بايان-ولگەي قالاسىندا تۇراتىن كىشكەنتاي قازاق كورەرمەندەر 2011 جىلى تىكەلەي ەلباسى, قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ قولداۋىمەن جۇزەگە اسقان, بولاشاقتىقتاردىڭ «وزىڭنەن باستا» قورىنىڭ جوباسى اياسىندا ونلاين-كينوتەاترلاردا كورسەتىلەتىن دۋبلياجدالعان مۋلتفيلمدەردىڭ ءبىرىن دە قالت جىبەرمەي, ۇزبەي تاماشالايدى.
ء«بىز موڭعوليادا تۇراتىن قازاق بالالارى, سىزدەرگە «وزىڭنەن باستا» جوباسى ءۇشىن العىس بىلدىرگىمىز كەلەدى. وسىنداي يگى ىسپەن اينالىسىپ, تاماشا فيلمدەردى ساپالى دۋبلياجبەن انا تىلىندە ۇسىنعاندارىڭىز ءۇشىن راحمەت. شەتەلدە تۇراتىن قازاقتار ءۇشىن بۇل كەرەمەت مۇمكىندىك. وزگە تىلدەردە كورۋ مۇمكىندىگى بولۋىنا قاراماستان, انا تىلىندە تاماشالاۋدىڭ ءجونى بولەك. ول – ەرەكشە سەزىم. جوبانى توقتاتپاي, ارى قاراي دامىتا بەرىڭىزدەر. وسىنداي قىزىقتى گولليۆۋدتىڭ تۋىندىلار قازاق تىلىندە ءجيى شىققانىن قالايمىن», دەدى جوبا جانكۇيەرلەرىنىڭ ءبىرى دۋلات ارافات.
سونداي-اق بالالار ۆيدەودا «بولاشاق» باعدارلاماسىنىڭ تۇلەكتەرى قۇرعان قوردى 10 جىلدىق مەرەيتويىمەن قۇتتىقتادى.
ايتا كەتسەك, بولاشاقتىقتاردىڭ شەتەلدىك فيلمدەردى مەملەكەتتىك تىلگە دۋبلياجداۋى الەمدەگى بىرەگەي جانە بىردەن ءبىر جەكە باستاما.
10 جىل ىشىندە «وزىڭنەن باستا» جوباسى اياسىندا بيۋدجەتتەن تىس قاراجات ەسەبىنەن Disney, Pixar, Marvel جانە Sony Pictures سەكىلدى جەتەكشى الەمدىك كينوستۋديالاردىڭ 37 ءفيلمى ەڭ جوعارى حالىقارالىق ستاندارت بويىنشا تىكەلەي اعىلشىن تىلىنەن قازاق تىلىنە دۋبلياجدالدى. ولاردىڭ ىشىندە «مۋلان», «باتىل جۇرەك», «كوكو قۇپياسى», «موانا», «مالەفيسەنتا», «الاددين», «جان» كارتينالارى بار.
25 قاراشادا قازاقستاندىقتارعا قازاق تىلىندەگى تاعى ءبىر الەمدىك پرەمەرا – «ەنكانتو» ءفيلمى جول تارتپاق.
ەسكە سالا كەتسەك, بۇعان دەيىن «بولاشاق» قورىنىڭ قامقورشىلىق كەڭەسىنىڭ قۇرمەتتى مۇشەسى باۋىرجان بايبەك قازاق ءتىلى تۇرىك تىلىنەن كەيىنگى دۋبلياجداعى ەكىنشى تۇركى ءتىلى جانە «Walt Disney» كومپانياسىنىڭ تاريحىنداعى 39-شى ءتىل بولعانىن ايتقان ەدى. سونىمەن قاتار, قازاق ءتىلى شىعىس ەۋروپا مەن تمد ەلدەرى ءۇشىن شىعارىلاتىن Blu-Ray-دا كورۋگە ارنالعان قولجەتىمدى گولليۆۋدتىق فيلمدەردىڭ 7 نەگىزگى تىلدەرىنىڭ قاتارىنا ەندى.
جوبانىڭ ارقاسىندا بۇگىندە 100-دەن استام قازاقستاندىق اكتەر «Walt Disney Pictures» داۋىستىق بازاسىندا تۇر. شىعارماشىلىق جانە تەحنيكالىق ماماندىقتاردىڭ 203 وكىلى «Walt Disney Pictures» ستۋدياسىنىڭ ستاندارتتارى نەگىزىندە دۋبلياج بويىنشا وقۋدان ءوتتى.
