ەلوردا • 27 قاراشا، 2021

ەلوردادا ۇلتتىق مەكتەپ پىكىرسايىس ءتۋرنيرى باستالدى

178 رەت كورسەتىلدى

بۇگىن 27 قاراشادا وقۋشىلار سارايىندا تۇڭعىش پرەزيدەنت كۇنى مەن قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان ۇلتتىق مەكتەپ پىكىرسايىس ءتۋرنيرىنىڭ سالتاناتتى اشىلۋى ءوتتى، دەپ حابارلايدى Egemen.kz.

پىكىرسايىس ءبىلىم بەرۋ تەحنولوگياسى رەتىندە جاستاردىڭ الەۋەتىن، اسىرەسە مەكتەپ جاسىندا، سونداي-اق جاڭا بۋىن كوشباسشىلارىنىڭ وسۋىنە ىقپال ەتەدى. سوڭعى 15 جىلدا ەلىمىزدە ۇلتتىق دەڭگەيدە وففلاين فورماتتا وقۋشىلار اراسىندا پىكىرسايىس تۋرنيرلەرى وتكىزىلگەن جوق.

قازاقستان تاۋەلسىزدىگىنىڭ 30 جىلدىعىنا وراي نۇرسۇلتان نازارباەۆ قورى «ەلباسى اكادەمياسى» كورپوراتيۆتىك قورىنىڭ باستاماسى مەن قر ءبىلىم جانە عىلىم مينيسترلىگىنىڭ رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعىنىڭ ۇيىمداستىرۋىمەن مەكتەپ پىكىرسايىس ءتۋرنيرى وتۋدە.

تۋرنيرگە 34 كوماندا قاتىسادى. ولار ءوز وڭىرلەرىندە وتكەن ىرىكتەۋ ويىندارىندا جەڭىسكە جەتىپ، 40 مىڭنان استام وقۋشى اراسىندا ۇزدىك اتانعان. وڭىرلەردىڭ نامىسىن تەك وبلىس ورتالىقتارىنان عانا ەمەس، شاعىن قالالاردان، ەلدى مەكەندەردەن، ءتىپتى اۋىلداردان شىققان كوماندالار قورعايدى. بۇل پىكىرسايىس قوزعالىسىنىڭ بۇكىل رەسپۋبليكا بويىنشا دامۋىن ايعاقتايدى.

جاس سپيكەرلەر امەريكاندىق پارلامەنتتىك فورمات ەرەجەلەرى بويىنشا ۇكىمەت پەن وپپوزيتسيا كوماندالارى بولىپ، ءتۋرنيردىڭ جالپى تاقىرىبى – ەل مەن قوعامنىڭ قالىپتاسۋىنىڭ 30 جىلدىق جولىنا ستراتەگيالىق جانە جان-جاقتى كوزقاراستى تالقىلايدى.

ءتۋرنيردىڭ اشىلۋ سالتاناتىندا نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى الكەي مارعۇلان ۇلى ءسوز سويلەدى.

«پىكىرسايىس – بۇل ناتيجەسىندە ءسىزدى ۇلكەن جەڭىستەرگە جەتەلەيتىن شاعىن قادامدار. تاۋەلسىزدىگىمىزدىڭ 30 جىلدىعى قارساڭىندا ەلىمىزدىڭ بارلىق وڭىرلەرىنەن كەلگەن ءبىلىمدى جانە قابىلەتتى وقۋشىلارى ەلوردامىز نۇر-سۇلتان قالاسىنا جينالدى. ءبىز تۋرنيرعا قاتىسۋشى وقۋشىلار وڭ وزگەرىستەردىڭ بولاشاق مەنەدجەرلەرى بولادى دەپ سەنەمىز. قازاقستاننىڭ تۇڭعىش پرەزيدەنتى – ەلباسى جاستارىمىزدىڭ الەۋەتىن دامىتۋ مەن جان-جاقتى اشۋ ءۇشىن مەملەكەتتىلىگىمىزدىڭ بەرىك ىرگەتاسىن قالادى»، دەدى الكەي مارعۇلان ۇلى.

اشىلۋ سالتاناتىنا «ەلباسى اكادەمياسى» كق باسقارۋشى ديرەكتورى مۇرات جۇمانباي، قر بعم رقببواو ديرەكتورى رايسا شەر، «R4 Technology & Research Center» ءبىلىم بەرۋ-زەرتتەۋ ورتالىعىنىڭ ديرەكتورى ايدىن تۋسيۋبجانوۆ جانە باسقا قوعام قايراتكەرلەرى قاتىستى.

سوڭعى جاڭالىقتار

ۇقساس جاڭالىقتار