وقيعا ورنىنا جەدەل جەتكەن پوليتسەيلەر ءورتتىڭ تۇرعىن ءۇيدىڭ جانىنداعى جابىق اۋلادان شىعىپ جاتقانىن اڭعارادى. ال وندا وتىن, كومىر, جانە باسقا دا جانعىش زاتتار بولۋى مۇمكىن. مۇنداي سارايدىڭ ءبىر بولىگىندە ءۇي يەلەرى دە بولۋى كادىك. ءتىپتى ادام بولماسا دا سۋماڭداعان جالىن تۇرعىن ۇيگە كوشىپ, ءبارىبىر ءۇي يەلەرىن قاتەرگە ۇشىراتۋى ىقتيمال. ەش ويلانباستان ەكى جاس پوليتسەي وتتى اۋىزدىقتاۋعا شۇعىل كىرىسىپ كەتەدى.
الدىمەن ولار ءورت سوندىرۋشىلەرگە دابىل قاعىپ, سوسىن اشىلا قويماعان ءۇيدىڭ سىرتقى ەسىگىن بۇزىپ كىرىپ, الدىمەن ءۇش گاز بالونىن سىرتقا شىعارادى. بۇل كەزدە ۇيدەگى جاندار دا ويانىپ, دالاعا شىعۋعا تىرىسىپ جاتقان. ەسىكتەن ەنگەن قالىڭ ءتۇتىن ولاردى تۇنشىقتىرۋعا اينالادى. ەسى شىعىپ كەتكەن 80-دەگى كەيۋانا ەسىكتى تابا الماي, تەك «قۇتقارىڭدار» دەپ ايعايلاۋدى بىلگەن. وفيتسەرلەر قارت ايەلدىڭ دالاعا شىعۋىنا كومەكتەسىپ, تازا اۋاعا الىپ شىعىپ, ەسىن جيناتادى. سوسىن ونىڭ ءوتىنىشى بويىنشا ءدارى-دارمەكتەرىن دە الىپ شىعادى. ودان ءارى پوليتسەيلەر ابدەن قورىققان كەيۋانانى پاترۋلدىك كولىككە وتىرعىزىپ, ءۇيدىڭ بارلىق بولمەلەرىن تەكسەرىپ, كەلگەن كورشىلەرىمەن بىرگە جانىپ جاتقان جالىنعا شەلەكتەرمەن سۋ قۇيا باستايدى.
وسى ۋاقىتتا ءورت سوندىرۋشىلەر دە جەتىپ, ءورتتى جارتى ساعاتتان استام ۋاقىتتا تۇپكىلىكتى وشىرگەن.
وسى وقيعادان كەيىن 2,5 اي وتكەندە جاس پوليتسەيلەرگە توتەنشە جاعدايلار ءمينيسترى يۋ.ءيليننىڭ قول قويعان العىس حاتى تابىس ەتىلدى. ايىرتاۋ اۋدانىنىڭ تج ءبولىمىنىڭ باسشىسى, ازاماتتىق قورعاۋ پودپولكوۆنيگى ەسماعزام سەيىتجان ءتارتىپ ساقشىلارىنىڭ كاسىبيلىگى مەن جەدەلدىگىن اتاپ ءوتتى.
سولتۇستىك قازاقستان وبلىسى
