بىرلىگى كۇشتى ەل وزادى

رۋحى مىقتى ەل قاشاندا بيىكتەن كورىنەرى حاق. ءتۇپ-تۇقيانىمىز بولىپ سانالاتىن ساقتار ءومىرىن بەينەلەگەن كورىنىسپەن تەربەلگەن جەتىسۋلىق جاستار جانارلارى ۇشقىنداپ, بويلارىن بيلەگەن بۇلا كۇش رۋح بەرىپ, تالدىقورعان تورىندە ساپ تۇزەپ, قازاقستان حالقى اسسامبلەياسى ۇيىتقى بولعان «ماڭگىلىك ەل» اكتسياسىن وتكىزدى. نەگىزگى ماقساتى – جاستاردى پاتريوتتىق تۇرعىدا تاربيەلەۋ بولىپ تابىلاتىن بۇل شاراعا ءوڭىر باسشىسى ەرەكشە ءمان بەرگەن. سونىڭ ءبىر دالەلى رەتىندە «جاستار» سپورت سارايىنا سىقاسا تولعان جاسوسپىرىمدەردىڭ كورسەم, بىلسەم, وسىناۋ يگىلىكتەن كوكەيىمە ءبىر قاجەتتىلىكتى توقىسام دەگەن ىنتا-ىقىلاسىن ايتۋعا بولادى. مەملەكەتتىك ءانۇران ورىندالعاندا سول جاس وسكىندەردىڭ قايسارلىقتارى انىق بايقالىپ تۇردى. ءدۇيىم جۇرتتىڭ الدىنا الماتى وبلىسىنىڭ اكىمى اڭسار مۇساحانوۆ شىعىپ: – ەلباسىنىڭ بيىلعى جول­داۋى­­نىڭ ماڭىزى ەرەكشە. «قا­زاق­ستان-2050» ستراتەگياسىنىڭ ماق­سات-مىندەتتەرى ايقىندالعان بۇل قۇجاتتا ەلدىڭ ۇلى مۇراتتارى دا بەلگىلەنىپ, «ماڭگىلىك ەل» ۇلت­تىق يدەياسى جاريالاندى, – دەدى. – بۇل ەلىمىزدىڭ كەمەل كەلەشەگىن, دامۋ مۇمكىندىكتەرىن كورسەتەتىن جاسامپاز جوبا! قازاقستاندى جاڭا ساتىعا كوتەرۋ جولىندا بۇل يدەيا باستى باعدارىمىز, اينىماس تەمىرقازىعىمىز بولاتىنى انىق. وسكەلەڭ ۇرپاقتى وتانشىلدىق رۋحتا تاربيەلەۋدە نەگىزگى يدەولوگيالىق ۇستانىمعا اينالماق. ماڭگىلىك ەل بو­لۋعا قازاقستاننىڭ الەۋەتى جەت­كى­لىكتى. ول ءۇشىن يندۋستريا مەن يننوۆاتسياعا نەگىزدەلگەن ەكونوميكامىزدى نىعايتىپ, ءال-اۋقاتىمىزدى ارتتىرۋمەن قاتار, رۋحاني قۋاتىمىز زور, ءبىلى­مىمىز باسەكەگە قابىلەتتى, دەن­ساۋلىعىمىز مىقتى, بىرلىگىمىز بەكەم بولۋى كەرەك. ارعا – ءمىناجات, بارعا – قاناعات, جوققا – سالاۋات ايتقان حالقىمىز تالاي قيىن-قىستاۋ كۇندەردى باس­تان وتكەردى. ەلبا­سىنىڭ كورەگەن ساياساتىنىڭ ارقا­سىندا ازاتتىقتى اڭساعان بابالارىمىزدىڭ ارمانىن جۇزە­گە اسىرۋ ءبىزدىڭ ۇرپاقتىڭ ەنشى­سىنە ءتيدى. جەتىسۋ ءوڭىرى – قول باستاعان باتىر, ءسوز باستاعان شەشەن, ارقالى اقىن, كۇمىس كومەي ءانشى-جىرشىلاردىڭ جۇلدىزدى شوعىرى كوپتەپ شىققان قاسيەتتى ولكە. تاتۋلىقتى تۋ ەتكەن جەتى­سۋ­لىق­تاردىڭ ەلباسىنىڭ «ماڭگىلىك ەل» يدەياسىن ءبىر كىسىدەي قولداپ, جۇزەگە اسىرۋعا بەلسەنە اتسالىساتىنى كۇمانسىز. ءبىز قانداي بيىككە كوتەرىلسەك تە, ەلدىڭ ىنتىماعى مەن تاتۋلىعى ارقاسىندا قول جەتكىزدىك. بۇل «بىرلىگى كۇشتى ەل وزادى» دەگەن ماقالدىڭ ءومىر­شەڭدىگىن كورسەتەدى». قازاقستاننىڭ حالىق ءارتىسى نۇرعالي ءنۇسىپجانوۆ «ءوز ەلىم» اتتى پاتريوتتىق تۇرعىداعى ءاندى ناقىشىنا كەلتىرە شىرقاعاندا ارنايى ۇيىمداستىرىلعان اكتسيا ءوز مارەسىنە جاقىنداي ءتۇستى. استانادان وسى شاراعا ارنايى كەلگەن ورتالىق سايلاۋ كوميسسياسىنىڭ مۇشەسى ءلاززات سۇلەيمەن ادامي تۇرعىدا ۇندەۋ تاس­تاي ءسوز سويلەگەن سوڭ, وڭىرگە تا­نى­مال جاندار مىنبەگە كوتەرىلىپ, ۇلت­­تىق رۋحتى كوتەرەر اڭگىمە قوز­عادى. پاتريوتتىق اندەر اعىتىلدى. قورىتا ايتقاندا, «ءماڭ­گى­لىك ەل» اكتسياسى جەتىسۋ جە­رىن­دە دە جو­عا­رى دەڭگەيدە ۇيىم­داس­تى­رى­لىپ, جالپىحالىقتىق قول­داۋ تاپتى. نۇربول الدىباەۆ, «ەگەمەن قازاقستان». تالدىقورعان.