بولاشاق كورمەگە ءبىزدىڭ ۇلەسىمىز
وتكەن جىلى يندۋستريالاندىرۋ كۇنى اياسىندا ۇدەمەلى يندۋستريالىق-يننوۆاتسيالىق دامۋ باعدارلاماسى جوبالارىنىڭ تۇساۋكەسەرىنە ارنالعان جالپىۇلتتىق تەلەكوپىر بارىسىندا وسكەمەندەگى فوتوەلەكترلى پلاستينالار شىعارۋ زاۋىتى ىسكە قوسىلدى. «قازاتومونەركاسىپ» ۇلتتىق كومپانياسى قۇرامىنداعى يننوۆاتسيالىق, جوعارى تەحنولوگيالىق كاسىپورىن الەمنىڭ ەڭ وزىق تەحنولوگياسىمەن جابدىقتالعان. بۇل جەردە كۇن باتارەيالارىنا قاجەتتى, كۇن ساۋلەسىن ەنەرگياعا اينالدىراتىن فوتوەلەكترلى ۇياشىقتار جاسالادى. كاسىپورىننىڭ قۋاتى 60 مەگاۆاتتان كەم ەمەس. اتالعان وندىرىسكە 23 ميلليارد تەڭگە ينۆەستيتسيا سالىندى.
بىلتىر ماۋسىم ايىندا ەلباسى شىعىس قازاقستان وبلىسىنداعى جۇمىس ساپارى اياسىندا زاۋىت قۇرىلىسىمەن تانىسقان بولاتىن. از ۋاقىت وتكەن سوڭ, تەلەكوپىر بارىسىندا «قازاتومونەركاسىپ» كومپانياسى وتاندىق كۇن باتارەيالارى ءوندىرىسىنىڭ تسيكلىن ازىرلەپ شىققانىن قۋانا حابارلاعانبىز. «قازاقستاندا شىعارىلعان» دەگەن جازۋى بار كۇن باتارەيالارى تولىقتاي دەرلىك ەلىمىزدە عانا وندىرىلمەك, ياعني كرەمني شيكىزاتىن يگەرۋدەن باستاپ دايىن تاۋار جاساۋعا دەيىنگى ۇدەرىستەردىڭ ءبارى وزىمىزدە ىسكە اسىرىلادى.
«استاناداعى دۇنيەجۇزىلىك ەكسپو-2017 كورمەسىنە دايىندىقتى بولاشاقتىڭ ەنەرگياسىن ىزدەۋ جانە جاساۋ جونىندەگى وزىق الەمدىك تاجىريبەنى زەردەلەۋ مەن ەنگىزۋ ورتالىعىن قۇرۋ ءۇشىن پايدالانۋ كەرەك», دەدى ەلباسى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا.
ياعني پرەزيدەنتىمىز ەرەكشە نازاردا ۇستاپ وتىرعان «قازاقستان SOLAR SILIKON» يننوۆاتسيالىق-جوعارى تەحنولوگيالىق كاسىپورنى ەكسپو-2017 كورمەسىنىڭ ايرىقشا تاۋارلىق برەندى بولماق. بۇل تۋرالى ەلباسى دا ايتقان بولاتىن. «جاسىل ەكونوميكا» باعدارلاماسى اياسىنداعى جوبانى جۇزەگە اسىرىپ جاتقان كاسىپورىندا ەۋروپا ەلدەرىنەن جەتكىزىلگەن وزىق ۇلگىدەگى كۇردەلى قوندىرعىلار ورناتىلعان. قۇرىلىس جۇمىستارى تولىعىمەن اياقتالىپ, فرانتسۋزدىڭ «ەسم» جانە «SEMCO» فيرمالارى شىعارعان نەگىزگى تەحنولوگيالىق قۇرىلعىلار العاشقى سىناقتان ءساتتى ءوتتى. زاۋىتتا ەلىمىز ءۇشىن مۇلدەم جاڭا ءونىم, ياعني كۇن باتارەيالارىنىڭ باستى بولشەكتەرى – فوتوەلەكترلى پلاستينالار شىعارىلادى. فرانتسيانىڭ وندىرىستىك تەحنولوگياسى بويىنشا جۇمىس ىستەيتىن زاۋىتقا قاجەتتى كرەمني شيكىزاتى الماتى وبلىسىنىڭ اۋماعىنان قازىلىپ الىنادى. مۇنداي تازا كرەمني الەمدە ەكى-اق جەردە اۆستراليادا جانە قازاقستاندا كەزدەسەدى. پلاستينالار وسى جەردەن استاناداعى زاۋىتقا جونەلتىلەدى, كۇن باتارەيالارى ەلوردامىزدا قۇراستىرىلادى.
