ءجپىش اياسىندا بارلىعى 125 زاڭ بۇزۋشىلىق, ونىڭ ىشىندە 47-ءى ەسىرتكى ساتۋ, وتكىزۋ فاكتىسى انىقتالدى. ءىس-شارانىڭ باستى مىندەتى ەسىرتكى ساتۋ مەن تاراتۋدى قۇرىقتاۋ بولعاندىقتان, اسىرەسە, وسى قىلمىستاردىڭ ورشۋىنە پوليتسيا ەرەكشە نازار اۋداردى.
ەسىرتكىمەن قىلمىس جاسايتىندار دا بۇكىل ەلىمىزدە جامان ىندەت ءجۇرىپ, كەيبىر ادامداردىڭ ءولىپ جاتقانىنا قاراماي ەسىرتكى قىلمىسىن جالعاستىرا بەرگەن. سونىڭ ءبىرى جامبىل اۋدانىنىڭ 39 جاستاعى تۇرعىنى بولىپ شىقتى. پوليتسەيلەر ونى وپەراتسيانىڭ العاشقى كۇندەرىندە پەتروپاۆلدىڭ ورتالىق كوشەلەرىنىڭ بىرىندە جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە ۇستاعان. ونىڭ Subaru Legacy كولىگىنىڭ جۇكسالعىشىنان 5 كيلو ماريحۋانا سالىنعان پوليەتيلەن پاكەت تاركىلەندى. ۇستالعان ادام ەكى جىل بويى ەسىرتكى قولدانىپ, ساتقانىن مويىندادى. مۇنىڭ قارا بازارداعى قۇنى ونداعان ملن تەڭگە.
اتالعان فاكتى قىلمىستىق كودەكستىڭ 297-بابى 3-بولىگى – «ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ» بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلگەن. 20 قىركۇيەك كۇنى سوتتىڭ ۇكىمىمەن ناشاقور 10 جىلعا باس بوستاندىعىنان ايىرىلدى.
بۇل ءجپىش بارىسىندا سولتۇستىك قازاقستان وبلىسىندا تىركەلگەن ەڭ ۇلكەن قىلمىس بولدى. جالپى, «قاراسورا» ءىس-شاراسى بارىسىندا بارلىعى 295,5 كيلوگراممنان استام ءارتۇرلى ەسىرتكى زاتتارى تاركىلەنگەن.
وبلىستىق پوليتسيا دەپارتامەنتى باستىعىنىڭ ورىنباسارى, پوليتسيا پولكوۆنيگى رۋسلان نازاروۆتىڭ ايتۋىنا قاراعاندا: «جىل باسىنان وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ەسىرتكى بيزنەسى سالاسىندا 195 ءتۇرلى قىلمىستى انىقتادى. ونىڭ ىشىندە ەسىرتكىنى وتكىزۋدىڭ 49 فاكتىسى, 15 اسا ءىرى كولەمدە ساقتاۋ فاكتىسى بولدى. 409,5 كگ ەسىرتكى زاتتارى تاركىلەنگەن».
سولتۇستىك قازاقستان وبلىسى
