«بۇل سالانى دامىتۋ ءۇشىن شەتەلدەن اۋقىمدى ينۆەستيتسيا تارتىلىپ, وزىق تەحنولوگيا ەنگىزىلدى. ءبىزدىڭ ەلىمىز الەمدەگى ەڭ ءىرى مۇناي ەكسپورتتاۋشى مەملەكەتتەردىڭ قاتارىندا. قازىر جىلىنا 90 ميلليون تونناعا دەيىن مۇناي وندىرەمىز. ءونىمدى سىرتقا شىعاراتىن كاسپي قۇبىر جەلىسىنىڭ سالىنۋى مۇناي-گاز سەكتورىن دامىتۋعا ايرىقشا ىقپال ەتتى», دەدى مەملەكەت باسشىسى.
پرەزيدەنت جوبانىڭ ىسكە اسىرىلۋى الەمدىك ولشەم بويىنشا تەڭىز, قاراشىعاناق جانە قاشاعان سياقتى ءىرى كەن ورىندارىن يگەرۋگە تىڭ سەرپىن بەرگەنىن ايتتى. قازىرگى تاڭدا ەلىمىزدە وندىرىلەتىن مۇنايدىڭ 60 پايىزى وسى كەن ورىندارىنا تيەسىلى.
«كونسورتسيۋم قازاقستان مەن رەسەيدىڭ, سونداي-اق «شەۆرون», «ەني», «لۋكويل», «شەلل» جانە باسقا دا جەتەكشى مۇناي كومپانيالارىنىڭ قاتىسۋىمەن حالىقارالىق ءىرى مۇناي تاسىمالداۋ جوباسىنا اينالدى. بارلىق قاتىسۋشى كومپانيالاردىڭ اراسىندا مامىلەگە قول جەتكىزۋ ءۇشىن قازاقستان مەن رەسەي باسشىلارىنىڭ ۇلكەن كۇش-جىگەرىن قاجەت ەتكەن ءارى ۇزاق جىلدار بويى جۇرگىزىلگەن كەلىسسوزدەر ءالى ەسىمىزدە. تۇڭعىش پرەزيدەنت نۇرسۇلتان نازارباەۆ ۇسىنعان سەرىكتەستىكتىڭ 10 قاعيداسى كونسورتسيۋمنىڭ تابىستى قىزمەت ەتۋىنە نەگىز بولدى. بۇل جوبانىڭ مەن ءۇشىن ءمانى زور, سەبەبى ونىڭ قۇرىلىسىنا جانە ىسكە قوسىلۋىنا ارنايى قاتىسقان ەدىم», دەدى قاسىم-جومارت توقاەۆ.
مەملەكەت باسشىسىنىڭ ايتۋىنشا, بۇگىن كاسپي قۇبىرى كونسورتسيۋمى – بارلىق اكتسيونەردىڭ جۇيەلى ءارى ءتيىمدى جۇمىسىنىڭ ۇلگىسى. 2001 جىلدان بەرى كقك-ءنىڭ مۇناي قۇبىرى ارقىلى الەمدىك نارىقتارعا 750 ميلليون توننادان استام قازاقستان مۇنايى ەكسپورتتالدى. ونىڭ وتكىزۋ قابىلەتى شامامەن 2,5 ەسە ارتىپ, جىلىنا 67 ميلليون تونناعا دەيىن جەتتى. پرەزيدەنتتىڭ ايتۋىنشا, 2023 جىلعا قاراي بۇل كورسەتكىشتى 80 ميلليون تونناعا دەيىن جەتكىزۋ جوسپارلانىپ وتىر.
«بىلتىر كاسپي قۇبىرى كونسورتسيۋمى اكتسيونەرلەردىڭ بارلىق قارىزىن وتەپ, ءوزىنىڭ قارجى تۇراقتىلىعىن دالەلدەي الدى. جالپى كونسورتسيۋم – قازاقستاننىڭ مۇناي-گاز كەشەنىنىڭ نەگىزگى بولىگى. ەلىمىزدىڭ ەكونوميكالىق دامۋىنا جانە ازاماتتارىمىزدىڭ ءال-اۋقاتىن قامتاماسىز ەتۋگە ەلەۋلى ۇلەس قوسىپ وتىر. كاسپي قۇبىرى كونسورتسيۋمىن مەگاجوبا دەپ ايتسام ارتىق ەمەس. ونىڭ بولاشاعى زور ەكەنىنە سەنىمدىمىن», دەدى پرەزيدەنت.
قاسىم-جومارت توقاەۆ كاسپي قۇبىرى كونسورتسيۋمىنىڭ شيرەك عاسىرلىق مەرەيتويى قازاقستان تاۋەلسىزدىگىنىڭ 30 جىلدىعىمەن تۇسپا-تۇس كەلۋىنىڭ سيمۆولدىق ءمانى بار ەكەنىن ايتتى.
«كونسورتسيۋم شەتەلدىك ينۆەستورلارمەن ۇزاق مەرزىمدى ىنتىماقتاستىعىمىزدىڭ سيمۆولىنا اينالدى. جوبانى قازاقستان مەن رەسەي بىرلەسە جۇزەگە اسىردى. سونىڭ ارقاسىندا ەكى ەلدىڭ مۇناي تاسىمالى سالاسىنداعى سەرىكتەستىگى نىعايا ءتۇستى», دەدى مەملەكەت باسشىسى.
پرەزيدەنت كونسورتسيۋمنىڭ ەڭبەك ۇجىمى قۇبىردىڭ تۇراقتى جۇمىسىن قامتاماسىز ەتۋگە زور ۇلەس قوسقانىن اتاپ ءوتتى. مەملەكەت باسشىسى كاسپي قۇبىرى كونسورتسيۋمىنىڭ ۇجىمىنا, ارداگەرلەرىنە جانە اكتسيونەرلەرىنە ريزاشىلىعىن ءبىلدىرىپ, اماندىق پەن تابىس تىلەدى.
جيىن بارىسىندا كاسپي قۇبىرى كونسورتسيۋمىنىڭ بىرقاتار ارداگەرلەرى مەن قىزمەتكەرلەرى مەملەكەتتىك ناگرادالارمەن ماراپاتتالدى. قاسىم-جومارت توقاەۆ ناگرادالاردى تابىستادى.
ءىس-شارا بارىسىندا رەسەي فەدەراتسياسى ۇكىمەتى توراعاسىنىڭ ورىنباسارى الەكساندر نوۆاك, «شەۆرون» كومپانياسىنىڭ ەۋرازيا-تىنىق مۇحيتى ايماعىندا مۇناي بارلاۋ جانە ءوندىرۋ جونىندەگى پرەزيدەنتى نايدجەل حيرن, «لۋكويل» جاق پرەزيدەنتى ۆاگيت الەكپەروۆ جانە «ترانسنەفت» كومپانياسىنىڭ ءبىرىنشى ۆيتسە-پرەزيدەنتى ماكسيم گريشانين ءسوز سويلەدى.
