وڭىردە ىزگى نيەتتى ادامدار اعا بۋىنعا ىزەت ءبىلدىرىپ, قامقورلىق كورسەتۋدەن ءوزارا جارىسقا تۇسكەندەي. الۋان-الۋان تاعدىردىڭ ءتالىمدى تۇسى – جاس ۇرپاقتىڭ اداستىرماس تەمىرقازىعى. وتانىمىزدىڭ ءوسىپ-وركەندەۋىنە, تۇرمىس-سالتتىڭ جاڭعىرۋىنا كوكىرەگى قازىنا ارداقتى قارتتارىمىزدىڭ قوسىپ وتىرعان ۇلەسىن ايرىقشا ماقتانىش سەزىممەن اۋىز تولتىرىپ ايتۋعا ابدەن بولادى. جالعىز قارتتار ايلىعىندا عانا ەمەس, ونە بويى جالعىزىلىكتى زەينەتكەرلەر مەن قارت مۇگەدەكتەر جۇرەك جىلۋىن, جان شۇعىلاسىن سەزىنىپ, قۇرمەتكە بولەنۋدە. ءبىر ايتا كەتەرلىگى, قارتتار ايلىعى قارساڭىندا اقپارات قۇرالدارىندا, الەۋمەتتىك جەلىلەردە مۇگەدەكتەر مەن جالعىزباستى قاريالارعا قايىرىمدىلىق كورسەتۋ تۋرالى تىڭ باستامالار كوتەرىلدى. بۇل باستاماعا ءارتۇرلى دەڭگەيدەگى بيلىك وكىلدەرى, بيزنەس قاۋىمداستىقتارى, تۇتاس ەڭبەك ۇجىمدارى, قوعامدىق ۇيىمدار ءۇن قوسىپ, قولداپ اكەتتى. وسى ءبىر مىسالدان-اق قوعامنىڭ ىزگىلىگىن, ىزەتتىلىگىن, ادامداردىڭ بويىنداعى كەمەل كىسىلىك پەن ايقىن ادامگەرشىلىكتى اڭعارۋعا بولادى. كومەك جاساۋعا پەيىلدى ادامداردىڭ ارقاسىندا 111 مىڭنان استام اعا بۋىن وكىلدەرىنە قولعابىس جاسالدى. وسى ءبىر بەرىك ءداستۇر قاي ۋاقىتتا بولسا دا جۇرەك جىلىتىپ, جان جادىراتارى ءسوزسىز.
وبلىستىق ارداگەرلەر ۇيىمىنىڭ قۇرامىندا 849 باستاۋىش ارداگەرلەر ۇيىمى, 2 قالالىق جانە 17 اۋداندىق ارداگەرلەر كەڭەسى, 18 ۇلى وتان سوعىسىنا قاتىسۋشى مەن مۇگەدەك, 1 مىڭعا جۋىق سوعىسقا قاتىسۋشىلارعا تەڭەستىرىلگەندەر, 3 175 تىل ارداگەرى, 700-دەن استام اۋعان سوعىسىنا قاتىسۋشى, 55 چەرنوبىل اتوم ەلەكتر ستانساسىنداعى اپاتتى جويۋعا قاتىسۋشى بار.
– ءبىزدىڭ قىزمەتىمىزدىڭ باستى ۇرانى – «بىردە-ءبىر ارداگەر نازاردان تىس قالمايدى» باعىتىن ۇستانا وتىرىپ, ايلىق كەزەڭىنە بەلگىلەنگەن شارالاردى وتكىزۋ بارىسىندا قارت ادامداردى قامتۋ. وتكەن مەرزىم ىشىندە وبلىستىڭ ارداگەرلەر ۇيىمدارى اۋداندىق, قالالىق, اۋىلدىق اكىمدىكتەرمەن بىرلەسە وتىرىپ, 1 522 قوعامدىق شارا وتكىزدى, ونىڭ ىشىندە 209 دوڭگەلەك ۇستەل, كونفەرەنتسيا مەن كەزدەسۋ ۇيىمداستىرىلدى, 183 قايىرىمدىلىق سەنبىلىك, 79 الەۋمەتتىك اۋىل شارۋاشىلىعى جارمەڭكەسى, مەديتسينا مەكەمەلەرىندە 239 اشىق ەسىك كۇنى, 824 كونتسەرت, 170-تەن استام سپورتتىق شارا ۇيىمداستىرىلدى, 13 332 زەينەتكەردىڭ تەگىن جانە جەڭىلدەتىلگەن باعامەن ءدارى-دارمەكپەن, 1 300 زەينەتكەردىڭ گازەت-جۋرنالدارعا جازىلۋىن قامتاماسىز ەتتى. 1 317 ادام شيپاجاي-ساۋىقتىرۋ مەكەمەلەرىندە دەنساۋلىقتارىن تۇزەدى, – دەيدى وبلىستىق ارداگەرلەر كەڭەسىنىڭ توراعاسى عوسمان تولەعۇل, – سول سياقتى 63 تۇرعىن ۇيگە جوندەۋ جۇمىستارى جۇرگىزىلدى, 67 ادامعا كوممۋنالدىق قىزمەت كومەگى كورسەتىلىپ, 13 460 ادامعا تەگىن نەمەسە جەڭىلدەتىلگەن باعامەن ءدارى-دارمەكتەر اپەرىلدى, 31 430 قارت ادام مەن مۇگەدەك ازىق-ت ۇلىكپەن قامتاماسىز ەتىلدى, 542 قاريا مەن مۇگەدەككە باق-قا تەگىن جازىلۋ جۇزەگە اسىرىلدى, 231 ارداگەرگە شيپاجايلار مەن ساۋىقتىرۋ ورتالىقتارىنا تەگىن جولداما, 52 891 ادامعا قارجىلاي كومەك جانە باسقا دا جاردەم تۇرلەرى كورسەتىلدى.
