مەملەكەت باسشىسى قاسىم-جومارت توقاەۆتىڭ بيىلعى «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا دا وسى باعىتتا اتقارىلعان جۇمىستار سارالانىپ, الداعى مىندەتتەر بەلگىلەندى.
دەپارتامەنت باسشىسىنىڭ ايتۋىنشا, وڭىردەگى كريمينوگەندىك احۋال تۇراقتى. قىلمىستىڭ تومەندەۋ تەندەنتسياسى بايقالادى. بيىل 9 ايدا تىركەلگەن جالپى قىلمىستار سانى 6 پايىزعا, ونىڭ ىشىندە ۇرلىق – 14, مال ۇرلىعى – 28, توناۋ – 7, بۇزاقىلىق قىلمىس 30 پايىزعا ازايعان.
قوعامدىق ورىندا, كوشەدە, ماس كۇيىندە جاسالعان ءتارتىپ بۇزۋشىلىقتار دا ءبىرشاما تومەندەگەن. بىلتىر بۇرىن سوتتى بولعاندار 719 رەت قىلمىس جاساسا, بيىل ول كورسەتكىش 37 پايىزعا ازايىپتى, سول سياقتى توپتىق, وتباسىلىق-تۇرمىستىق, كامەلەتكە تولماعاندار قولىمەن جاسالاتىن قىلمىستار سانى ازايدى. ال اۋىر جانە اسا اۋىر قىلمىستاردىڭ اشىلۋ كورسەتكىشى جوعارىلاپ وتىر.
– دەگەنمەن جۇمىسىمىزعا جاسالعان تالداۋ تۇرعىنداردى مازالاپ وتىرعان مىناداي ماسەلەلەر بار ەكەندىگىن كورسەتتى. ونىڭ العاشقىسى – مال ۇرلىعى. بۇل باعىتتاعى ۇرلىق بىلتىرعىدان تومەندەگەنمەن ءالى دە شەشىلمەگەن تۇستارى كوپ. ونىڭ ءبىرىنشى سەبەبى – پادانىڭ ۇيىمداستىرىلماۋى. قاراۋسىز مالعا كوزى تۇسكەندەر ەسەبىن تاۋىپ قولدى قىلىپ جاتىر.
ۆەتەريناريا قىزمەتىمەن بىرلەسىپ, جولداردا مال تاسىمالدايتىن كولىك قۇرالدارى مەن مال قۇجاتتارىن تەكسەرۋ قارقىندى جۇرگىزىلۋدە. ونىڭ بارىسىندا مالدىڭ تولقۇجاتى نەمەسە ۆەتەرينارلىق انىقتاماسىنىڭ جوقتىعى, تاڭبالارى مەن سىرعالارىنداعى نومىرلەرى سايكەس كەلمەۋى سەكىلدى دەرەكتەر انىقتالىپ جاتىر. ودان بولەك, كورشىلەس تۇركىستان جانە اقتوبە وبلىستارىنداعى ارىپتەستەرمەن تىعىز قارىم-قاتىناستا جۇمىس ىستەپ جاتىرمىز, – دەيدى دەپارتامەنت باسشىسى.
قىلمىستاردىڭ ۋاقتىلى اشىلماۋىنا جوعالعان مالدارىن يەلەرى ءوز بەتىنشە ىزدەپ, پوليتسياعا كەش ارىزدانۋى دا از اسەر ەتىپ وتىرعان جوق. مالى قولدى بولعان جان دەرەۋ حابارلاسىپ, اۋىلداعىلار پادا ۇيىمداستىرىپ, مالداردى تاڭبالاۋ, سىرعالاۋ, JPS قۇرىلعىلارىن ەنگىزۋى كەرەك. كەيدە ءتىپتى ۇرلانعان مالداردى تابۋ, تانۋ بارىسىندا قيىندىقتار تۋىنداپ جاتادى.
بەكتورە سۇلتان قابىلدانعان شارالارعا قاراماستان, وبلىس كولەمىندە تىركەلگەن جول اپاتتارىنىڭ سالدارىنان جاراقات العاندار مەن قايتىس بولعاندار سانى كوبەيگەنىنە توقتالدى.
