شاقالاقتىڭ ءوزىن دارىگەرلەر 31 اپتالىق كەزىندە كەسار تىلىگىمەن وتا جاساۋ ارقىلى العان. ويتكەنى اناسىنىڭ بويىنداعى جامان ىندەت تىم قاتتى اسقىنىپ كەتكەن ەكەن.
سولتۇستىك قازاقستان وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ حابارلاۋىنا قاراعاندا, قازىر وكىلەتتى ورگاندار ادام ولىمىنە بايلانىستى ساراپتاما جۇرگىزۋدە. ءولىمنىڭ سەبەبى – جوعارىدا ايتقانىمىزداي Covid-19-دىڭ كەسىرىنەن وكپەنىڭ جاپپاي قابىنۋى.
«دارىگەرلەر اياعى اۋىر ايەلگە ەمدىك-دياگنوستيكالىق شارالاردىڭ ءبارىن تولىعىمەن جاسادى. ەم-دومنىڭ ءبارى كوپبەيىندى اۋرۋحانانىڭ جان ساقتاۋ بولىمىندە جاسالدى, الايدا ءتيىستى ناتيجە بەرمەدى. ونىڭ ۇستىنە جاس انا جامان ىندەتكە قارسى ۆاكتسينا دا قابىلداماعان ەكەن», دەيدى وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى گۇلنار قاليەۆا.
ءسويتىپ, جامان ىندەت تاعى ءبىر جاس ءومىردى قىرشىننان جالمادى. ادامداردىڭ وعان قارسى كۇرەسى – ازىرگە تەك ۆاكتسينا سالدىرۋ ەكەندىگىن ۇمىتپاعان ءجون. بۇل تىم بولماسا اۋرۋدىڭ قاتتى ورشۋىنە نەمەسە اۋىرىپ قالعان كۇننىڭ وزىندە تەزىرەك جازىلۋعا سەبەپشى بولىپ جاتقانى ءجيى ايتىلۋدا. بۇگىندە سولتۇستىك قازاقستان وبلىسىندا 646 ايەل اتالعان سىرقاتتان ەمدەلۋدە, ونىڭ ىشىندە اياعى اۋىر ايەلدەر دە بار.
پەتروپاۆل
