ۇلتتىق قوعامدىق سەنىم كەڭەسىنىڭ مۇشەلەرى ماڭعىستاۋ, سولتۇستىك قازاقستان, قاراعاندى وبلىستارىنداعى ەلدى مەكەندەردى ارالادى. قازان ايىندا ءبىز شىعىس قازاقستان, تۇركىستان, پاۆلودار جانە قوستاناي وبلىستارىنىڭ 12 اۋىلدىق وكرۋگىندە بولدىق.
پروتسەستىڭ بارلىق قاتىسۋشىلارىمەن – جەڭىسكە جەتكەن جانە ۇتىلعان جەرگىلىكتى تۇرعىندارمەن, اۋدان اكىمدەرىمەن, پارتيا وكىلدەرىمەن جانە باقىلاۋشىلارمەن كەزدەسۋلەر ۇيىمداستىرىلدى. اۋىل تۇرعىندارىمەن ديالوگ جۇرگىزۋ جاقسى. ولار سۇراقتارعا جاۋاپ بەرەدى, ويىن ايتادى. كەزدەسكەنىمىزدىڭ بارلىعى اۋىل اكىمىن سايلاۋدى قولدايتىنىن ايتىپ وتكەن ءجون.
اۋىل تۇرعىندارىنا ورتاق ماسەلە – جول ساپاسى, اۋىز سۋ, جاستاردىڭ قالاعا كەتۋى. قاي اۋىلعا بارساق تا وسى ماسەلەلەرگە شاعىمداناتىندار كەزدەستى. بۇل تۇيتكىل شەشىلسە, اۋىلىمىز دا جاندانادى دەگەن سەنىمدە.
تۇرعىندارمەن سۇحبات, تالداۋ ناتيجەسىندە اۋىل اكىمدەرىن سايلاۋعا قاتىستى بىرقاتار وزگەرىس قاجەت ەكەنىن تۇسىندىك. اتاپ ايتار بولساق, ۇگىت-ناسيحات ناۋقانىنىڭ مەرزىمىن ناقتىلاۋ قاجەت. كانديداتتاردىڭ بىلىمىنە قاتىستى وزگەرىس ەنگىزۋ دە ماڭىزدى دەپ سانايمىز. بۇل تۋرالى ۇسىنىس پرەزيدەنتكە جەتكىزىلدى. مەملەكەت باسشىسى دا اۋىل اكىمىنە ۇمىتكەرگە جوعارى ءبىلىم مىندەتىن قويۋ ماسەلەسىن قايتا قاراۋ تۋرالى ايتتى.
سونىمەن قاتار جەرگىلىكتى حالىق پەن ساياسي پارتيالاردى اۋىلدا ءوتىپ جاتقان ساياسي ناۋقان تۋرالى حاباردار ەتۋ ماڭىزدى. ول ءۇشىن الەۋمەتتىك جەلىلەردە حابارلاپ وتىرۋ كەرەك.
سايلاۋ پروتسەسىن جاقسارتۋ ءۇشىن تالداۋ جاسالدى. ول ءۇشىن ارنايى توپ قۇرىلدى. جەرگىلىكتى حالىقپەن قاتار جەڭىسكە جەتكەن تاراپ پەن جەڭىلگەن ۇمىتكەرلەر دە سۇحباتقا شاقىرىلدى. اۋىل اكىمدەرىن سايلاۋدى اۋىل تۇرعىندارى قولدايدى.
الەكساندر دانيلوۆ,
ۇلتتىق قوعامدىق سەنىم كەڭەسىنىڭ مۇشەسى, Stopfake.kz جوباسىنىڭ جەتەكشىسى
