگەن ەدى.
وسى كەزگە دەيىن ەلىمىزدەگى تەحنيكالىق جانە كاسىپتىك ءبىلىم بەرۋ ۇيىمدارىنىڭ وقۋ پروتسەستەرىنە باقىلاۋ جەتكىلىكسىز جۇرگىزىلدى. جوعارىدا ايتىپ كورسەتكەنىمىزدەي, باسەكەگە قابىلەتسىز, كاسىبي دايارلىعى ءالسىز ستۋدەنتتەرى كوپ ءبىلىم بەرۋ ۇيىمدارىنىڭ جۇمىستارى سارالانىپ, وسى وقۋ ورىندارىنىڭ رەيتينگى تۇزىلگەنى ءجون. بۇل ەڭ الدىمەن وقۋ ورنىنا كەلگەن ستۋدەنتتى ومىردەن ءوز ورنىن تابا الماۋدان ساقتاۋدىڭ ەڭ توتە جولى. ونىڭ ۇستىنە, پاندەميادان كەيىن ەڭبەك نارىعى دا كۇردەلى وزگەرىسكە ءتۇسىپ جاتىر. بۇگىندە قاي سالاعا دا قولىنان جۇمىس كەلەتىن, ءبىلىمدى ءارى باسەكەگە قابىلەتتى مامان كەرەك. جەتكىلىكتى تۇردە ءبىلىم الماعان, كاسىبي داعدىسى جوق, بىراق ديپلومى بار جاس قازىرگى كەزدە جۇمىسسىزدار قاتارىنا بىردەن ەنەدى. وسىلايشا ءبىلىمى تومەن, ءوز ماماندىعىن دۇرىس تاڭداماعان, كاسىبي داعدىسى از جاستار الەۋمەتتىك نارازى توپتىڭ قاتارىن تولتىرادى.
جيىن قورىتىندىسىندا ءبىلىم جانە عىلىمدى دامىتۋدىڭ وڭىرلىك كەڭەسى مۇشەلەرى وبلىستىق ءبىلىم سالاسىندا ساپانى قامتاماسىز ەتۋ دەپارتامەنتىنىڭ تەحنيكالىق جانە كاسىپتىك ءبىلىم بەرۋ ۇيىمدارىنا جۇرگىزگەن مونيتورينگ قورىتىندىسىن باسشىلىققا الىپ, بىرنەشە ۇسىنىس ازىرلەدى. ەڭ الدىمەن ستۋدەنتتەر سانى از, جەكە عيماراتى جوق, وقۋ-زەرتحانالىق بازاسى وتە ءالسىز, بەيىنىنە جاتپايتىن ماماندىقتار دايارلاپ جاتقان وقۋ ورىندارىنىڭ جۇمىسىنا مونيتورينگ جۇرگىزۋ قاجەت. قوعامدىق كەڭەس مۇشەلەرى الداعى ۋاقىتتا وڭىردەگى ەڭ ءالسىز كوللەدج بازاسىندا وسى ماسەلەنى تاعى ءبىر رەت تالقىلاۋعا شەشىم قابىلدادى.
اقتوبە وبلىسى