الەمدىك باسەكەگە قابىلەتتى دايىن ءونىم شىعاراتىن زاماناۋي زاۋىت ۇجىمى جولداۋدا بەلگىلەنگەن مىندەتتەر ۇدەسىنەن شىعۋ ءۇشىن ەڭبەك ەتە بەرمەك.
ۆاسيلي لي,
«قازاقستان SOLAR SILIKON» جشس ديرەكتورى.
وسكەمەن.
عاسىرلار توعىسىنداعى كورمە
ەكسپو شەجىرەسى: پاريج, 1900 جىل
حح عاسىرداعى العاشقى بۇكىلالەمدىك جەتىستىكتەر كورمەسى 1900 جىلى 15 ساۋىردەن 12 قاراشا ارالىعىندا پاريج قالاسىندا ءوتتى. عاسىرلار توعىسىنداعى بۇل كورمە جالپى حالىقارالىق كورمەلەر تاريحىنداعى ەڭ تانىمال كورمەنىڭ ءبىرى بولىپ تابىلادى. 1900 جىلعى پاريج كورمەسىن 7 اي ىشىندە 50 ميلليوننان استام ادام تاماشالادى. عاسىرلار توعىسىنداعى بۇل كورمە شىن ماعىناسىندا ءحىح عاسىردا بۇكىل الەمدە قول جەتكىزىلگەن جەتىستىكتەردى پاش ەتكەن كورمە رەتىندە تاريحتا قالدى. 1900 جىلعى بۇكىلالەمدىك كورمەنى حالىقارالىق ەڭبەك, پروگرەسس جانە وركەنيەت مەرەكەسى دەپ اتادى. كورمەلەر تاريحىندا العاش رەت الەمنىڭ ەڭ دامىعان 35 مەملەكەتى كورمە قالاشىعىندا وزدەرىنىڭ پاۆيلوندارىن تۇرعىزدى. بۇل پاۆيلونداردا سول مەملەكەتتىڭ تاريحىن, مادەنيەت جانە ونەر سالاسىنداعى جەتىستىكتەرىن كورسەتەتىن جادىگەرلەر كەڭىنەن كورىنىس تاپتى. عاسىرلار توعىسىنداعى كورمەدە سول ۋاقىتقا دەيىن جاھاندىق ءوندىرىس ساحناسىندا ادامزات بالاسى قول جەتكىزگەن بارلىق جەتىستىكتەر ۇلگىسى پاش ەتىلدى. كورمە جالاۋى جەلبىرەگەن 7 اي ىشىندە الەم حالقىنىڭ كوز الدىندا شىن مانىندەگى ونەر, عىلىم جانە تەحنيكا جەتىستىكتەرىنىڭ ايشىقتى شەرۋى سالتانات قۇردى. كورمە قالاشىعى ورنالاسقان مارس جازىعىندا عىلىم مەن تەحنيكانىڭ نەبىر جەتىستىكتەرى كورىنىس تاپتى. مۇندا كەن يگەرۋ جۇمىسىنىڭ مەتاللۋرگيا, ماشينا جاساۋ ءوندىرىسىنىڭ ۇلگىلەرى, ەنەرگەتيكانىڭ تابىستارى كورمەگە كەلۋشىلەردىڭ نازارىنا ۇسىنىلدى. ەندى ءبىر پاۆيلوندا ساۋلەت ونەرىنىڭ جەتىستىكتەرى, كولىك جانە حيميا ونەركاسىبىنىڭ زاتتارى قويىلسا, ەندى ءبىر جەردە توقىما جانە جىبەك ماتالاردان تىگىلگەن عاسىر توعىسىنداعى عاجاپ كيىم ۇلگىلەرى ورنالاستى. سونداي-اق, كورمە قالاشىعىندا جاڭا عاسىر باسىندا الەمدەگى ءبىلىم بەرۋ سالاسىندا قول جەتكىزگەن جاڭالىقتار مەن مەديتسينا سالاسىندا اشىلعان عىلىمي ىزدەنىستەر كەڭىنەن تانىستىرىلدى. كورمە قالاشىعىنىڭ ەندى ءبىر بولىگىندە فوتوگرافيا, باسپاحانا جانە ساحنا ونەرى جەتىستىكتەرىنىڭ جاڭالىقتارى كورسەتىلدى. بۇل كورمەنىڭ وسىعان دەيىنگى