قالا, اۋدان ورتالىقتارىندا رادارلارعا تىيىم سالىنىپ, ولاردىڭ ورنىنا جىلدامدىقتى انىقتايتىن اۆتوماتتى قۇرالدار الىنىپ جاتىر. وتكەن جىلى جەرگىلىكتى اكىمدىكتىڭ قولداۋىمەن قالا ورتالىعىنداعى جول-كولىك وقيعالارى ءجيى بولاتىن كوشە بويلارىنا «اركان» ستاتسيونارلى جىلدامدىق ولشەگىش قۇرىلعىسىنىڭ 13-ءى ورناتىلدى. قازىر تاعى جەتەۋى ورناتىلىپ جاتىر. ودان بولەك, 5 «ينتەللەكتۋالدى قيىلىس» قۇرىلعىسى جۇمىس ىستەپ تۇر.
«اركان» ارقىلى توعىز ايدا 20 727 قۇقىق بۇزۋشىلىققا 191 ملن 331 مىڭ, «ينتەللەكتۋالدى قيىلىس» قۇرىلعىسى كومەگىمەن 1 687 قۇقىق بۇزۋشىلىق انىقتالىپ, 9 ملن 979 مىڭ تەڭگە ايىپپۇل سالىنعان.
ەسىرتكىمەن كۇرەس – ەل بولىپ جۇمىلاتىن ماسەلە. وبلىستا جىل باسىنان زاڭسىز اينالىمنان 143 كەلى ەسىرتكى زاتى تاركىلەنىپ, 169 قىلمىس انىقتالدى. ونىڭ ىشىندە ەسىرتكىنى اسا ءىرى مولشەردە ساقتاۋدىڭ 12, ساتۋدىڭ 21, ءوسىرۋدىڭ 43, جارنامالاۋدىڭ 2 دەرەگى انىقتالىپ وتىر. جالپى, ەسىرتكىگە بايلانىستى قىلمىستىق تەرىس قىلىقتاردىڭ 90 دەرەگى بەلگىلى بولدى.
– ادامدى ازدىراتىن ادەتتى جارنامالاعانداردىڭ ءبىرى قىزىلوردا قالاسىندا تۇراتىن 20 جاستاعى ايەل بولىپ شىقتى. تەرگەۋ كەزىندە ونىڭ كورسەتۋىمەن 110 گراففيتي سۋرەتى جويىلدى. وسى ماقساتتا الەۋمەتتىك جەلىنى پايدالانىپ, جۇرتتى جەلىكتىرىپ وتىرعاندار دا بار. ولار كوبىنە جەلى ارقىلى تاپسىرىس قابىلداپ, تاۋارلارىن جاسىرىن تۇردە ساۋدالايدى. سونداي 2 دەرەك بەلگىلى بولىپ, وبلىس ورتالىعىنان اتىراۋ جانە سەمەي قالالارىنىڭ تۇرعىندارى ۇستالدى. ءتىنتۋ ارەكەتتەرى كەزىندە ولاردىڭ قالا ورتالىعىنان جالداعان پاتەرلەرى مەن جاسىرىپ قويعان نۇكتەلەرىنەن سينتەتيكالىق ەسىرتكى قۇرالدارى زاتتاي دالەلدەمە رەتىندە الىندى, – دەيدى وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى بەكتورە سۇلتان.
وسى جىلعى 4 قازان جانە 30 قاراشا ارالىعىندا وتكىزىلىپ جاتقان «رەفلەكس» جەدەل پروفيلاكتيكالىق ءىس-شاراسىنىڭ برىسىندا سينتەتيكالىق ەسىرتكى ساقتاۋدىڭ 3 دەرەگى انىقتالدى. وبلىس اۋماعىندا 1 ماۋسىم – 30 قازان ارالىعىندا وتكىزىلىپ جاتقان «قاراسورا-2021» ارنايى جەدەل پروفيلاكتيكالىق شاراسى بارىسىندا ەسىرتكى وسىرگەنى ءۇشىن 52 تۇرعىن ۇستالىپ, ونىڭ 30-ى قاماققا الىندى. شارا باستالعالى بەرى بارلىعى 14 مىڭ 360 ءتۇپ سورا وسىمدىگى جويىلىپتى.
دەپارتامەنت باستىعى بەكتورە سۇلتان پوليتسيا جۇمىسىن جاڭا ساتىعا كوتەرۋ, ازاماتتاردىڭ قۇقىعىن قورعايتىن ءتارتىپ ساقشىسىنىڭ ءيميدجىن قالىپتاستىرۋ كوپ رەتتە قاراپايىم حالىقپەن قارىم-قاتىناسقا بايلانىستى ەكەندىگىن اتاپ ءوتتى.