الەمدى جامان تۇماۋ جايلاماي تۇرعان ۋاقىتتا ادەتتە ارداگەرلەردى اكىمدىكتەرگە, كاسىپورىندارعا, مادەنيەت ۇيلەرىنە ارنايى شاقىرىپ, سىي-سياپات تابىس ەتىلىپ, داستارقان جايىلىپ, ءدام تاتاتىن. بىلتىردان باستاپ مۇنداي مۇمكىندىك جوق. ايتسە دە وسىنداي شارالاردىڭ بارلىعى جەكە كەزدەسۋلەر ارقىلى جۇزەگە اسىرىلۋدا. مۇگەدەكتەرگە, كۇنكورىسى تومەن ارداگەرلەرگە قارجىلاي كومەك كورسەتىلۋدە. بۇل ورايدا, جاستار جاساقتاعان ەرىكتى قوعامداردىڭ ەرەن ءىسىن سۇيىسپەنشىلىكپەن ايتا كەتۋگە بولادى. ولار قارعا ادىم جەر مۇڭ بولىپ قالعان قاريالاردىڭ ۇيلەرىنە بارىپ ءدارى-دارمەكتەرىن, ازىق-ت ۇلىكتەرىن جەتكىزىپ بەرۋگە قولعابىس جاساۋدا. ايتالىق, ەكى مىڭعا جۋىق وتباسىنا وبلىس ورتالىعىنداعى ۇجىمداردىڭ ەسەبىنەن ازىق-ت ۇلىك سەبەتتەرى تاراتىلىپ, اقشالاي كومەك كورسەتىلدى. اسىلىندا, مۇنداي جۇمىس ءبىر ايدىڭ شەڭبەرىندە عانا ەمەس, جىل بويى جۇرگىزىلەدى. ستەپنوگورسك قالاسىندا, اقكول, تسەلينوگراد, ەسىل, ساندىقتاۋ, ءبىرجان سال, بۋراباي اۋداندارىندا كاسىپورىندار ەسەبىنەن ۇيىمداستىرىلعان الەۋمەتتىك ۇيلەر جۇيەلى جۇمىس ىستەۋدە.
ايتارى مول اعا بۋىن قوعامدىق-ساياسي وقيعالاردان دا تىس قالىپ كورگەن ەمەس. وزدەرىنىڭ ومىرلىك باي تاجىريبەلەرىنە, بىلىمدەرىنە سۇيەنە وتىرىپ, مەملەكەتىمىزدىڭ دامۋىنا ەلەۋلى ۇلەس قوسۋدا. ايتالىق, ۇلى جەڭىستىڭ 76 جىلدىعىنا وراي مايدانگەرلەرگە كومەك كورسەتىلىپ, كەزدەسۋلەر وتكىزىلدى. ءجىلىجۇزدى مۇنداي جۇزدەسۋلەردە جاستارعا پاتريوتتىق تاربيە بەرۋ ماسەلەسىنە ايرىقشا نازار اۋدارىلۋدا. ءبىر اتتەگەن-ايى, وبلىس «قىزىل ايماقتىڭ» ساناتىنان شىعا الماي تۇرعاندىقتان مۇنداي شارالاردىڭ باسىم كوپشىلىگى ونلاين رەجىمىندە وتكىزىلۋدە.
ەكىنشى دۇنيەجۇزىلىك سوعىستا قازا تاۋىپ, تاعدىرى بەلگىسىز بولىپ قالعان جاۋىنگەرلەردىڭ زيراتتارىن ىزدەۋ, انىقتاۋ, تابىلعان كۇندە سۇيەكتەرىن ەلگە جەتكىزۋ جۇمىستارى جالعاسىن تابۋدا. لەنينگرادتى قورعاۋعا قاتىسقان جەرلەسىمىز كەنجەبەك بولتاەۆتىڭ دەرەگى 2018 جىلدىڭ 3 مامىرىندا تابىلىپ, توپىراق تۋعان جەردەن بۇيىردى. مۇنداي مىسالداردى كوپتەپ كەلتىرۋگە بولادى.
اعا بۋىندى سىيلاۋ, قالتقىسىز قۇرمەت كورسەتۋ الاش بالاسىنىڭ بويىنداعى شۋاقتى سەزىمدەر. بۇگىنگى ۇرپاقتىڭ باستى پارىزى, زامانىندا تۋعان ەلى مەن جەرى ءۇشىن تابانى تاستان تايماعان تارلانبوزداي ادال قىزمەت ەتكەن اتالار مەن اجەلەرگە قۇرمەت كورسەتۋ. سول قۇرمەتتىڭ بار ەكەندىگى, جىلدان-جىلعا دامىپ, مازمۇندىق تۇرعىدان بايىپ كەلە جاتقاندىعى قۋانتادى.