وتكەن كورمەلەردەن تاعى ءبىر ەرەكشەلىگى مۇندا تاۋاردى قايتا وڭدەۋ تەحنولوگياسى كورەرمەندەرگە كەڭىنەن تانىستىرىلدى. قايتا وڭدەۋ ونىمدەرىن شىعاراتىن ماشينالار مەن جابدىقتار كورەرمەندەردىڭ كوز الدىندا جاڭا ءونىم تۇرلەرىن ءوندىردى. سونىمەن بىرگە, تەحنيكالىق جاڭالىقتار كورمەسىندە بەلگىلى ءبىر سالادا اشىلعان جاڭالىقتار شەجىرەسى تانىستىرىلدى. ءماسەلەن, ا.لاۆۋازەنىڭ حيميالىق اپپاراتتارىنىڭ, ل.پاستەردىڭ ميكروسكوپتارىنىڭ, روبەردىڭ قاعاز شىعاراتىن ماشينالارىنىڭ, جاساندى الماس جاسايتىن ا.مۋاسساننىڭ اپپاراتتارىنىڭ تەحنيكالىق دامۋ شەجىرەسى كورمەنى تاماشالاۋشىلاردىڭ كوڭىلىنەن شىقتى. ەلەكتر ەنەرگەتيكاسىنىڭ, كينەماتوگرافيانىڭ جانە اۆتوموبيل سالاسى وندىرىستەرىنىڭ عىلىمي تابىستارى عاسىر توعىسىنداعى ونەركاسىپتىڭ جوعارى جەتىستىكتەرىن ايشىقتادى. 1900 جىلى پاريجدە وتكەن بۇل كورمە تۋرالى سول كۇندەرى جارىق كورگەن «تەحنولوگ» جۋرنالى بىلاي دەپ جازدى: «اۆتوموبيلدەر اتتاردى ايىرباستاپ, قالالاردىڭ جانە دەرەۆنيالاردىڭ ومىرىنە ۇلكەن وزگەرىستەر اكەلدى. پايدالى جۇمىستىڭ 15-20 پايىزىن عانا اتقاراتىن بۋ ماشينالارىنىڭ ورنىن جىلۋ ماشينالارى (ديزەل وتىنىمەن جۇرەتىن), ەلەكتر جارىعى مايشام جارىعىن جاپپاي الماستىرىپ, ءوندىرىستىڭ بارلىق سالاسىنا كەڭىنەن ەنىپ بارادى. سىمسىز تەلەفون جانە تەلەگراف, رەنتگەن اپپاراتتارى عىلىمي جەتىستىكتەردىڭ نەبىر ۇزدىك ۇلگىلەرىن كورسەتۋدە». بۇكىلالەمدىك كورمەلەر تاريحىندا العاش رەت رەسەي 1900 جىلعى كورمەگە بۇرىن-سوڭدى بولىپ كورمەگەن بەلسەندىلىكپەن اتسالىستى. سول ءبىر جىلدارى رەسەي مەن فرانتسيا مەملەكەتتەرى اراسىندا قالىپتاسقان شىنايى دوستىق قارىم-قاتىناستار پاريج كورمەسىندە رەسەي ەلىنىڭ وندىرىستىك, عىلىمي جانە ونەر سالاسىنداعى تابىستارىن كەڭىنەن تانىستىرۋعا مۇمكىندىك بەردى. كورمە قالاشىعىنداعى رەسەي مەملەكەتىنىڭ پاۆيلوندارى 24 مىڭ شارشى مەتر اۋماقتى الىپ جاتتى. وسى كورمەگە قاتىسۋ ءۇشىن رەسەي سول ءبىر كەزەڭ ءۇشىن وراسان زور قارجى – 5 226 895 رۋبل جۇمسادى. رەسەي تاراپىنان بۇل كورمەگە د.ي.مەندەلەەۆ باستاعان كوپتەگەن عالىمدار قاتىستى. د.ي.