شاھار باسشىسىنىڭ قابىلداۋىنا جازىلعان قازىعۇرت شاعىن اۋدانىنىڭ تۇرعىنى گ.قاراساەۆا كوشەنى جارىقتاندىرۋ, تازالىق, ايالدامانى قالىپقا كەلتىرۋ جانە جول ماسەلەسىن قوزعادى.
قالا اكىمى كوشەلەردى جارىقتاندىرۋدا ءبىرىنشى كەزەكتە الەۋمەتتىك نىساندار ورنالاسقان ورتالىق ماڭىزعا يە كوشەلەردى قامتۋ جوسپارلانعانىن, سوندىقتان ارىستانباب كوشەسىن جارىقتاندىرۋ 2023 جىلعى جوسپارعا ەنەتىنىن ايتتى. وتىرار كوشەسى مەن ارىستانباب كوشەسى قيىلىسىنداعى ايالدامانى وسى ايدا قالىپقا كەلتىرۋ تۋرالى سالا باسشىسىنا ناقتى تاپسىرما بەرىپ, ماسەلەنى ءوز باقىلاۋىنا الدى. جول ەنىن كەڭەيتۋ تۋرالى ءوتىنىشى ۇيلەردىڭ ورنالاسۋى سەبەبىنەن مۇمكىن ەمەستىگى ءتۇسىندىرىلدى. كوشە تازالىعى جونىندە اۋدان اكىمىنە تاپسىرما بەرىپ, تۇرعىنداردى دا تازالىققا جاۋاپكەرشىلىكپەن قاراۋعا شاقىردى.
ال اقجايىق شاعىن اۋدانىنىڭ تۇرعىنى ا.قالدىبەكوۆا مۇمكىندىگى شەكتەۋلى بالالارعا ارنالعان وڭالتۋ ورتالىعىن اشۋ نيەتىمەن ءبولىسىپ, ورتالىقتى سالۋعا جەر تەلىمىن بەرۋ جونىندە ءوتىنىش بەردى.
«قالا اكىمدىگى ينۆەستيتسيالىق ىنتىماقتاستىققا ءاردايىم اشىق. جاقسى باستاما. جوبانى ەگجەي-تەگجەيلى تالقىلاۋ ءۇشىن «Shymkent» اكك» باسشىلىعى سىزبەن جەكە كەزدەسەتىن بولادى», دەدى مۇرات ايتەنوۆ.
ناتيجەسىندە, اكىم كورپوراتسيا توراعاسىنا ينۆەستيتسيالىق ساياساتتى ىسكە اسىرۋ ماسەلەلەرى بويىنشا ناقتى تۇسىنىكتەمە بەرۋدى تاپسىردى.
جەر, زاڭسىز قۇرىلىس ماسەلەسىمەن كەلگەن ازاماتتارعا دا قالا اكىمى زاڭ تۇرعىسىندا شەشىلۋ جولدارىن ءتۇسىندىرىپ, ءاربىر ماسەلە شەشىمىن تاپقانشا ءوز باقىلاۋىندا بولاتىنىن ايتتى.
