ونىڭ قانداي ءمانىسى بار دەگەن ساۋالىمىزعا اتالعان دەپارتامەنتتىڭ ازاماتتىق قورعانىس باسقارماسىنىڭ باستىعى, پودپولكوۆنيك مارات مۇراتوۆ بۇل مينيسترلىكتىڭ بۇيرىعى بويىنشا بولىپ جاتقان ويىندار ەكەنىن جەتكىزدى. «مينيسترلىك ازاماتتىق قورعانىستىڭ كۇشتەرى مەن قۇرالدارىنىڭ «بايقوڭىر» عارىش ايلاعىنان ۇشىرىلعان زىمىرانداردىڭ قۇلاۋ مۇمكىندىگىنەن بولاتىن اپاتتى جاعدايعا قارسى ءىس-ارەكەتتەرگە دايىن بولۋ كەرەكتىگى جونىندە بەرىلگەن بۇيرىعىنا سايكەس وسى ويىندار ەسىل اۋدانىندا ۇيىمداستىرىلىپ وتىر», دەدى ول.
اتالعان جاتتىعۋ ويىندارى 28-29 قازان ارالىعىندا وتكىزىلدى. وعان 84 ادامدىق جەكە قۇرام مەن 43 دانا تەحنيكا قاتىستىرىلىپ, «پروتون-م» زىمىرانى قۇلاپ, ۋلى زاتتاردىڭ جاقىن ماڭداعى پوكروۆكا اۋىلىنا تارالۋى مۇمكىن بولعان جاعدايداعى ارەكەتتەر ايقىندالىپ, قارسى شارالاردىڭ قانداي بولۋى كەرەكتىگى پىسىقتالدى.
وسى اۋىلدا وبلىستىق ماڭىزى بار اۋىل شارۋاشىلىعى كوللەدجى بار ەدى. جاتتىعۋ كەزىندەگى ەۆاكۋاتسيالىق پۋنكت سونىڭ اۋماعىندا ورنالاستىرىلدى. حيميالىق ۋلانعىش زاتتارمەن جاراقاتتانۋى مۇمكىن ادامدار وسىندا جينالاتىن بولدى. ەۆاكۋاتسيالانعانداردى قابىلدايتىن كوميسسيا دا وسىندا ورنالاستىرىلدى جانە ۋلانعان ادامدارعا العاشقى كومەك تە وسىندا جاسالاتىن بولىپ بەلگىلەندى.
جاتتىعۋ ويىندارىنىڭ باستى ماقساتى – توتەنشە جاعدايدى قۇرىقتاۋ جۇمىستارىنىڭ تولىقتىعى مەن ساپاسىن انىقتاۋ, سونىمەن قاتار ەۆاكۋاتسيالىق كوميسسيانىڭ حالىقتى دەر كەزىندە قۇلاقتاندىرىپ, قۇتقارۋ جۇمىستارىن جەدەل ۇيىمداستىرا الۋ مۇمكىندىگىن ساراپتاۋ جانە جارىلىستىڭ زارداپتارىن جويۋ.
بەتىن اۋلاق قىلسىن, زىمىراننىڭ قۇلاۋ مۇمكىندىگى ەندى سولتۇستىك قازاقستاننىڭ دا اۋماعىن قامتۋى مۇمكىن ەكەنى انىقتالعان. وسىعان دەيىن دە التى اۋداننىڭ اۋماعىندا وسى تارىزدەس وقۋ-جاتتىعۋ شارالارى وتكىزىلگەن. وعان 112 قۇرىلىم مەن 785 ادامدىق 250 تەحنيكالىق كۇش قاتىستىرىلعان. ءسويتىپ, ايدىڭ-كۇننىڭ امانىندا باسىمىزعا زىمىران قۇلاۋى مۇمكىن ەكەندىگىن ءبىلىپ, وبلىس حالقى الاڭداۋشىلىق ءبىلدىرىپ وتىر. قازىر بىزگە ەشقانداي پايداسى جوق زىمىراننىڭ ۇشۋ تراەكتورياسى سولتۇستىك قازاقستان ارقىلى وتەتىن بولىپتى. زىمىران قۇلايتىن بولسا, ونىڭ زارداپتارى بەيبىت تۇرعىندارعا از بولماسى بەلگىلى.
سولتۇستىك قازاقستان وبلىسى