مەندەلەەۆ وسى كورمەدەگى حالىقارالىق قازىلار القاسى توراعاسىنىڭ ورىنباسارى بولدى. «عاسىر باعاسى» اتتى 1900 جىلعى پاريج كورمەسىندە ءحىح عاسىردا ادامزات قول جەتكىزگەن عىلىم جانە ءوندىرىس تابىستارى تولىعىمەن پاش ەتىلدى. مىنە, وسىدان كەيىن كورمەلەر شەجىرەسىندە ونەركاسىپتىك توڭكەرىس اسەرى باسەڭدەپ, تەحنولوگيا ماسەلەسى كورمەلەردىڭ باستى تاقىرىبىنان تۇسە باستادى. ءسويتىپ, 1900 جىلعى بۇكىلالەمدىك كورمە ەكسپو تاريحىنداعى عىلىمي جەتىستىكتەر بارىنشا كەڭىنەن كورىنىس تاپقان كورمە بولدى. حح عاسىردىڭ ءبىرىنشى جارتىسىندا بۇل جەتىستىكتى ەشقانداي كورمە قايتالاي العان جوق. 1900 جىلعى 30 قازاندا تۋرا ءتۇن ورتاسىندا ەيفەل مۇناراسى القىزىل تۇسكە بولەنىپ, سامالاداي جارق ەتتى. وسى جارىقپەن بىرگە ونداعان زەڭبىرەكتىڭ وعى تۇنگى اسپاندى تىلگىلەپ, ءدۇرس-ءدۇرس اتىلدى. بۇل ءحىح عاسىردا ادامزات قول جەتكىزگەن ەرەن جەتىستىكتەردى ايگىلەگەن بۇكىلالەمدىك كورمەنىڭ سالتاناتتى تۇردە جابىلعانىن تورتكۇل دۇنيەگە تاراتقان حابار ەدى. ۇزدىك وندىققا ەنگەن جوبا ءبىزدىڭ كوللەدج وتكەن جىلى بىرقاتار شىعارماشىلىق تابىستارعا قول جەتكىزدى. الماتى قالاسىندا وتكەن ەكسپو-2017 كورمەسىنە ارنالعان «بولاشاق وسىندا باستالادى» اتتى ءبىرىنشى رەسپۋبليكالىق يننوۆاتسيالىق جوبالار بايقاۋىنا قاتىسقان ءبىزدىڭ كوللەدجدىڭ «ارناۋلى پاندەر» وقىتۋشىلارى مەن ستۋدەنتتەرى العىس حاتپەن ماراپاتتالدى. جالپى, رەسپۋبليكا بويىنشا بۇل شاراعا 47 جوبا قاتىستى. اقتوبە بايلانىس جانە ەلەكتروتەحنيكا كوللەدجىنىڭ وقىتۋشىلارى مەن ستۋدەنتتەرىنىڭ دايىنداعان جوباسى «ۇزدىك ون جوبانىڭ» قاتارىنا ەندى. جوبانىڭ جەتەكشىلەرى «ارناۋلى پاندەر» وقىتۋشىلارى ءىلياس ساحيتجان مەن جانداۋلەت المانيازوۆ جانە ستۋدەنتتەر ولەگ كۋزنەتسوۆ, اندرەي بەدنىي بولاتىن. جوبا «ارناۋلى پاندەردەگى تاجىريبەلىك-زەرتحانالىق جۇمىستاردا باقىلاۋ-ولشەۋ اسپاپتارى رەتىندە جەكە كومپيۋتەرلەردى قولدانۋ» دەپ اتالدى. جوبانى دايىنداۋداعى ماقسات – كوپ كانالدى ساندىق وستسيللوگراف رەتىندە تاسىمالداناتىن جەكە كومپيۋتەردى (نوۋتبۋكتى) پايدالانۋ بولىپ تابىلادى. مۇندا ەلەكترلىك ولشەۋ جۇمىستارى كەزىندە ستاندارتتى ولشەۋ اپپاراتتارى – وستسيللوگرافتار, ۆولتمەترلەر, ولشەۋ گەنەراتورلارى جانە ولشەۋ اپپاراتۋرالارىنىڭ قوسىمشا قۇرىلعىلارى قولدانىلادى. بۇل اپپاراتتاردىڭ كولەمدەرى مەن سالماقتارى ۇلكەن. سوندىقتان دا پروفيلاكتيكالىق ىسكە قوسۋ زەرتحانالىق جانە باسقا ولشەۋ جۇمىستارىندا بىرلەستىرىپ پايدالانۋ قيىندىق تۋدىرادى. وسى پروبلەمانى شەشۋ ءۇشىن ۇستازدار وسى جوباعا جەتەكشىلىك جاساپ, ستۋدەنتتەرمەن بىرگە دايىندادى. قورىتىندى بايقاۋدىڭ ناتيجەسىندە ءبىزدىڭ كوللەدجىمىز جەڭىسكە جەتتى. لاۋرا ماحاماشوۆا, اقتوبە بايلانىس جانە ەلەكتروتەحنيكا كوللەدجىنىڭ وقىتۋشىسى.قازاقستان – مادريد كورمەسىندە
