زاماناۋي الەمدەگى نارىقتا مۇمكىندىگى شەكتەۋلى ادامداردىڭ ءومىرىن ەداۋىر جەڭىلدەتىپ, ولاردىڭ اۆتونومياسىن كەڭەيتەتىن كوپتەگەن قۇرالدار جەتەرلىك. جاساندى ينتەللەكتكە نەگىزدەلگەن تەحنولوگيالار ءبىزدىڭ كۇندەلىكتى ومىرىمىزدە كەڭىنەن قولدانىلادى. جاساندى ينتەللەكت ءتىپتى قاتەرلى ىسىك اۋرۋىن دياگنوستيكالاۋ جانە مۇگەدەكتەر ءۇشىن ينكليۋزيۆتى ورتا قۇرۋ سياقتى مامانداندىرىلعان سالالاردا كەڭىنەن قولدانىلادى.
يۋنەسكو مالىمەتتەرى بويىنشا, اشتىق پەن كليماتتىڭ وزگەرۋى سياقتى پروبلەمالارمەن كۇرەسۋدە جاساندى ينتەللەكتتى قولدانۋ - ۋاقىت تالابى. دەسە دە, يۋنەسكو بۇل تەحنولوگيالار «بۇرىن-سوڭدى بولماعان پروبلەمالاردى» تۋدىرۋى مۇمكىن دەپ ەسكەرتەدى.
ء«بىز گەندەرلىك جانە ەتنيكالىق تۇرعىدان تەرىس ۇعىم كورىنىستەرىن, سونداي-اق جەكە ءومىر مەن بوستاندىقتىڭ بۇزىلۋىن, جاپپاي باقىلاۋ قاۋپىن جانە قۇقىق قورعاۋ ورگاندارىنىڭ جاساندى ينتەللەكت تەحنولوگياسىن تەرىس پايدالانۋىن بايقاپ جاتىرمىز. وسى ۋاقىتقا دەيىن تەرىس پايدالانۋدى شەكتەيتىن ادىستەر, بىرەگەي ستاندارتتار بولماعان», دەلىنگەن يۋنەسكو مالىمدەمەسىندە.
يۋنەسكو-عا مۇشە ەلدەر قابىلداعان قۇجات جاساندى ينتەللەكت تەحنولوگياسىنىڭ ەتيكالىق دامۋىن قامتاماسىز ەتۋ ءۇشىن قۇقىقتىق ينفراقۇرىلىم قالىپتاستىرۋعا باعىتتالعان.
«الەمگە بەلگىلى ءبىر جاساندى ينتەللەكتتى قولدانۋ ەرەجەلەرى قاجەت. ءبىز قابىلداعان قۇجات الەمدە العاشقى جاھاندىق نورماتيۆتىك بازا ورناتىپ, مەملەكەتكە ونى قولدانعانى ءۇشىن جاۋاپكەرشىلىك جۇكتەيدى», دەدى يۋنەسكو باس ديرەكتورى ودري ازۋلە.
