اقتوبە قالالىق سوتىندا كۇنبول تۇرىموۆ جانە ۆاديم ماسقا قاتىستى سوت وتىرىسى ءوتتى. كۇنبول تۇرىموۆ بۇعان دەيىن اقتوبە وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى قىزمەتىن اتقارسا, ۆاديم ماسس ىرعىز اۋدانىندا بىرنەشە مەكتەپ سالۋدى ءوز مىندەتىنە الدى.
كۇنبول تۇرىموۆقا قىلمىستىق كودەكستىڭ «سالعىرتتىق», ال ۆاديم ماسسقا «الاياقتىق» بابى بويىنشا ايىپ تاعىلدى. ءىستىڭ ماتەريالىنا سۇيەنسەك, «نۇرلى جول» باعدارلاماسى اياسىندا ىرعىز اۋدانىندا 100 ورىندى ينتەرناتى بار مەكتەپ سالۋ جوسپارلانعان.
ءبىلىم ورداسىنىڭ ءوزى 300 ورىنعا شاقتالعان. 2017 جىلى تەندەر جاريالانىپ, قۇنى 1,4 ملرد تەڭگە بولاتىن قۇرىلىس جۇمىسىنىڭ مەردىگەرى انىقتالدى. قۇرىلىس 13 ايعا جوسپارلانعان. الدىمەن جۇمىس جوبا-سمەتا قۇجاتىنا ساي جۇرگىزىلگەنىمەن, كەيىن كولىك قىزمەتىنىڭ باعاسى كوتەرىلگەنىن, جوبا-سمەتا قۇجاتىنا وزگەرتۋ ەنگىزۋ كەرەك ەكەنىن ايتىپ, سەندىرگەن, وسى جولمەن اقشا جىمقىرۋدى جوسپارلاپ, ىسكە اسىرعان.
مەردىگەر ىرعىز اۋدانىندا ەكى مەكتەپ سالىپ قولدانىسقا بەردى, ال دەنە شىنىقتىرۋ-سپورت كەشەنىنىڭ قۇرىلىس اياقتالماي قالعان. وسى ىسكە قاتىستى سوت ۇكىمى شىقتى. نۇربول تۇرىموۆ ايىپتى دەپ تانىلىپ, 2 جىل 6 ايعا باس بوستاندىعىنان شەكتەۋ جازاسى تاعايىندالدى. ول سوتتا بار كىناسىن مويىندادى. ەندى تۇندە ءدامحانا, مەيرامحانا, كلۋبقا بارۋعا بولمايدى. جىل سايىن 100 ساعات قوعامدىق جۇمىس ىستەۋى ءتيىس. پروباتسيالىق باقىلاۋ جۇرگىزىلەدى. ال ۆاديم ماسس قىلمىستىق كودەكستىڭ «الاياقتىق» بابى بويىنشا ايىپتى دەپ تانىلدى. ول 6 جىل 6 ايعا باس بوستاندىعىنان ايىرىلدى. ازاماتتىق شاعىم ءىشىنارا قاناعاتتاندىرىلدى.
ۆاديم ماسس اقتوبە وبلىستىق قۇرىلىس, ساۋلەت جانە قالا قۇرىلىسى باسقارماسىنا 96 632 953 تەڭگەنى قايتارۋى ءتيىس.
سوت ۇكىمى زاڭدى كۇشىنە ەنگەن جوق.