ۇستىمىزدەگى جىلعى قاڭتار ايىنىڭ سوڭىندا مادريد قالاسىندا 34-حالىقارالىق اتاقتى «FITUR» تۋريستىك كورمەسى بولىپ ءوتتى. وعان قازاقستان تاراپىنان استانا ەكسپو-2017 بۇكىلالەمدىك مامانداندىرىلعان كورمە تاقىرىبىنا ارنالعان تاقىرىپتىق كورىنىستەر قاتىستى. حالىقارالىق «FITUR» تۋريستىك كورمەسى الەمدىك تۋريزم سالاسىنداعى ايتۋلى شارالاردىڭ ءبىرى بولىپ تابىلادى. بۇل كورمەدە تۋريزم سالاسىندا قول جەتكىزىلگەن جەتىستىكتەر جاڭا قىزمەت تۇرلەرى مەن تاۋارلار ۇلگىلەرى قويىلادى. سونىمەن بىرگە, وسى كورمە شەڭبەرىندە ماماندار تاجىريبە الماسىپ, وقۋ-تاجىريبەلىك ترەنينگتەرى وتكىزىلەدى. مىنە, وسى شارالاردىڭ بارىندە ەلىمىزدىڭ تۋريستىك سالاسى بەلسەنە قاتىستى. «FITUR» تۋريستىك كورمەسىنە كەلۋشىلەر IFEMA كورمە كەشەنى زالىندا ورنالاسقان قازاقستاندىق جادىگەرلەرمەن جان-جاقتى تانىستى. ولاردىڭ تاراپىنان استانا ەكسپو-2017 بۇكىلالەمدىك مامانداندىرىلعان كورمەسىن وتكىزۋگە بايلانىستى قويىلعان تاقىرىپتىق ستەند ەرەكشە قىزىعۋشىلىق تۋعىزدى. وسى شارالار اياسىندا كورمەنى تاماشالاۋشىلار ءۇشىن استانانىڭ جانە جالپى قازاقستاننىڭ تۋريستىك مۇمكىندىكتەرى كەڭىنەن پاش ەتىلدى. حالىق قولونەرشىسى بەرىك ءالىباي كوشپەندىلەر قولونەرىنىڭ نەبىر تاماشا ۇلگىلەرىن كورسەتتى. ق.بايجانوۆا اتىنداعى «اققۋ» ونەر بىرلەستىگى ۇلتتىق ناقىشتاعى اۋەزدى اۋەندەرىمەن كەلۋشىلەردى باۋراپ الدى. ستاتيستيكا دەرەكتەرى بويىنشا, مادريدتە وتكەن كورمەدە 9 مىڭ كومپانيانىڭ جەتىستىكتەرى پاش ەتىلگەن. «FITUR-2013» كورمەسى وتكەن 5 كۇن ىشىندە ونى 91 مىڭنان استام ادام تاماشالادى. جاراس سادۋاقاسوۆ.تۋريزمگە قوسار ۇلەس تولايىم
قازاق ەلى تاۋەلسىزدىگىن العاننان بەرى قۋاتتى مەملەكەت رەتىندە قالىپتاسىپ, الەمنىڭ الدىڭعى قاتارلى ەلىنە اينالۋ جولىندا تالاي بەلەستەردى باعىندىردى, تامىرى تەرەڭدە جاتقان ءتول تاريحىمىزدىڭ جاڭا بەتتەرى اشىلدى. وسى قىسقا عانا ۋاقىت ىشىندە ەكونوميكالىق جانە الەۋمەتتىك ماڭىزى زور جوبالاردى قولعا الىپ, الەمدىك دەڭگەيدەگى ءىس-شارالاردىڭ وتۋىنە ۇيىتقى بولا بىلدىك. جاھاندىق ماسەلەلەر تالقىعا تۇسكەن كەشەگى ەقىۇ-نىڭ ءسامميتى, استانا ەكونوميكالىق فورۋمى, ينۆەستيتسيالىق فورۋم, دۇنيەجۇزىلىك يسلام ەكونوميكالىق