سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە, 23 قاراشا كۇنى ساعات 07.48 مينۋت كەتكەندە «102» جەدەل ارناسىنا پەتروپاۆل سىرتىنداعى اينالما جولدا جول-كولىك اپاتى بولعاندىعى تۋرالى حابار تۇسكەن.
كۋاگەرلەر «LADA Largus» جانە «ۋرال 5557» كولىكتەرىنىڭ سوقتىعىسقانى تۋرالى حابارلاعان. جول-كولىك وقيعاسى سالدارىنان «LADA Largus» جۇرگىزۋشىسى اۋىر جاراقات الىپ, وقيعا ورنىندا كوز جۇمدى.
وسى فاكتى قر قىلمىستىق كودەكسىنىڭ 345-بابىنىڭ 3-بولىگى بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى. قازىر جول-كولىك وقيعاسىنىڭ ءمان-جايى مەن سەبەپتەرى انىقتالماق. بىرقاتار ساراپتاما تاعايىندالدى. جۇرگىزىلگەن ءىس-شارالاردىڭ ناتيجەسى بويىنشا سوڭعى پروتسەسسۋالدىق شەشىم قابىلدانادى.
پوليتسەيلەردىڭ ايتۋىنشا, دۇيسەنبىدەن بەرى سقو جولدارىندا ءۇش جول-كولىك وقيعاسى تىركەلدى. سالدارىنان ەكى ادام زارداپ شەگىپ, ءبىر ادام قازا تاپتى. قولايسىز اۋا رايىنا جانە كوكتايعاققا بايلانىستى پوليتسەيلەر جول قوزعالىسىنىڭ بارلىق قاتىسۋشىلارىنان جولداردا ساق بولۋدى, جول ءجۇرىسى ەرەجەلەرىن قاتاڭ ساقتاۋدى سۇرايدى.
جۇرگىزۋشىلەر جول-كولىك وقيعاسىن بولدىرماس ءۇشىن قاۋىپسىز قاشىقتىقتى, بۇيىرلىك ارالىقتى ساقتاۋى, سونداي-اق مانەۆر جاساۋدا اباي بولۋى, جىلدامدىقتى بارىنشا ازايتۋى قاجەت. جاياۋ جۇرگىنشىلەر جولداردان تەك رۇقسات ەتىلگەن ورىنداردان ءوتۋى ءتيىس.
