سەناتوردىڭ ايتۋىنشا, مۇشە ترانسپلانتاتسياسىنا كەزەك وتە باياۋ ءارى وپەراتسيانى كۇتەتىن ناۋقاستاردىڭ سانى كۇننەن-كۇنگە ارتىپ كەلەدى.
اقمارال ءالنازاروۆا قازاقستاندا 2012 جىلدان باستاپ دەنە مۇشەلەرىن ترانسپلانتاتسيالاۋ بويىنشا 2 مىڭعا جۋىق وپەراتسيا جاسالعانىن ايتتى. بۇگىنگى تاڭدا ترانسپلانتاتسيانى كۇتۋ تىزىمىندە 3 300-دەن استام ادام بار, ونىڭ 105-ءى بالا.
سوڭعى 9 جىلدا ەلىمىزدە بالالارعا 118 بۇيرەك ترانسپلانتاتسياسى جاسالدى, ونىڭ 77%-ى دونور تۋىستاردان الىنعان. سەناتور ترانسپلانتولوگيالىق قىزمەتتى تولىققاندى قالىپتاستىرۋ ءۇشىن جاعداي جاساۋ, سونداي-اق حالىقتىڭ ورگان دونورلىعى تۋرالى حاباردارلىعىن ارتتىرۋ بويىنشا جۇمىس جۇرگىزۋ قاجەتتىگىن اتاپ ءوتتى.
«سونىمەن قاتار ەلىمىزدە ترانسپلانتولوگيانىڭ دامۋىن تەجەيتىن نەگىزگى سەبەپتەرگە قولدانىستاعى نورماتيۆتىك-قۇقىقتىق بازانىڭ جەتىلمەگەندىگى, دونورلىق ستاتسيونارلاردىڭ ماتەريالدىق-تەحنيكالىق بازاسىنىڭ تومەندىگى, سونداي-اق مەديتسينا قىزمەتكەرلەرىنىڭ قۇقىقتىق تۇرعىدا قورعالماعانى جاتادى», دەدى اقمارال ءالنازاروۆا سەنات وتىرىسىندا.
سەناتور ءوز سوزىندە دونورلىق ورگاندار مەن ترانسپلانتاتسيا بريگادالارىن وڭىرلەردەن ورتالىققا ۋاقتىلى جانە قاۋىپسىز جەتكىزۋدىڭ تەحنيكالىق قيىندىقتارى بار ەكەنىن اتاپ ءوتتى.
