مەديتسينا • 28 قاراشا، 2021

ەلىمىزدە توموگرافيا قىزمەتتەرىن كورسەتۋ كولەمى ۇلعايدى

164 رەت كورسەتىلدى

ەلىمىزدە كومپيۋتەرلىك جانە ماگنيتتىك-رەزونانستىق توموگرافيا قىزمەتتەرىن تەگىن كورسەتۋ كولەمى ارتتى. بۇل تۋرالى «الەۋمەتتىك مەديتسينالىق ساقتاندىرۋ قورى» كەاق نۇر-سۇلتان قالالىق فيليالى ءمالىم ەتتى، دەپ حابارلايدى Egemen.kz.

«قازىرگى ۋاقىتتا ءمامس جۇيەسى ارقىلى كوپتەگەن مەديتسينالىق قىزمەتتەردى الۋ قولجەتىمدى. ەلىمىزدە ونكولوگيالىق جانە جۇرەك-قان تامىرلارى اۋرۋلارىنىڭ ايتارلىقتاي جوعارى كورسەتكىشتەرىن، سونداي-اق كوروناۆيرۋستىق ينفەكتسياسىمەن اۋىرعان ناۋقاستار كورسەتكىشىن ەسكەرسەك، كومپيۋتەرلىك جانە ماگنيتتىك-رەزونانستىق توموگرافيا قىزمەتتەرىنىڭ ازاماتتاردىڭ دياگنوستيكالىق تەكسەرۋدەن ءوتۋى ءۇشىن قانشالىقتى سۇرانىسقا يە ەكەندىگى بەلگىلى. بيىل وسى كت/مرت بويىنشا قىزمەت كورسەتۋشىلەر سانى 26 جانە 21 پايىزعا ارتتى»، دەپ اتاپ وتەدى قور فيليالىنان.

مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزگەنگە دەيىن كت جانە مرت قىزمەتتەرىن ۇسىنۋ تۇراقتى تۇردە قارجىلاندىرىلمايتىن. ءوز ايماعىنىڭ اۋرۋحاناسىندا نەمەسە ەمحاناسىندا كەزەكتە تۇرعان ازاماتتار كت نەمەسە مرت-دان ءوتۋ مۇمكىندىگىن كەيدە بىرنەشە ايلار بويى كۇتەتىن. ال 2020 جىلى كت بويىنشا الەۋمەتتىك مەديتسينالىق ساقتاندىرۋ قورىنىڭ قىزمەت كورسەتۋشىلەرى 135 مەديتسينالىق ۇيىم بولسا، بيىل 190 مەديتسينالىق ۇيىم بار.

وتكەن جىلى مرت قىزمەتىن جەتكىزۋشىلەر سانى 95 بولسا، بيىلعى جىلى 121 مەديتسينالىق ۇيىم اتالعان دياگنوستيكا بويىنشا قىزمەت كورسەتەدى.

«بۇل ءۇردىس الداعى جىلدارى دا جالعاسادى، ويتكەنى قور ولاردى نارىققا جاقىنداتۋ جانە جەكە قىزمەت جەتكىزۋشىلەردى تارتۋ ماقساتىندا تولەم تاريفتەرىن كوتەرۋدى قولدايدى. قازىر كوپتەگەن ەلدى مەكەندەردە كت/مرت جەكە كابينەتتەرى اشىلۋدا، ولاردىڭ كەيبىرەۋلەرى قىزمەتتەرگە دەگەن جوعارى سۇرانىستى ەسكەرە وتىرىپ، تاۋلىك بويى جۇمىس ىستەيدى. ەلوردادا ءمامس جۇيەسىندە كت قىزمەتتەرى بويىنشا 17 مەديتسينالىق ۇيىم جانە مرت بويىنشا 11 مەديتسينالىق ۇيىم جۇمىس ىستەيدى»، دەلىنگەن اقپاراتتا.

سوڭعى جاڭالىقتار

ۇقساس جاڭالىقتار