فورۋمى جاس مەملەكەتىمىزدىڭ مەرەيىن ۇستەم ەتىپ, ابىرويىن اسقاقتاتتى. ەڭ باستىسى, دامۋ باعىتىن ايقىنداپ بەردى. وسىنداي كوشەلى ىستەردىڭ جالعاسى رەتىندە قازاقستاننىڭ 160 جىلدان استام تاريحى بار ەكسپو-2017 كورمەسىن وتكىزۋ قۇقىعىن يەلەنۋى دەر ەدىم. ەكسپو-2017 حالىقارالىق كورمەسىن وتكىزۋگە نيەتتى قازاقستان الەمدىك قاۋىمداستىققا «بولاشاق ەنەرگياسى» تاقىرىبىن ۇسىنعانى بەلگىلى. قالاي دەگەندە دە, ەكسپو سياقتى حالىقارالىق كورمەلەرگە قاتىسۋ قاي ەلدىڭ بولسا دا الەۋەتىن دۇنيە جۇزىنە پاش ەتۋگە بەرىلگەن تاماشا مۇمكىندىك دەۋگە بولادى. ونىڭ ۇستىنە, الەم الدىندا ءوزىڭنىڭ دامۋ دەڭگەيىڭدى ءىس جۇزىندە دالەلدەي وتىرىپ, شارانى جوعارى جاۋاپكەرشىلىكپەن وتكىزۋ – وتە زور قۇرمەت. ويتكەنى, ەلدەردى دوستاستىرۋ, اۋىزبىرلىككە شاقىرۋ, ينفراقۇرىلىمداردى لايىقتى دەڭگەيدە دامىتۋ – جوعارى دارەجەدە وتەتىن كەز كەلگەن ءىس-شارانىڭ ماقتانىشى. ارينە, بۇل وڭاي شارۋا ەمەس. تاريحقا ءۇڭىلىپ قارايتىن بولساق, ەكسپو كورمەسىن وتكىزگەن مەملەكەتكە قىرۋار ينۆەستيتسيا قۇيىلىپ, تۋريزم سالاسىندا كوپ سەپتىگىن تيگىزدى. مىسال رەتىندە مەن الەمگە ايگىلى ەيفەل مۇناراسىن اتاپ ايتا الامىن. ول – ەكسپو كورمەسىنە ارنايى سالىنعان نىسان. قازىرگى تاڭدا عاشىقتار مۇناراسىمەن تانىلىپ كەتكەن ەيفەل مۇناراسى تۋريستەردىڭ ەڭ كوپ باراتىن ورنىنا اينالدى. استانادا وتەتىن ەكسپو-2017 كورمەسى تۋريزم دامۋىنىڭ ءبىر باعىتى بولاتىنىنا سەنەمىن. بۇل جەردە مەملەكەت پەن كورمە وتەتىن قالاعا شەتەلدىك تۋريستەردى تارتۋعا ۇلكەن مۇمكىندىكتەر تۋىندايدى, سونىمەن قاتار, ءتۋريزمدى اسا جوعارى دەڭگەيدە ۇيىمداستىرۋ شەبەرلىگىن مەڭگەرەر ۇلكەن تاجىريبە الماسۋ الاڭى بولادى. وسى كورمە ارقىلى شەتەلدەن كەلگەن تۋريستەردى قازاق ەلىنىڭ تاريحىمەن, مادەنيەتىمەن جانە دە تاماشا تابيعاتىمىزبەن قىزىقتىرا الامىز. بۇل ءوز كەزەگىندە شەتەلدەن كەلگەن تۋريستەردىڭ سانىن كوبەيتىپ, وتاندىق ەكونوميكاعا مول ينۆەستيتسيا قوسار ەدى. ەلباسىمىز اتاپ كورسەتكەندەي, بولاشاق جاستاردىڭ قولىندا. سوندىقتان ەكسپو-2017 جوعارى دەڭگەيدە وتۋىنە بارلىعىمىز دا اتسالىسىپ, ەلىمىزدىڭ كوركەيۋىنە, وتاندىق ءتۋريزمنىڭ دامۋىنا ءوز ۇلەسىمىزدى قوسايىق. اسقار الدامجاروۆ, ماحامبەت وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتى.ارنايى بەتتى ازىرلەگەن
«ەگەمەن قازاقستان» گازەتىنىڭ شولۋشىسى
جىلقىباي جاعىپار ۇلى.
