ءبىلىم • 22 قاراشا، 2021

ەلىمىزدەگى كوپتەگەن مەكتەپ ديرەكتورى قىزمەتتەن كەتۋى مۇمكىن

15937 رەت كورسەتىلدى

ءبىلىم جانە عىلىم ءمينيسترى اسحات ايماعامبەتوۆ ءبىلىم بەرۋ مەكەمەلەرىنىڭ باسشىلارىن روتاتسيالاۋ ماسەلەسىن قوزعادى، دەپ حابارلايدى Egemen.kz.

«مەملەكەتتىك ءبىلىم بەرۋ ۇيىمدارىنىڭ ءبىرىنشى باسشىلارىن روتاتسيالاۋ قاعيدالارى قازاقستان رەسپۋبليكاسى ادىلەت مينيسترلىگىندە تىركەلدى.

وسىلايشا، ءبىلىم بەرۋ جۇيەسىندە مەكتەپ، كوللەدج جانە بالاباقشا ديرەكتورلارىن روتاتسيالاۋ ينستيتۋتى پايدا بولدى.

ءبىلىم بەرۋ سالاسىندا ون مىڭنان استام مەملەكەتتىك ۇيىم بار. كوپتەگەن باسشىلار، مەرزىمسىز ەڭبەك كەلىسىمشارتتارىن جاساسقان.

وسىعان بايلانىستى ءبىر ۇيىمدا 10-15 جىل جانە ودان دا كوپ جۇمىس ىستەيتىندەر از ەمەس. ارينە، ولاردىڭ اراسىندا ءوز جۇمىسىن جاقسى بىلەتىن جانە مەكتەپ، كوللەدج، مەكتەپكە دەيىنگى نەمەسە قوسىمشا ءبىلىم بەرۋ ۇيىمدارىنىڭ دامۋىنا ەلەۋلى ۇلەس قوساتىن باسشىلار بار. دەگەنمەن، 10-15 جىل بويى ءبىر ورىندا وتىرىپ، وزدەرىنىڭ باستاماشىلدىعى مەن دامۋعا دەگەن ىنتاسىن جوعالتاتىن مەكتەپ ديرەكتورلارى دا بار»، دەيدى مينيستر.

ۆەدومستۆو باسشىسى ءسوزىن جالعاي وتىرىپ، ەگەر باسشى ۇزاق جىلدار بويى ءبىر ءبىلىم بەرۋ ۇيىمىن باسقارسا، بۇل موتيۆاتسيانىڭ تومەندەۋىنە، جۇمىس بارىسىندا جاڭا تاسىلدەردىڭ بولماۋىنا اكەلۋى مۇمكىن ەكەنىن ايتىپ ءوتتى.

«باسشىلىق ەتەتىن ۇيىمنىڭ اۋىسۋى وزگەرىستەردى ەنگىزۋگە جانە باسشىنىڭ جۇمىستاعى تيىمدىلىگىن ارتتىرۋعا مۇمكىندىك بەرەدى. ەندى ەرەجەلەردىڭ نەگىزگى باسىمدىقتارىنا توقتالىپ وتسەم.

بىرىنشىدەن، ءبىر ءبىلىم بەرۋ ۇيىمىندا 4 نەمەسە 7 جىلدان استام جۇمىس ىستەگەن باسشىلار روتاتسيالانادى.

بۇل رەتتە، وسى ءبىلىم بەرۋ ۇيىمىندا لاۋازىمعا تاعايىندالعان كۇننەن باستاپ 4 ء(تورت) جىل جۇمىس اتقارعان ءبىرىنشى باسشى روتاتسيادان ءوتىنىشى نەگىزىندە بوساتىلىپ، تيىسىنشە قولدانىستاعى ەڭبەك شارتى شەڭبەرىندە ءوز جۇمىسىن جالعاستىرا الادى.

الايدا، ەگەر باسشى اتالعان ۇيىمدا 7 جىلدان استام ۋاقىت جۇمىس ىستەسە، وندا ول مىندەتتى تۇردە روتاتسيالانادى. وسىلايشا، ءبىر ءبىلىم بەرۋ ۇيىمىنا جەتەكشىلىك ەتۋ مەرزىمى 7 جىلدان اسپاۋى ءتيىس»، دەدى اسحات ايماعامبەتوۆ.

ەكىنشىدەن، روتاتسيالاۋدىڭ تومەندەگىدەي شارتتارى بار:

  • روتاتسيالاۋدى وبلىستاردىڭ جانە رەسپۋبليكالىق ماڭىزى بار قالالاردىڭ ءبىلىم باسقارمالارى جۇزەگە اسىرادى;
  • روتاتسيا ءبىر ەلدى مەكەن اۋماعىندا جۇرگىزىلەدى;
  • روتاتسيالاۋدى ءبىر دەڭگەيدەگى ۇيىم باسشىلارى اراسىندا جۇرگىزەدى;
  • روتاتسيالاۋ كەزىندە ءبىرىنشى باسشىلاردىڭ بىلىكتىلىك ساناتى، ياعني اتالعان سانات ءۇشىن تولەنەتىن قوسىمشا اقى دا مەرزىمى اياقتالعانعا دەيىن ساقتالادى.

«اشىقتىق پەن وبەكتيۆتىلىكتى قامتاماسىز ەتۋ ءۇشىن روتاتسيالاۋ تۋرالى ماسەلەنى قاراۋ ءۇشىن كوميسسيا جۇمىس ىستەيتىن بولادى.

روتاتسيالاۋ جۇيەسىنىڭ ءتيىمدى جۇمىس ىستەۋى جانە تۇتاستاي العاندا بۇل قاعيدالاردىڭ جەرگىلىكتى جەرلەردە دۇرىس ىسكە اسىرىلۋى ءۇشىن مينيسترلىك مونيتورينگ جۇرگىزەتىن بولادى»، دەپ جازدى مينيستر Facebook پاراقشاسىندا.

سوڭعى جاڭالىقتار

توقساننىڭ تورىندە

ايماقتار • بۇگىن، 09:16

تاتارستاننان ولجالى ورالدى

حوككەي • بۇگىن، 09:14

زەرتتەۋ اۋقىمىن كەڭەيتۋ ماڭىزدى

ايماقتار • بۇگىن، 09:11

تەڭدەسى جوق جەتىستىك

قازاقستان • بۇگىن، 08:54

باسىمىزداعى باقتى باعالاي بىلەيىك

قازاقستان • بۇگىن، 08:47

ەلباسى اماناتى

پىكىر • بۇگىن، 08:45

ءمىنسىز – كىم؟

رۋحانيات • كەشە

سەمەيدەگى سەرپىلىس

ايماقتار • كەشە

ۇقساس جاڭالىقتار