ءيا, ءبىر ەمەس ەكى بىردەي ءىرى ميگرانتتار توبى پولشاعا بەلارۋس اۋماعىنان كىردى. كەم دەگەندە بىرنەشە ونداعان ادامنان تۇراتىن توپتار كرىنوك پەن بەلوۆەجي ايماعىنداعى قورشاۋدى بۇزىپ وتكەن. شەكارادان ەل اۋماعىنا زاڭسىز وتكەندەردىڭ بىرنەشە ونداعانى كەرى قايتارىلدى. كۇشتىك قۇرىلىم قىزمەتكەرلەرى قالعاندارىن ىزدەۋدى جالعاستىرۋدا.
شەكارادان باسىپ كىرۋ ارەكەتتەرى 8 قاراشا كۇنى دە بولعان. ايتكەنمەن, «كۋزنيتسا» وتكىزۋ پۋنكتىنىڭ ماڭىندا قازىرگى ۋاقىتتا جاعداي تىنىشتالعان.
ەۋروپالىق وداق بۇعان دەيىن بەلارۋسسياعا قارسى 30-عا جۋىق جەكە جانە زاڭدى تۇلعالارعا باعىتتالعان جاڭا سانكتسيالار ەنگىزۋگە دايىن ەكەنىن مالىمدەدى. بۇل تىزىمگە سىرتقى ىستەر ءمينيسترى ۆلاديمير ماكەي مەن بەلارۋسسيانىڭ «بەلاۆيا» اۆياكومپانياسى كىرۋى مۇمكىن.
ەو مەن ناتو پرەزيدەنت الەكساندر لۋكاشەنكونى ميگرانتتاردى باتىسقا قىسىم جاساۋ قۇرالى رەتىندە پايدالاندى دەپ ايىپتايدى. تاعى ءبىر سانكتسيالار پاكەتى ەو-نىڭ پىكىرىنشە مينسكىگە قاتىستى شەكتەۋلەر ءۇشىن كەك الۋ ماقساتىندا ميگرانتتاردىڭ كەلۋىن ۇيىمداستىرعان بەلارۋس شەنەۋنىكتەرىنە قارسى باعىتتالعان.
گەرمانيا سىرتقى ىستەر ءمينيسترىنىڭ مىندەتىن اتقارۋشى حايكو مااس ءوز كەزەگىندە ەو پولشا شەكاراسىنا ميگرانتتاردىڭ كەلۋىنە بايلانىستى بەلارۋس بيلىگىنە قارسى سانكتسيالاردى قاتايتۋعا دايىن ەكەنىن ايتتى.
ء«بىز ميگرانتتاردى ماقساتتى اكەلۋگە قاتىساتىنداردىڭ بارلىعىنا سانكتسيالار سالامىز. لۋكاشەنكو جوسپارى جۇمىس ىستەمەيتىنىن ءتۇسىنۋى كەرەك. ايتپاقشى, بۇل بولاشاقتا ەكونوميكانىڭ باسقا سالالارىنداعى سانكتسيالاردىڭ ارتا تۇسەتىنىن جوققا شىعارمايدى», دەيدى ول.
