القالى جيىنعا حالىقارالىق تۇركى اكادەمياسىنىڭ باسشىسى دارحان قىدىرالى, ازەربايجان رەسپۋبليكاسىنىڭ ءبىلىم ءمينيسترى ەمين امرۋللاەۆ, قازاقستان رەسپۋبليكاسىنىڭ ءبىلىم جانە عىلىم ءمينيسترى اسحات ايماعامبەتوۆ, قىرعىز رەسپۋبليكاسىنىڭ ءبىلىم جانە عىلىم ءمينيسترى بولوتبەك كۋپەشەۆ, تۇركيا رەسپۋبليكاسىنىڭ ۇلتتىق ءبىلىم ءمينيسترى ماحمۋت وزەر, وزبەكستان رەسپۋبليكاسىنىڭ حالىق اعارتۋ ءمينيسترىنىڭ ورىنباسارى تەميرجون كاميلوۆ, تۇركيا رەسپۋبليكاسى جوعارى ءبىلىم كەڭەسىنىڭ توراعاسى ەرول ءوزۆار جانە ماجارستاننىڭ ىستامبۇل قالاسىنداعى باس كونسۋلى لاسلو كەللەر قاتىستى.
وتىرىستى اشقان تۇركيانىڭ ۇلتتىق ءبىلىم ءمينيسترى ماحمۋد وزەر اكادەميانىڭ قىزمەتىنە وڭ باعا بەردى. ول تۇركيا تاراپى حالىقارالىق تۇركى اكادەمياسىنىڭ ءتىلى, تاريحى مەن مادەنيەتى ورتاق تۇركى حالىقتارى اراسىنداعى باۋىرلاستىقتى نىعايتۋعا باعىتتالعان تالپىنىستارىن قۇپتاپ, بۇل باعىتتا جان-جاقتى قولداۋ كورسەتۋگە دايىن ەكەنىن اتاپ ءوتتى.
حالىقارالىق تۇركى اكادەمياسىنىڭ پرەزيدەنتى دارحان قىدىرالى تۇركيا تاراپىنا عىلىمي كەڭەستىڭ IV وتىرىسىن جوعارى دەڭگەيدە وتكىزگەنى ءۇشىن العىس ايتىپ, ۇيىمنىڭ اتقارعان جۇمىستارى تۋرالى باياندادى. اكادەميا باسشىسى پاندەميادان تۋىنداعان ماسەلەلەر مەن قارجىلىق قيىندىقتارعا قاراماستان, وتكەن جىلمەن سالىستىرعاندا ءىس-شارالار مەن جوبالاردىڭ سانى ەكى ەسەگە ارتقانىن اتاپ ءوتتى. وسىلايشا بيۋدجەت ۇنەمدەلىپ, ەسەسىنە شارالار سانى ارتتى.
ايتا كەتسەك, باكۋدە وتكەن عىلىمي كەڭەستىڭ سوڭعى وتىرىسىنان بەرى اكادەميا 130-دان استام ءىس-شارا مەن جوبالاردى جۇزەگە اسىردى.
ازەربايجاننىڭ ءبىلىم ءمينيسترى ەمين امرۋللاەۆ حالىقارالىق تۇرىك اكادەمياسى مۇشە مەملەكەتتەر اراسىنداعى عىلىم مەن ءبىلىم سالاسىنداعى ىنتىماقتاستىقتى دامىتۋعا, تىعىز بايلانىستاردى ساقتاۋعا جانە حالىقتار اراسىنداعى باۋىرلاستىقتى نىعايتۋعا ۇلەس قوسقانىن ايتتى. مينيستر «ورتاق تۇرىك تاريحى» وقۋلىعى 2019-2020 وقۋ جىلىنان باستاپ ازەربايجاننىڭ 151 جالپى ءبىلىم بەرۋ مەكەمەسىندە فاكۋلتاتيۆتىك ءپان رەتىندە 8-سىنىپتىڭ 14 مىڭ وقۋشىسىنا وقىتىلاتىنىن اتاپ ءوتىپ, «ورتاق تۇركى ادەبيەتى» مەن «ورتاق تۇرىك گەوگرافياسى» وقۋلىقتارى دا جاقىن ارادا مۇشە ەلدەردىڭ وقۋ باعدارلاماسىنا ەنگىزىلەتىنىنە سەنىم ءبىلدىردى.
قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ اكادەميانىڭ تابىستى قىزمەتىن اتاپ ءوتىپ, نۇر-سۇلتان قالاسىندا ۇيىمعا جاڭا جەكە عيمارات بەرىلگەنىن حابارلادى.
وتىرىستا ءسوز سويلەگەن قىرعىزستاننىڭ ءبىلىم جانە عىلىم ءمينيسترى ب.كۋپەشەۆ ون جىلدان استام ۋاقىت بويى اكادەميا ءوز ميسسياسىن ابىرويمەن اتقارىپ كەلە جاتقانىن, وقىتۋشىلار مەن عالىمدارعا تۇركى حالىقتارىنىڭ تاريحى, ءتىلى مەن مادەنيەتى سالاسىنداعى ماسەلەردى بىرلەسىپ شەشۋ ءۇشىن عىلىمي بايلانىستاردى دامىتۋعا مۇمكىندىك بەرەتىنىن اتاپ ءوتتى. مينيستر اكادەميانىڭ تۇركى الەمىنىڭ تۇعىرلى تۇلعالارى مەرەيتويلارى بويىنشا ۇيىمداستىرعان ءىس-شارالارىن جوعارى باعالادى.
ءوز كەزەگىندە ماجارستاننىڭ ىستامبۇلداعى باس كونسۋلى لاسلو كەللەر تۇركى الەمىنىڭ ورتاق قۇندىلىقتاردى, اسىرەسە ماجار تاريحى مەن مادەنيەتىن زەردەلەۋ مەن ناسيحاتتاۋداعى قىزمەتىنە ريزاشىلىعىن ءبىلدىردى.
ال تۇركيا رەسپۋبليكاسى جوعارى ءبىلىم كەڭەسىنىڭ توراعاسى ەرول وزۆار اكادەميانىڭ تۇركى الەمىندەگى عىلىم مەن ءبىلىم سالاسىنداعى ناتيجەلى قىزمەتىنە نازار اۋدارىپ, ونىڭ كوپ قىرلى جۇمىسىنا قولداۋ كورسەتۋدىڭ ماڭىزدىلىعىنا توقتالدى.
وزبەكستان ءبىلىم ءمينيسترىنىڭ ورىنباسارى تەميرجون كاميلوۆ وزبەكستاننىڭ اكادەميا قىزمەتىن مۇقيات قاداعالاپ وتىرعانىن اتاپ ءوتىپ, عىلىم مەن ءبىلىم سالاسىنداعى ىنتىماقتاستىققا قىزىعۋشىلىعىن ءبىلدىردى.
وتىرىس بارىسىندا عىلىمي كەڭەس مۇشەلەرى بىرقاتار ماسەلەلەر بويىنشا ناقتى شەشىمدەر قابىلدادى. اتاپ ايتقاندا, تۇركى الەمىنىڭ تۇعىرلى تۇلعالارىنىڭ مەرەيتويلارىنىڭ ءتىزىمى, ءبىلىم جانە عىلىم سالاسىنداعى ىنتىماقتاستىقتى نىعايتۋ ماسەلەلەرى, عىلىمي-زەرتتەۋ جوبالارى تالقىلانىپ, باسىمدىقتار بەكىتىلدى.
